Mu January 2021, Likoto Litanjilila lyakaambilisha kuswa kwa libuku lipya licafwa kwiiya Baibo lya Amusangalale Abuumi Kwamuyayaya! a Ino mwakalinyumfwa buyani ndyemwakanyumfwa cakoolobesha ici? Ba Matthew baku Canada bakaamba ayi: “Ndakasangalala abuumbi! Alimwi ndakeendaawo kusangalala ndyendakanyumfwa makani alimwi amavidyo akalinga kusansulula libuku ncelyakabambilwa alimwi ambobakeelesha kulisebensesha. Ndakalinga kusunishishi abuumbi kulibona alimwi akutalika kulisebensesha.”

 Libuku lya Amusangalale Abuumi Kwamuyayaya! lilicite nshila shipya bwakutanjilila shiiyo sha Baibo. Nacibi boobo, ubu teshi mbobupusano bweenkabo buli pa libuku lipya alimwi amabuku akale kale ngotwakalinga kusebensesha acafwa kwiiya. Na mulasebensesha libuku lyakapulintwa lya Amusangalale Abuumi Kwamuyayaya! mulyeelete mwakabona ayi lilipuseneeko ambolinyumfwika na mwalicata. Amuleke tubone libuku ili mbolyakapangwa kwaamba ayi tushibe ncelibetele lipuseneeko.

 Mapepa atikeme. Ino nceebonshi akalinga kuyandika? Libuku lya Amusangalale Abuumi Kwamuyayaya! lilicite shikope shibotu shiindilila 600. Nshiinji kwiinda shicanika mulibuku lya Baibo Ilaiisha! Libuku ili lilicite mbasu shiinji mutalembetwe cili coonse alimwi taamuwo nabi shikope. Aboobo na lipepa kalitatikeme inga mwacikonsha kubona shikope shili kulubasu lumwi lwa lipepa. Kwaamba ayi shamushobo uyu shitacitiki, bamakwesu baku International Printing Department (IPD) ku Wallkill, New York, U.S.A.,bakeelesha mishobo ya mapepa ili 4 iyo isebenseshekwa bulya. Bamu Komiti Yabeshikulemba yamu Likoto Litanjilila bakabona mushobo wa lipepa lyomwi alyomwi akusala lipepa litatondeshi bunene shili kulubasu lumwi. Nabi kwaamba ayi lipepa ili liliduliteeko pa mapepa ngotusebensesha mumabuku amwi aanji, kusebensesha lipepa ili kulapa kwaamba ayi shikwiiya Baibo anoocikonsha kubelenga peeji ili yoonse ya libuku lya Amusangalale Abuumi Kwamuyayaya! kwakubula kupilinganishikwa ashikope na mabala ali kulubasu lumwi lwa lipepa.

 Kava icite pulasitiki ipuseneeko. Kava ya libuku lipya ili na mwaicata ilipuseneeko mboinyufwika pa makava amabuku amwi, mukwiinga yalo bakaimatika pulasitiki ipuseneeko. Muciindi cakusebensesha pulasitiki ibeeka, bakasebensesha itabeeki kwaamba ayi cikope cili pa kava cinoobonekesha. Pulasitiki iyi ilacafwa kwaamba ayi libuku litanyonyooki bwangu ceebo cakulisebensesha bunene. Nacibi boobo, muulo wa pulasitiki iyi uleendawo mankanda 5 pa pulasitiki itabeeki. Aboobo misampi iinji bakasebensela pomwi kwaamba boole pulasitiki iyi pamutengo ucipiteeko.

 Ino nceebonshi kwakaba kusala kusebensesha shintu shidulite abuumbi? Mukwesu usebensela ku IPD wakaamba ayi: “Tutolangila kwaamba ayi libuku ili lilaakusebenseshekwa kabotu, aboobo tulisuni ayi litolelele kunoboneka kabotu nabi kwaamba ayi lyasebenseshekwa kwaciindi cilaamfu.” Ba Eduardo basebensela ku Ofesi Ilanga Pamakani Akupulinta yaku musampi waku Brazil, bakaamba ayi: “Tulisangalete abuumbi kubona libunga lyakwe Yehova mbolyakasebensesha shintu shibotu kwaamba ayi libuku ili linoboneka kabotu, kwakubula kunyonyooka bwangu alimwi kacuuba kulisebensesha, akusebensesha kabotu maali apekwa mukuliyandila.”

