Mumwaaka wa 2020 kwakacitika mapensho anene akuteengashila apusenepusene alimwi nceciindi abulwashi bwa COVID-19 ndyebwakatalika nsengwe yoonse. Ino Bakamboni Bakwe Yehova bakacafwa buyani abo bakakumwa ku mapensho aya?

 Mumwaaka wancito wa 2020, a bamu Komiti ya Beshikubunganya ya Likoto Litanjilila bakasuminisha ayi kusebenseshekwe maali amadola aku America ashika ku 28 miliyoni kucafwa baabo bakakumwa ku mapensho aya. Maali aya akacafwa bantu bakakumwa ku mapensho anene eendilila 200. Mapensho anene aya akalinga kwiilikaawo bulwashi bwa COVID-19, shipuupu shipusenepusene, bulobe mu Africa, nsala kucishi ca Venezuela alimwi acilanga kucishi ca Zimbabwe. Maali akapekwa akacafwilisha kuula shakulya, maanshi, shakufwala, misamu, kucana kwakukala alimwi ashakusebensesha pakubotesha, kubamba alimwi akuyaka maanda. Atubandike pashakubonenaako shimwi shitondesha lucafwo lwakapekwa.

 COVID-19. Bulwashi ubu bwakakuma bamakwesu abenankashi nsengwe yoonse. Bamwi bakakumwa lwakumubili, mumiyeeyo alimwi akulicana mulipenshi lya kubula maali. Kwaamba ayi bacafwe baabo bakakumwa, kwakabambwa makomiti apa lucafwo eendilila 800 nsengwe yoonse. Bamakwesu bamu makomiti aya bakalinga kubikila maano kushintu shakalinga kuyandika bamakwesu abenankashi, alimwi cakufwambaana bakalinga kutuma malipooti ayo akacafwa bamu Komiti ya Beshikubunganya kushiba kabotu kwakalinga kuyandika lucafwo abuumbi.

 Mwaaka woonse, bamu makomiti aya bakacafwa bantu baanji kucana shakulya, maanshi, shintu shakusebensesha pakubotesha alimwi amisamu. Mumisena imwi, bamu makomiti aya bakalinga kusebensela pomwi abamanene bakumusena uko kucafwa bamakwesu abenankashi kwaamba ayi batambula lucafwo kuswa kumfulumeende.

 Bantu bateshi Bakamboni bakabona incito yesu yakucafwilisha bamwi. Kucakubonenaako, ba Field Simwinga, basebensa mbuli ba district commissioner (D.C) mutauni ya Nakonde mucishi ca Zambia bakaambila bamakwesu ayi: “Twalumba abuumbi palucafwo lwapaciindi ceelete ndomwapa kumikwashi iyo yakakumwa.”

 Nsala mucishi ca Angola. Bulwashi bwa COVID-19 bwakapa kwaamba ayi mucishi ca Angola mutabi shakulya shikwene aboobo muulo wa shakulya wakaya peculu abuumbi. Ici cakapa kwaamba ayi bamakwesu abenankashi baanji cinoobayumina kuula shakulya.

 Musampi waku Brazil wakasengwa ayi ucafwe bamakwesu abenankashi baku Angola kwiinda mukubatumina shakulya. Kwaamba ayi basebenseshe kabotu maali, bamakwesu bakalangoola nshila shibotu alimwi shuubu sha mbweenga boola shakulya shiinji akushituma ku Angola. Aboobo, kwaamba ayi boole akutuma kabokosi komwibo ka shakulya bakalinga kusebensesha maali amadola aku America ashika 22. Nacibi boobo kabokosi ako kakalinga kulema makilogilamu pafwiifwi a 20 alimwi mwakalinga shakulya mbuli laisi, cilemba alimwi amafuta akutelekesha. Kusa mukushika pacecino ciindi, tubokosi tuli 33,544 twakatumwa alimwi toonse pomwi twakalinga kulema makilogilamu ashika 654, 000. Shakulya ishi kwiilikaawo asheesho nshobakacana mucishi ici, shakacafwa bantu beendilila 50, 000!

