“Myaaka iniini yaiinda, sobamwi tatwakalinga kuyeeyawo ayi inga katutambula shakulya shakumushimu pafooni na patabuleti.” Sa amwebo, mutoobona ayi maswi aya ngancine? Maswi aya ndubasu lwa likani liyuminisha lyakaambwa aba Geoffrey Jackson Mulipooti Namba 6 Yamu 2020 Kuswa ku Likoto Litanjilila. Bakatolelela akwaamba ayi: “Ano mpashi inga katwaamba ayi, cito nakwiinga cili buyani pacecino ciindi ndyekuli bulwashi bwa COVID-19 kwakubula cisebensesho mbuli JW Library. Yehova wakalinga kutubambilila limwi myaaka yaiinda kwaamba ayi tube balibambite muciindi mbuli ceeci.”

 Ino Yehova wakalinga kutubambilila buyani? Ino nshiinshi shakalinga kwiilikitweemo pakupanga JW Library? Alimwi ino nshiinshi shiyandika kwaamba ayi JW Library itoolelele kunoboneka kabotu?

 Mu May 2013, bamu Likoto Litanjilila bakasenga bamakwesu basebensela pa pulogilamu ya MEPS, nkokwaamba ayi dipatimenti icanika kumaofesi esu anene, kwaamba ayi babambe apu yeshi ikabe a Baibo ya New World Translation yakabambululwa. Ba Paul Willies basebensela pa pulogilamu ya MEPS bakaamba ayi: “Kusa mukushika paciindi ico, tatuna kupangaawo kale apu ya pafooni yeenga yabikwa pa app store. Nacibi boobo, twakasenga bamakwesu mbotusebensaabo, kwiimika ncito shimwi alimwi akusenga bamu madipatimenti amwi kwaamba ayi batucafwe kubamba, kupanga alimwi akubikaamo shoonse shakalinga kuyandika mu apu. Liinji twakalinga kupaila alimwi kwiinda mulucafwo lwakwe Yehova twakacikonsha kukusha apu ya JW Library pakubungana kwapa mwaaka ndipakeendabo myeenshi yosanwe!”

 Lipenshi limwi lyakalingaawo nkubamba laibulali kwaamba ayi ibe amabuku aanji alimwi mumishobo iinji. Kusa mukushika mu January 2015, buunji bwa mabuku esu asebenseshekwa pacecino ciindi amu Cisungu akalinga kucanika mu laibulali. Lyalo ndipakeendabo myeenshi 6, bantu bakalinga kusebensesha laibulali iyi bakalinga kucikonsha kucita dauniloodi mabuku mumishobo imwi iinji.

 Kuswabo paciindi ico, bamakwesu batolelela kwaalula laibulali munshila shimwi shiinji, kubikaamo mavidyo, mabuku oonse alimwi ashimwi nshetusebensesha kumabungano. Kwiilikaawo bakabikaamo amalifalensi amu Research Guide kwaamba ayi cinooba cuubu kucana malifalensi asansulula vesi yamu Baibo.

 Bantu balacalula JW Library pashisebensesho shishika ku 8 miliyoni bushiku abushiku alimwi mweenshi uli woonse pashisebensesho shiindilila 15 miliyoni! Ino nshiinshi shiyandika, shicafwa kwaamba ayi laibulali itoolelele kusebensa kabotu pashisebensesho ishi? Mukwesu Willies wakasansulula ayi: “Ncakwiila, laibulali ya pafooni ilayandika kutolelela kwiibamba. Lyoonse tulasebenselaawo kwaamba ayi tubikeemo mbasu shipya alimwi akwaamba ayi inooba yuubu kusebensesha. Liinji shisebensesho shilaalulwa akubambululwa, aboobo aswebo lyoonse tulayandika kwaalula akubamba laibulali kwaamba ayi inoosebensa kabotu pashisebensesho ishi. Tulyeelete kutolelela kwaalula akubamba pulogilamu ya mu laibulali mukwiinga namba ya mabuku alimwi ashakulekoda shicanika mu JW Library shitooya bufulilaakobo.” Pacecino ciindi, mu JW Library mulacanika mabuku ashika ku 200,000, shakukutikakobo alimwi amavidyo akalekodwa shiindilila 600,000 kweelana amishobo yoonse mucanika laibulali iyi.

 Takuyandikibo kompyuta kwaamba ayi batolelele kwaalula akubamba laibulali iyi. Sombi kulayandika amaali ngeenga basebensesha kwaamba ayi balipile akucikonsha kusebensesha mapulogilamu amwi apakompyuta. Pulogilamu yomwibo njeenga basebensesha pamwaaka iloolwa maali amadola aku America ashika 1,500. Kwiilikaawo, basebensela pa pulogilamu ya MEPS balasebensesha maali amadola aku America ashika 10,000 pamwaaka, pashisebensesho shiswa kumakampani apusenepusene, akushinisha ayi laibulali yatolelela kusebensa kabotu pa makompyuta apya, matabuleti alimwi amafooni.

