Njashi Yamulindilishi yamu June 1, 1912 yakaamba ayi: “Mpashi buunji bwabaabo babelenga mabuku esu, kuli boofu mbobeshi. Aboobo inga babwesa mabuku akubelenga kwakubula kulipila . . . . Libuku ili lya boofu lyakapulintwa mumabala ngeenga boofu babelenga.” Njashi Yamulindilishi yakeelikaawo akwaamba ayi: “Boofu baanji balalumba abuumbi pamakani akwaamba ayi pacishi capanshi palaakuba shoolwe shibotu.”

 Maswi aya ndyaakalembwa, shishi shipusenepusene shisebensesha mushobo wa Cisungu shakalinga kucite mabala aboofu apusenepusene. Nacibi boobo, Bakamboni Bakwe Yehova kabali bakatalika kale kulemba cancine camu Baibo mumabala aboofu. Twatolelela kucita boobo kushika apacecino ciindi. Alimwi mabuku aboofu alacanika mumishobo iindilila 50. Ino tulapanga buyani mabuku aboofu?

 Cintu cakutaanguna pakupanga mabuku aboofu, nkwaalula maswi akwaabika mumabala aboofu. Ba Michael Millen, basebensa mu Text Processing Services ku Patterson, New York bakaamba ayi: “Kale kale, twakalinga kusebensesha pulogilamu yakapangwa akampani imwi kwaamba ayi twaalule maswi akwaabika mumabala aboofu, ano tayakalinga kucikonsha kupanga mabala aboofu mumishobo yoonse njetwakalinga kusuni. Sombi pacecino ciindi tulasebensesha Watchtower Translation System itucafwa kupanga mabala aboofu mumishobo iinji isebenseshekwa nsengwe yoonse. Ndishomete ayi taakuwo pulogilamu ili mbuli yeeyi.”

 Mabuku aboofu taeelete kubabo amabala sombi amaswi asansulula shikope. Kucakubonenaako maswi ali pacikope cili papeeji yakutaanguna ya libuku lya Amusangalale Abuumi Kwamuyayaya! lili mumushobo wa boofu, alilembetwe ayi: “Musankwa atooya ceenda munshila muli shishango shibotu, shuulu alimwi atulundu.” Jamshed, moofu usebensa mbuli musebenshi ucafwilisha alimwi painiya, wakaamba ayi: “Maswi aya asansulula shikope alayandika abuumbi kuli ndime.”

 Pesule lyakwaalula maswi akwaabika mumabala aboofu balaatuma kumisampi ipanga mabuku aboofu. Kumaofesi aya amisampi, mabala aboofu alapulintwa palipepa liyumu, litakonshi kutuluka na kukokonyana ndyebatopulinta. Kuswawaawo, balabika mapeeji ayo pomwi, kwacatanya alimwi akwaatuma kumabungano pomwi a mabuku amwi ngobatuma lyoonse. Alimwi balatumina baku post office na abalo batoyandika mabuku aboofu. Na kaciyandika, misampi ilabika abubambo bwakwaamba ayi mabuku aboofu atumwe cakufwambaana kwaamba ayi bamakwesu abenankashi boofu bakabe amabuku ayandika akusebensesha kumabungano ansondo ansondo.

 Incito yoonse iyi ilayandika kusebensa ciindi cilaamfu akusebensesha maali aanji. Alimwi kumusena nkobapulintila mabuku ku Wallkill, New York, ciindi nceenga batola kupulinta ma Baibo ali 50,000 ateshi aboofu, nceciindi ncebatola kupulinta ma Baibo obilo aboofu. Baibo yomwi ayomwi ili mumabala aboofu eetwa English braille ilicite mavolyumu ali 25 alimwi shintu shiyandika pakupanga mavolyumu ama Baibo aya shilidulite abuumbi kwiinda sheesho shiyandika pakupanga ma Baibo ateshi aboofu. Shintu shisebenseshekwa kupanga mapepa apansengwe amavolyumu 25 aya shiloolwa maali amadola ashika ku 150.

 Ino abo bacafwilisha pakupanga mabuku aboofu balalinyumfwa buyani pancito njobasebensa? Ba Nadia basebensela kumusampi waku South Africa, bakaamba ayi: “Buumi mbuyumu kubamakwesu abenankashi boofu. Aboobo ndabona ayi coolwe kwiinda mukupanga cintu ceenga cabacafwa. Ncitondesho cakwaamba ayi Yehova alibasuni abuumbi.”

