Kubungana kunene kwamu 2020 kwakalinga kubungana kulibetele mukwiinga nceciindi cakutaanguna ndyetwakeebela pulogilamu yakubungana kunene yakalekodwa nsengwe yoonse kwiinda mukusebensesha intaneti! Nacibi boobo, ku Malawi aku Mozambique, buunji bwa bamakwesu abenankashi bakakutika na kweebela kubungana kunene kwakubula kusebensesha intaneti. Ino ici cakakonsheka buyani?

 Bamu Komiti ya Beshikubunganya a Kwiisha yamu Likoto Litanjilila bakasuminisha bamakwesu baku Malawi alimwi a Mozambique kuba akubungana kunene kwiinda mukusebensesha TV na cilimba. Ino nceebonshi kwakabikwa bubaambo ubu? Mucishi ca Malawi intaneti ilidulite alimwi Bakamboni baniinibo mbobacikonsha kucita konekiti ku intaneti. Mukwesu William Chumbi wamukomiti Yamusampi waku Malawi wakasansulula ayi: “Nshila yeenkabo njeenga twasebensesha kwaabila bamakwesu abenankashi cakulya ici cakumushimu nkwiinda mukusebensesha TV a cilimba.” Lyalo mukwesu Luka Sibeko, alakwe uli mukomiti Yamusampi waku Malawi wakeelikaawo akwaamba ayi: “Nakwiinga tatukwe kusebensesha TV a cilimba, nakwiinga bamakwesu abenankashi baniinibo mbobakafubilaamo mukubungana kunene uku kumusena wamusampi wesu.” Akwalo kucishi ca Mozambique, bamakwesu abenankashi baniinibo nakwiinga mbobakacikonsha kweebela kubungana kunene alimwi akucita konekiti ku intaneti.

 Ceebo ca bulwashi bwa COVID-19, masitesheni amwi ama TV apa cilimba bakalinga basuminisha kale ayi inga kabatondesha na kulisha amabungano. a Aboobo bamakwesu bakaya mukusenga ku masitesheni ama TV apa cilimba kwaamba ayi babanungileeko ciindi kwaamba ayi bakatondeshe na kulisha pulogilamu yakubungana kunene.

 Ku Malawi bamakwesu bakalicana mubukalo buyumu. Liinji, masitesheni ama TV apa cilimba balasuminisha kutondesha na kulisha pulogilamu iteendilili paliwoola lyomwi. Basebensela ku masitesheni balalisukama ayi na mapulogilamu alaampisha cilaba ciyumu ayi batookutika batolelele kukutika cakubikila maano. Nacibi boobo bamakwesu bakasansulula ayi incito yesu ilaacafwa bantu baanji. Nabi paciindi cino cabulwashi bwa COVID-19, tulalwiita bantu makani abotu kuswa mu Baibo eenga abayuminisha, kubacafwa kuba bantu bali kabotu alimwi akuba amukwashi usangalete. Basebensela kumasitesheni ndyebakanyumfwa boobo, bakasuminisha kunungilaako bamakwesu ciindi.

 Ku Malawi, sitesheni yomwi ya TV ayomwi ya cilimba, bakasumina kuba akubungana kunene ico cakapa kwaamba ayi bantu baanji abuumbi beebele na kukutika kupulogilamu iyi. Lyalo ku Mozambique, kwakatondeshekwa kusitesheni yomwi ya TV alimwi masitesheni ali 85 apa cilimba.

 Mushishi shoonse shobilo, maali akasebenseshekwa ayi cikonsheke kweebela kubungana kunene pa TV akalinga madola aku America ashika ku 28,227 alimwi maali pafwiifwi amadola aku America ashika ku 20,000 akasebenseshekwa kulipila masitesheni apa cilimba.

 Bamakwesu bakasebensa cankusu kwaamba ayi basebenseshe kabotu maali apekwa mukuliyandila. Kucakubonenaako, mucishi ca Malawi bamakwesu bakabandika abaku masitesheni kwaamba ayi bababoosheleko muulo panshi. Aboobo bakabakushilaako maali ashika ku madola aku America ashika ku 1,711. Lyalo mucishi ca Mozambique, bakumasitesheni amwi bakasumina kuboosha muulo panshi ceebo cakwaamba ayi tulicite impuwo ibotu alimwi tulafwambaana kulipila.

 Bamakwesu abenankashi bakalumba abuumbi kweebela na kukutika kubungana kunene kusebensesha masitesheni amucishi mobabete. Munene mulibungano waliina lya Patrick, ukala kucishi ca Malawi, wakaamba ayi: “Tulabalumba abuumbi bamakwesu bamu Likoto Litanjilila pashintu shoonse nshebacita paciindi cino ca bulwashi bwa COVID-19.” Ba Isaac abalo bekala ku Malawi bakaamba ayi: “Tatucitewo shisebensesho shimwi, aboobo twakalumba camaansa obilo pabubaambo libunga lyakwe Yehova mbolyakabika kwaamba ayi tukutike kupulogilamu ya kubungana kunene kwiinda mukusebensesha cilimba. Mukwashi wangu woonse wakafubilaamo mukubungana kunene ceebo ca bubaambo ubu. Twakabona ayi ici ncitondesho cakwaamba ayi Yehova alibasuni bantu bakwe.”

 Kubungana kunene kwamu 2020, kwakalinga kubungana kunene kwakutaanguna kuli shikushimikila umwi ukala mucishi ca Mozambique. Wakaamba ayi: “Kweebela kubungana kunene pa TV, kwakanjiibalusha ayi Yehova ngo Lesa shinkusu shoonse. Bulwashi bwa COVID-19 tabukwe kupa kwaamba ayi Yehova aalilwe kutupa nshetuyandika kwaamba ayi tutolelele kuyumya lushomo lwesu. Ndakabona bumboni butondesha ayi bantu bakwe Yehova balisunene. Ndishomete cakutatoonsha ayi ubu mbobupailishi bwancine.”

 Munene mulibungano waliina lya Wyson wakaamba ayi: “Ndisuni kulumba musebenshi ushomeka ceebo ca mbobatulama kabotu paciindi cino ca bulwashi bwa COVID-19. Bubambo ubu bwakwaamba ayi kubungana kunene kubeeko pa TV apa cilimba bwacafwa buunji bwandiswe sotutacite maali aanji kwaamba ayi tufubileemo akucikonsha kukutika na kweebela kubungana kunene.”

 Bamu Komiti ya Beshikubunganya alimwi a Kwiisha babika bubaambo bwakwaamba ayi kubungana kunene kwamu 2021 kukabeeko pa TV na pa cilimba mumisena imwi. Ino maali asebenseshekwa kwaamba ayi kubungana kunene kubeeko pa TV na pa cilimba alaswa kuli? Alaswa pamaali apekwa kucafwilisha incito yansengwe yoonse ayo apekwa kwiinda mukusebensesha nshila shipusenepusene shicanika pa donate.pr418.com. Tulalumba abuumbi pamaali ngomupa mukuliyandila.