Bakamboni Bakwe Yehova balasebensa ncito iyandika abuumbi yakucafwa bantu mushishi shiindilila 200. Sombi Bakamboni Bakwe Yehova bekala mushishi shilibo 35, mbobacikonsha kupa maali akucafwilisha ncito iyi mushishi shinemishaabo. Ino maali ayandika kucafwilisha ncito iyi alaswa kuli mushishi mobatacikonshi kupa maali akwene?

 Bamu Likoto Litanjilila balabona shitoyandika Bakamboni Bakwe Yehova kwaamba ayi batolelele kulambila Yehova akusebensa ncito yakushimikila makani abotu nsengwe yoonse. Maali alasebenseshekwa kabotu. Na musampi watambula maali aanji kwiinda aayo atoyandika, maali eendililaawo alatumwa kushishi shimwi shicite maali aniini. Bubaambo ubu buleendelana ashakacita Beneklistu bakutaanguna abo bakacafwa bamwi kwaamba ayi kube ‘kweelana.’ (2 Bene Kolinto 8:14) Bakasebensesha maali akeendililaawo kucafwa Beneklistu bakalinga kucite maali aniini.

 Ino bamakwesu batambula maali kuswa kumisampi imwi balalinyumfwa buyani? Kucakubonenaako ku Tanzania, bantu baanji balababo amadola obilo aku America akuula shiyandika pabushiku. Bakasebensesha maali aswa kumisampi imwi kubamba Ŋanda ya Bwaami iyo yakalinga kusebenseshekwa alibungano lya Mafinga. Libungano lyakalemba ayi: “Kuswabo ciindi Ŋanda ya Bwaami ndyeyakayakwa, bantu baanji balacanikaako kumabungano! Tulalumba Yehova alimwi abamakwesu abenankashi nsengwe yoonse, ceebo camushimu wabo wabwaabi, ico capa kwaamba ayi tube amusena ubotu abuumbi wakubunganinaamo.”

 Bamakwesu bamwi kucishi ca Sri Lanka tabaciteewo shakulya shikwene kabotu ceebo cabulwashi bwa COVID-19. Ba Imara Fernando alimwi a mwanaabo musankwa Enosh, bali pabaabo batacitewo shakulya. Nacibi boobo, ceebo camaali akaswa kushishi shimwi, bakapekwa lucafwo ndobakalinga kuyandika. Bakalemba pakaadi njobakapanga ayi: “Twalumba abuumbi kubamakwesu bakatutondesha lusuno pacecino ciindi shintu ndyeshibete shiyumu. Tulisangalete abuumbi kuba lubasu lwa mukwashi uyu alimwi tutotolelela kupaila kwaamba ayi Yehova anoocafwa bamakwesu abenankashi boonse munshiku shino shakweelaako.”

 Tacicite mulandu amusena bamakwesu abenankashi nkobakala, balalyaaba kucafwako bamwi ashintu nshebacite. Kucakubonenaako, Enosh wakapanga kabokosi kwaamba ayi anoobikaamo maali akucafwilisha mikwashi itacite shiyandika. Ba Guadalupe Álvarez abalo balatondesha mushimu wabwaabi. Balekala kumusena kumwi ku Mexico uko bantu baanji nkobafolabo maali aniini alimwi nkobatabiiwo a maali lyoonse. Sombi balapako maali ngeenga bacikonsha. Bakalemba ayi: “Ndalumba Yehova ceebo ca bubotu bwakwe alimwi alusuno lwakwe lutamaani. Ndicishi kwaamba ayi maali ngoompa alaakubikwa pomwi aayo apa bamwi kwaamba ayi akasebenseshekwe kucafwa bamakwesu babulishite.”

 Misampi iba amaali eendililaawo, mukuliyandila ilatuma maali ayo kumisena kutoyandika lucafwo. Ba Anthony Carvalho basebensela mukomiti yamusampi ku Brazil, bakaamba ayi: “Kwamyaaka iinji, twakalinga kuyandika lucafwo lwa maali kuswa kushishi shimwi kwaamba ayi tucikoonshe kusebensa ncito yesu mucishi cesu. Ceebo calucafwo ulu incito ya Bwaami yakaya panembo abuumbi. Pacecino ciindi tulabaako amaali eendililaawo, aboobo tulicite coolwe cakucafwako bamwi. Bamakwesu ku Brazil balabona ncito yakushimikila mboitokweenda nsengwe yoonse alimwi ambweenga bacafwilisha.”

 Ino nshiinshi Bakamboni Bakwe Yehova nsheenga bacita kwaamba ayi bacafwe bashominyinaabo babulishite? Inga bacita boobo kwiinda mukupa maali akucafwilisha ncito ya nsengwe yoonse, kuteshi kutuma maali ku musampi wakucishi cimwi. Inga bapa maali ayo kwiinda mukubika mukabokosi kali mu Ŋanda ya Bwaami kalembetwe ayi ancito ya nsengwe yoonse na kusebensesha donate.pr418.com. Tulalumba abuumbi pamaali oonse ngomupa.