Mu March 2020, libunga lya World Health Organization ndyelyakaamba ayi bulwashi bwa COVID-19 mbulwashi bwakuma bantu nsengwe, baanji tabakalinga kuyeeya ayi bulwashi ubu inga bwatolelela kubaako kwaciindi cilaamfu. Bantu baanji, kwiilikaawo a Bakamboni Bakwe Yehova bamwi, bakaciswaawo bulwashi ubu, kufwitwa beshicibusa na beshikamukowa alimwi amapensho akushuupa kwa maali uko kwakesa ceebo cabulwashi ubu. Ino nshiinshi Bakamboni Bakwe Yehova nshebakacita kwaamba ayi bacafwilishe bamwi paciindi ca bulwashi ubu?

 Kwiinda mubutanjilishi bwa bamu Komiti ya Beshikubunganya ya Likoto Litanjilila lya Bakamboni Bakwe Yehova, kwakabambwa makomiti eendilila 950 nsengwe yoonse kwaamba ayi ape lucafwo paciindi ca bulwashi bwa COVID-19. Mushishi shimwi bakabamba kupa lucafwo kweelana akumusena nkobabete, lyalo kumisena imwi Bakamboni bakatambula lucafwo kuswa kumfulumeende. Bamu makomiti apa lucafwo bakabika abubaambo bwakupa lucafwo kubantu baanji.

 Kucakubonenaako, amuyeeye shakacitika kucishi ca Paraguay. Nyusipepa imwi yakaamba ayi ceebo cakushuupa kwa maali uko kwakesa ceebo ca bulwashi ubu, “bantu baanji bekala mucishi ici tabaciteewo shakulya shikwene.” Nacibi boobo, bamu komiti ipa lucafwo kabali batalika kale kupa lucafwo kubantu bekala mucishi ici. Ishi shakeelikaawo shintu mbuli shakulya, shintu shakusebensesha pakubotesha alimwi ashintu shimwi shiyandika nsheenga mukwashi wabantu bone wasebensesha kwansondo shobilo. Shintu ishi shakalinga kuulwa pamuulo ushika madola 30 aku America.

 Ino bamakwesu abenankashi aba bapa lucafwo balacita buyani kwaamba ayi balishitilishe akushitilisha bamwi kubulwashi bwa COVID-19? Balafwala mamasiki akutalamukana. Alimwi balashinisha ayi makampani abamba shakulya kaabambila mumisena ya buuya akukonkela milawo imwi ya kulishitilisha. Ici cilaamba ayi abo baabanamo lubasu mukubamba shakulya balyeelete kufwala shakulishitilisha, kusebensesha myotoka ya buuya alimwi yakaboteshekwa amusamu ucaya tulongolo alimwi akubika shakulya pamusena wakaboteshekwa amusamu ucaya tulongolo. Mukweelaako, abo baleta alimwi abaabo batotambula shakulya balyeelete kutalamukana.

 Kusa mukushika mu January 2021, bamu Komiti ya Beshikubunganya bakasuminisha ayi maali amadola aku America eendilila 25 miliyoni asebenseshekwe kucafwilisha bantu paciindi ca bulwashi bwa COVID-19. Bamu misampi alimwi abamu makomiti apa lucafwo balasebensesha maali aya apekwa mukuliyandila munshila ili kabotu akusebensa cankusu kwaamba ayi boole shintu shiyandika pamuulo uniini. Kucakubonenaako kucishi ca Chile, bamakwesu bakalinga kusuni kuula nyaangu shilema makilogilamu ashika ku 750. Nacibi boobo, muulo wa nyaangu wakalinga watanta abuumbi mumweenshi womwibo! Ndipakeendabo mawoola obilo kuswa ciindi ndyebakasuminishanya ayi boole nyaangu pamuulo udulite abuumbi, shikuliisha umwi wakabalwiita ayi kuli shikuula umwi waboosha nyaangu nshakoola. Aboobo, muciindi cakuboolisha nyaangu pamuulo ngobakasuminishanya, shikuulisha wakaboolisha nyaangu shakabooshekwa pamuulo wa mweenshi wakamana!

 Nacibi boobo, bamakwesu ndibakaya mukubwesa nyaangu isho, shikuulisha wakalinga kusuni kukaka kuboolisha mukwiinga wakalinga kuyeeya ayi bamakwesu tabakalinga kwaabanya kabotu shakulya mbuli mabunga amwi mbwaakalinga kucita. Mukwesu umwi ndyakamanisha kupaila mumoyo, wakalwiita shikuulisha uyo ayi bakalanga langa kabotu mumabungano oonse akushiba baabo bakalinga kuyandika shakulya. Alimwi bamakwesu bakamusansulwiita ayi mukwiinga bukaalo bwa baabo bakalinga kuyandika lucafwo bwakalinga kupusenepusene, shakulya shakalinga kusa mukupekwa kweelana amukwashi womwi awomwi nshewakalinga kuyandika. Mukweelaako, bakalwiita shikuulisha ayi maali oonse asebenseshekwa a Bakamboni Bakwe Yehova nga maali apekwa mukuliyandila. Shikuulisha wakasangalala alimwi wakaboolisha nyaangu pamuulo uniini akubeelikilaawo makilogilamu anyaangu ashika ku 400 ciindi bamakwesu ndyebakoola alimwi.

 Nankashi wacinene waliina lya Lusu ukala ku Liberia, ngu mukalubinje ukala abeshikamukowa bamwi bali 5. Bushiku bumwi ndyebakalinga kulya cakulya ca macuunsa akwiinduluka mulilembo lya bushiku, mwishikulu wabo wa myaaka 7, wakabona ayi shakulya nshobakalinga kucite muŋanda shamana. Mpeeke wakeepusha ayi, “Ino tutoolya nshi?” Ba Lusu bakamulwiita ayi bakalinga bapaila kale akusenga lucafwo alimwi bakalinga kushomete ayi Yehova alaakubapa nshebatoyandika. Pabushiku bweenka ubo malumwi, ba Lusu bakatambula fooni kuswa kubamanene bamulibungano abo bakabalwiita ayi baye babwese shakulya. Lyalo ba Lusu bakaamba ayi: “Mwishikulu wangu wakashiba ayi Yehova alanyumfwa akukumbula mipailo mukwiinga wakakumbula mupailo wangu.”

 Mwanakashi umwi waku Democratic Republic of Congo ulibambene amukwashi umwi wa Bakamboni Bakwe Yehova. Ndyaakabona mukwashi uyu kautambula shakulya kuswa kubashominyinaabo, wakaamba ayi, “Bulwashi ubu na bukamaane, tulaakuba Bakamboni Bakwe Yehova mukwiinga balabikila maano kubashominyinaabo paciindi cino cishupite.” Beebabo bakabeepusha ayi, “Sa mulaakuba womwi wa Bakamboni Bakwe Yehova ceebo ca lisaka lomwi lya laisi?” Banakashi bakakumbula ayi, “Sobwe, sombi lisaka lya laisi lilya ncitondesho calusuno lwancinencine.”

 Bakamboni Bakwe Yehova balafwambaana kucafwa bamakwesu abenankashi babulishite paciindi cino ca bulwashi bwa COVID-19 ceebo ca maali ngomupa mukuliyandila. Twamulumba abuumbi pa maali ngomupa kwiinda mukusebensesha nshila shicanika pa donate.pr418.com.