 Mu March 2021 twakatalika kupulinta libuku lya Amusangalale Abuumi Kwamuyayaya! Paciindi ici cakalinga ciyumu kusebensa ncito iyi ceebo cabulwashi bwa COVID-19. Ceebo ca bulwashi ubu, taakuwo wakalinga kusuminishikwa kunjila nabi kuswa pa Bethel, aboobo taakuwo basebenshi batekali pa Bethel bakalinga kusuminishikwa kusa mukucafwilisha pa Bethel anciito yakupulinta nabi kwiita bamakwesu bapya kusa mukusebensa mbuli basebenshi bapa Bethel. Aboobo mamashini amwi eshi kupulinta taakalinga kuciteewo basebenshi bakwasebensesha, alimwi bamwi bakakashikwa kusa mukusebensa ceebo ca milawo yashakukasha mfulumende njeyakabika.

 Ino mapensho aya twakaakoma buyani? Incito yakupulinta iyi ndyeyakatalika, bamakwesu abenankashi bakuma dipatimenti amwi bakalwiitikwa ayi bacafwilishe ncito iyi kwakaciindi. Ba Joel basebensela ku IPD bakaamba ayi: “Ceebo ca mushimu wabo wakulyaaba alimwi akusuna kwiiya ncito shipya, cakapa kwaamba ayi tucikonshe kukumanisha ncito iyi iyandika.”

 Nabi kwaamba ayi cakalinga ciyumu, twakacikonsha kupulinta mabuku aanji a Amusangalale Abuumi Kwamuyayaya! Kwaamba ayi mabuku aya apangwe, kwakalinga kuyandika shintu shiinji mbuli mapepa, inki, gulu alimwi a pulasitiki yakumatika pakava. Ndyepakeendabo myeenshi 5 kuswa ciindi incito yakupulinta ndyeyakatalika, kwakasebenseshekwa maali amadola aku America eendilila 2.3 miliyoni kuulabo shakusebensesha kupanga mabuku. Kwaamba ayi tutanyonyooli maali aanji, tulapulintabo mabuku atoyandika kumabungano.

 Ino beshikushimikila alimwi abeshikwiiya Baibo balalinyumfwa buyani pa libuku ili lipya licafwa kwiiya Baibo? Mukwesu waliina lya Paul ukala ku Australia wakaamba ayi: “Ndanyumfwa kabotu kusebensesha libuku lya Amusangalale Abuumi Kwamuyayaya! alimwi ndasangalala kutanjilila shiiyo sha Baibo kusebensesha libuku ili. Libuku ili lyakabambwa kabotu cakwaamba ayi lilapa muntu kusuna kwiiya alimwi akubandikishanya. Lilicite makani abotu abuumbi atashuupi kunyumfwisha, miipusho ishika pamoyo, mavidyo, shikope, macaati, alimwi ansheenga shikwiiya wacita. Libuku ili mbolyakabambwa lyancafwa kuya panembo mukwiisha kwangu.”

 Shikwiiya Baibo ukala ku United States wakaamba ayi: “Ndilisuni abuumbi libuku lipya. Shikope shilancafwa kunyumfwisha shiteente shinene. Mavidyo alanshika pamoyo akumpa kwaamba ayi ncitewo comwi.” Shikwiiya Baibo uyu aleeya mankanda obilo mu nsondo alimwi alacanika kumabungano lyoonse.

 Mabuku aanji a Amusangalale Abuumi Kwamuyayaya! acipulintwa mumishobo iinji. Alimwi pacecino ciindi Likoto Litanjilila lyakasuminisha kwaamba ayi libuku ili lisansululwe mumishobo ili 710. Nkokwaamba ayi kwakasuminishikwa mishobo aimwi ili 340 kwiilika pamishobo yakasuminishikwa kusansulula libuku lya Baibo Ilaiisha!

 Ino maali ngotusebensesha kwaamba ayi tupulinte alaswa kuli? Tulasebensesha maali apekwa mukuliyandila kucafwilisha ncito ya nsengwe yoonse alimwi aanji alapekwa kwiinda mukusebensesha nshila shicanika pa donate.pr418.com. Tulalumba abuumbi pa maali ngomupa ayo atucafwa kupanga mabuku acafwa kwiiya Baibo kwaamba ayi abacaafwe abo basuni kwiiya pali Yehova, ‘akusangalala abuumi kwamuyayaya.’—Kulumbaisha 22:26.