 Kusebensesha JW Library kwaceeshaako maali asebenseshekwa pakupulinta, kubamba mabuku alimwi akwaatuma. Amuyeeye pacakubonenaako comwibo, kabuku ka Kwiinduluka Mumalembo Bushiku Abushiku. Mumwaaka wa 2013 twakapulinta tubuku tushika pafwiifwi a 12 miliyoni, ano mu mwaaka wa 2020 twakapulintabo tushika ku 5 miliyoni nabi kwaamba ayi kwakalinga beshikushimikila abamwi bapya bashika ku 700,000 nsengwe yoonse. Ino nceebonshi namba ya tubuku utu twakapulintwa yakaboola panshi? Nceebo cakwaamba ayi buunji bwa bamakwesu abenankashi balasebensesha JW Library kubelenga lilembo lya bushiku. a

 JW Library ilacafwa bantu beshi kwiisebensesha munshila shiinji. Ba Geneviève bekala ku Canada balalinyumfwa ayi laibulali iyi ilabacafwa kunoocita ciiyo capalwaabo lyoonse. Bakaamba ayi: “Naakwiinga ndakalinga kulangoola mabuku akubelenga lyoonse kwaamba ayi njiiye, naakwiinga nshindakalinga kucikonsha kwiiya bushiku abushiku. Ano ceebo ca laibulali iyi, ndabwesabo tabuleti yangu ceebo cakwaamba ayi shoonse nshosuni moshili. Kwiiya lyoonse kwayumya lushomo lwangu alimwi abushicibusa bwangu a Yehova.”

 Laibulali iyi yacafwa bantu baanji bunene bunene pacecino ciindi ca bulwashi bwa COVID-19. Ba Charlyn bekala ku United States bakaamba ayi: “Ceebo cakwaamba ayi bulwashi bwa COVID-19 bwakuma cishi coonse, nshina kubonaawo kale mabuku ali oonse apya akapulintwa kwa myeenshi iinji ano. Nacibi boobo, JW Library yatucafwa kuba ashakulya shakumushimu alimwi ndalumba Yehova ceebo ca bubambo ubu.”

 Baanji balalinyumfwa mbuli ba Faye bekala ku Philippines, abo bakaamba ayi: “Ndasebensesha cisebensesho ici cibotu abuumbi kwaamba ayi ntolelele kuba pafwiifwi a Yehova. Ndasebensesha laibulali macuunsa ndyentobelenga alimwi ndakutika kumakani akalekodwa ndyentosebensa ncito shapaŋanda. Ndaisebensesha kwaamba ayi ndibambile mabungano, kucita ciiyo ca Baibo capalwaangu, kweebela mavidyo na taaku nshentoocita alimwi akubelenga makani na Baibo ndyentolindila kucita shintu shimwi. Njibotu abuumbi.”

 Laibulali iyi ncisebensesho cicafwa amuncito yakushimikila. Kucakubonenaako, nankashi umwi waku Cameroon ndyaakalinga kushimikila, wakalinga kusuni kusebensesha lilembo limwi nankashi umwi ndyaakasebensha ndyebakalinga kushimikila munsondo shiniini shaiinda. Nacibi boobo, taakalinga kucishiwo kwakucana vesi iyo. Wakaamba ayi: “Cakabota kwaamba ayi ndakeebaluka maswi amwi aliiwo. Ndakacalula laibulali, kucalula Baibo alimwi akulangoola maswi ayo. Cakufwambaana ndakalicana lilembo. Kwiinda mukusebensesha laibulali, ndacikonsha kucana mavesi aanji ayo cimwi ciindi ngoontengashili.”

 Maali ngomupa mukuliyandila kwiinda mukusebensesha nshila shicanika pa donate.pr418.com ngaasebenseshekwa kwaamba ayi tupange, kubamba alimwi akubotesha JW Library iyo bamakwesu abenankashi nsengwe yoonse njobasebensesha. Twalumba abuumbi pa mushimu wanu wa bwaabi.

1. Mu October 2013​—Kwakabambwa laibulali icite Baibo ya New World Translation yakabambululwa

2. Mu January 2015​—Mabuku amwi amu Cisungu akabikwaamo kwiilikaawo amabuku amumishobo imwi iinji

3. Mu November 2015​—Kwakabikwa lubasu lwakutala maswi

4. Mu May 2016​—Kwakabikwa lubasu lwa mabungano

5. Mu May 2017​—Kwakabikwa lubasu lwakulemba maswi

6. Mu December 2017​—Kwakabikwa Baibo yamu Cisungu iitwa ayi Study Bible

7. Mu March 2019​—Kwakabikwa lubasu lwakucita dauniloodi makani akalekodwa, kweebela mavidyo pa intaneti, alimwi alubasu lwakucana malifalensi amu Research Guide

8. Mu January 2021​—Kwakabikwa mbasu shakabambwa shamu libuku lya Amusangalale Abuumi Kwamuyayaya!