 Ino bamakwesu abenankashi balalinyumfwa buyani palucafwo ulu? Ba Alexandre, abo bekala kumushi umwi wa mucishi ca Angola bakaamba ayi: “Ubu mbumboni butondesha ayi Yehova alinsuni alimwi ayi nshibete neenka. Libunga lyakwe Yehova lilinsuni abuumbi!” Ba Mariza, mushali mwanakashi ulela bana eenka wakaamba ayi: “Yehova wakanyumfwa kulila kwangu. Ndalumba Yehova alimwi alibunga lyakwe!”

 Kupa lucafwo paciindi ndyekwakalinga cilanga mucishi ca Zimbabwe. Mumwaaka wancito wa 2020, mucishi ca Zimbabwe mwakalinga cilanga ico cakapa kwaamba ayi bantu baanji abuumbi bapenge kunsala. Bakamboni baanji bamu cishi ca Zimbabwe tabakalinga kucitewo shakulya shikwene.

 Kwakabambwa makomiti apa lucafwo osanwe kwaamba ayi acafwe bamakwesu abenankashi kwiinda mukubapa shakulya. Beshikushimikila baanji bakacafwilisha kwiinda mukubamba shintu shakubikaamo shakulya, kushibika mumyotoka na kwaaba myotoka yabo kwaamba ayi isebenseshekwe. b Mumwaaka wancito wa 2020, kwakasebenseshekwa maali amadola aku America ashika 691,561 kuula shakulya sha bantu beendilila 22, 700.

 Mumisena imwi, cakacanika ayi shakulya nshebakalinga kucite bamakwesu abenankashi, kashili shamana kale paciindi ndyekwakalinga kupa lucafwo. Shakulya ndyeshakashika bamakwesu abenankashi bakatalika kulumbaisha Yehova alimwi bamwi bakatalika akwiimba nyiimbo sha Bwaami.

 Kumusena umwi, Bakamboni bobilo bamukalubinje bakacanikaako kukubungana kwa mumushi kwakabambwa alibunga lyomwi lyatakalinga lya mfulumeende (NGO). Kubungana uko kwakalinga kwaamba pamakani akupa shakulya libunga ili nkolyakalinga kucita. Sombi, pakubungana uko bakatalika kwaamba shamapolitiki. Aboobo, benankashi aba bakabona kwaamba ayi inga tabacikonshi kucita shakalinga kuyandika kwaamba ayi batambule lucafwo. Ndibakalinga kuswawo, bantu bakabaweluluka akubaambila ayi, “Mutakesi mukulangoola shakulya kuli ndiswe!” Nacibi boobo, ndipakeendabo nsondo shobilo, bamakwesu bakacikonsha kushika kumusena uku akupa benankashi aba shakulya. Paciindi ico shakulya shakalinga kuswa kulibunga lyatakalinga lya mfulumende kashitana kushika!

 Kupa lucafwo mucishi ca Zimbabwe kwakapa bumboni bubotu kubantu. Kucakubonenaako, amuyeeye pashakacitika kuli ba Prisca, bekala mumushi umwi uniini. Nabi kwaamba ayi cilanga cakaleta mapensho, ba Prisca bakalinga kuya mukushimikila pabushiku bwa Citatu alimwi pa Cisanu nsondo ansondo, alimwi bakalinga kucita boobo nabi muciindi ca meensa. Bantu bamumushi umo bakalinga kubacobola akwaamba ayi: “Mulakucaisha mukwashi wanu kunsala ceebo cakushimikila kwanu.” Ba Prisca bakalinga kukumbula ayi: “Yehova taana kulekeleshawo kale basebenshi bakwe.” Ndipakeendabo ciindi ciniini kuswa ndyeshakacitika isho, ba Prisca bakatambula lucafwo kuswa kulibunga. Ici cakakankamika beshikamukobonyinaabo alimwi bakalwiita ba Prisca ayi: “Lesa taana kumulekeleshawo, aboobo tulisuni kwiiya shiinji pali nguwe.” Pacecino ciindi beshikamukobonyinaabo bali 7 balakutika kumabungano ansondo ansondo ayo abaako pa cilimba.

 Ndyetutooya cisena pafwiifwi amamanino, tulaakutolelela kwiinda mumapensho anene alicitikila cakuteengashila. (Mateyo 24:3, 7) Tulalumba abuumbi pa maali ngomupa mukuliyandila kwiinda mukusebensesha nshila shipusenepusene shicanika pa donate.pr418.com. Maali aya alasebenseshekwa kucafwa baabo batoyandika lucafwo alimwi akubapa lucafwo paciindi ceelete.