 Ano ino mbuyani na moofu tacikoonshi kubelenga mabala aboofu? Myaaka iniini yaiinda, twakapanga libuku licite mutwi waamba ayi Learn to Read Braille. Libuku ili lilicite mabala aboofu alimwi amaswi akapulintwa. Lyakabambwa munshila yakwaamba ayi muntu ulasha kabotu alimwi a moofu inga balisebensesha kabali pomwi. Libuku ili lilicite ashisebensesho nsheenga moofu wasebensesha pakulemba mabala aboofu. Utokwiiya alasebensesha shisebensesho ishi kwaamba ayi alembe mabala aboofu palwaakwe mwiine. Kucita boobo kulacafwa utokwiiya kwiibaluka libala lyomwi alyomwi lilembwa mumabala aboofu alimwi akumucafwa kushiba bwakubelenga mabala aboofu kwiinda mukusebensesha shikumo.

 Ino mabuku aya aboofu, acafwa buyani bamakwesu abenankashi boofu? Ba Ernst bekala ku Haiti, bakalinga kucanika kumabungano sombi tabakalinga kucitewo libuku nabi lyomwi lya boofu. Aboobo na balicite lubasu lwa shikwiiya bakalinga kweelete kulabilila nshobakalinga kusuni kwaamba alimwi akulabilila shikumbulo na kuli lubasu lwa kwiipusha akukumbula miipusho. Bakaamba ayi: “ Ano pacecino ciindi inga ndatambika lyaansa akukumbulawo ciindi cili coonse. Ncakwiila, ndalinyumfwa ayi tulicatene mbuli bamakwesu abenankashi. Soonse tulatambula makani antu omwi ayuminisha kuswa kuli Yehova.”

 Ba Jan mboofu bekala mucishi ca Austria, nacibi boobo mbanene mulibungano alimwi balatanjilila Ciiyo ca Njashi Yamulindilishi a Ciiyo ca Baibo Calibungano. Bakaamba ayi: “Mabuku esu aboofu ngoobu kwiinda mabuku amwi aboofu. Kucakubonenaako, alicite mapeeji acite manamba, maswi amweela oobu kucana alimwi abusansulushi bwashikope bwancine.”

 Ba Seon-ok, basebensa mbuli bapainiya mboofu alimwi mbacibulu bekala ku South Korea. Munshiku shakwisule bakalinga kucafwikwa abamwi kumabungano, ano pacecino ciindi balacikonsha kubelenga mabuku aboofu aamba shamu Baibo palwaabo beene. Ba Seon-ok bakaamba ayi: “Mabuku amwi aboofu ngayumu kubelenga mukwiinga tamubiiwo mabala amwi, maswi talembetwe kabotu na lipepa ndiniini abuumbi. Sombi Bakamboni Bakwe Yehova balasebensesha mapepa abotu abuumbi alimwi mabala alilembetwe kabotu aboobo ncuubu kuli ndime kubelenga.” Bakeelikaawo akwaamba ayi: “Kale kale, ndakalinga kubelenga mabuku aamba shamu Baibo kwiinda mukucafwikwa abamwi. Ano pacecino ciindi ndeeya palwaangu neenka. Ndikondetwe kwaamba ayi ndacikonsha kulibambila mabungano ansondo ansondo alimwi akwaabanamo lubasu. Ndabelenga mabuku oonse aboofu ngotucite. Alimwi ndyaasuni abuumbi mabuku aya.”

 Bweenka mbuli mabuku esu apulintwa lyoonse, mabuku aboofu alicite lubasu lulembetwe ayi: “Libuku ili teshi lyakuulisha. Ndubasu lwa ncito yakwiisha Baibo icitwa nsengwe yoonse, icafwilishikwa amaali apekwa mukuliyandila.” Tulalumba abuumbi pa maali aya ngomupa mukuliyandila kwiinda mukusebensesha nshila shicanika pa donate.pr418.com. Mushimu wanu wabwaabi ulapa kwaamba ayi tunopanga mabuku aamba shamu Baibo ngeenga bantu boonse babelenga kwiilikaawo aboofu alimwi abacibulu.