Nankashi wacanike waku Colombia wa liina lya Nicole wakaamba ayi: “Ndiisuni abuumbi Ŋanda yesu ya Bwaami! Mukwiinga ndaba pomwi abamakwesu abenankashi.” Sa andimwe mbomulinyumfwa?

 Bakamboni bakwe Yehova balabungana mu Maanda Abwaami ashika kuma 63,000 cishi coonse. Maanda Abwaami aya alapa kwaamba ayi tumulambile kabotu Lesa. Sombi alasebenseshekwa amunshila shimwi. Ba David bapainiya baciindi coonse baku Colombia bakaamba ayi: “Kuboneka kabotu kwa Maanda esu Abwaami kulapa kwaamba ayi bantu basune kukutika makani ngotushimikila. Baanji balakankamana kubona Maanda esu Abwaami mbotwalama kabotu.” Tulasebensa cankusu kubotesha akulama kabotu Maanda Abwaami. Ino tulacikonsha buyani?

 Mabungano asebensesha Ŋanda ya Bwaami mbobacite mukuli wa kwiibotesha. Aboobo lyoonse bamakwesu abenankashi baleebotesha akwiilama kabotu. Kwiilikaawo, balabambulula ambasu shimwi shinyonyooka.

 Kwaamba ayi mabungano acikoonshe kulama kabotu Maanda Abwaami, ba Local Design/Construction Department (LDC) balasala bamakwesu beeisha bamwi mulibungano bwakulama Maanda Abwaami. Shikwiisha womwi awomwi aleeisha mabungano ashika ku 6 na 10. Alaya mukubafwakashila mumabungano akwiisha beshikushimikila bwakulama kabotu Ŋanda ya Bwaami. Na peenda myaaka yotatwe alaya mukubona Ŋanda ya Bwaami yomwi ayomwi akubona mutoyandika kubambulula.

 Bamakwesu abenankashi balalumba pa lwiiyo ndobeeishikwa kubeshi kubeeisha. Nankashi ukala ku India wa liina lya Indhumathi wakaamba ayi: “Twakeeya shintu shibotu. Ndakasangalala kwiiya bwakulama kabotu Ŋanda yesu ya Bwaami.” Mukwesu wa liina lya Evans waku Kenya, wakaamba ayi: “Twakeeya bwakusebensesha kabotu maali kwiinda mukutalikila kubamba mbasu shiniini niini shanyonyooka kashitana kukomenenaako.”

 Mwaaka amwaaka maali asebenseshekwa kulama Ŋanda ya Bwaami inga aba aniini na aanji abuumbi kweelana a Ŋanda ya Bwaami nkweenga kaibete a, kufula kwa myaaka njeyakala, alimwi akufula kwa mabungano aisebensesha. Ino maali alasebenseshekwa buyani?

 Maanda Abwaami alalamwa kwiinda mumaali apekwa mukuliyandila. Mukwesu wa liina lya Alexander ukala ku Kazakhstan, wakaamba ayi: “Maali amwi alasebenseshekwa kwaamba ayi tucikonshe kuba a intaneti alimwi ashintu shimwi mbuli maanshi amalaiti. Maali amwi alasebenseshekwa kuula shintu shimwi shiyandika mbuli twakulipukutisha kumaansa, magulovu, ashakusebensesha pakubotesha alimwi a peenti.” Lyalo maali amwi acalaawo alapekwa ku ncito yansengwe yoonse kwaamba ayi asebenseshekwe kubamba misena inene yakubunganinaamo kushinguluka nsengwe yoonse.

 Na Ŋanda ya Bwaami itoyandika kubambululwa inga yatola maali aanji kwiinda aayo ngobasebensesha bamakwesu abenankashi kwiilama mu myeenshi yobilo na yotatwe, bamanene baleepusha wiisha bwakulama Ŋanda ya Bwaami usebensa aba LDC. Na ba LDC basuminisha ayi inga yabambululwa, maali akucafwilisha ncito yansengwe yoonse ngaasebenseshekwa kwiibambulula. Mumwaaka wancito wa 2023, kwakasebenseshekwa maali amadola ashika ku 76.6 miliyoni kwaamba ayi Maanda Abwaami ashika ku 8,793 amane kubambululwa. Amuleke twaambe pa Maanda Abwaami obilo akabambululwa.

 Ku Angola, Ŋanda ya Bwaami yekala myaaka 15 yakalinga kucite mbasu shiinji shakanyonyooka. Intambo alimwi asha malaiti shimwi shakalinga kuyandika kukushikwa akubika shimwi, lubumbu lwakalinga kucite myaasha, alimwi bantu bakala kufwiifwi a Ŋanda ya Bwaami bakaamba ayi na mfuula yaloka maanshi akalinga kukunkila ku maanda abo. Ba LDC bakabika bubaambo bwakuya mukumanisha mapensho aya. Incito iyi yakatola maali amadola ashika ku 9,285. Bantu bakala kufwiifwi a Ŋanda ya Bwaami iyi bakalumba, alimwi bakasangalala kubona ncito iyi mboyakacitwa.

 Ku Poland, ciluli ca Ŋanda ya Bwaami cakalinga kulosha maanshi, alimwi kapeti yakanyonyooka cakumaninina. Ba LDC bakasuminisha ayi ciluli cibambululwe akubikamo kapeti imwi. Kwaamba ayi ba bambulule bakasebensesha maali amadola ashika ku 9,757. Aboobo Ŋanda ya Bwaami iyi teshi ikayandike kubambululwa conoono mumyaaka itoosa kunembo.

 Kulama kabotu Maanda Abwaami takupibo kwaamba ayi tusebenseshe maali aniini sombi kulapa akwaamba ayi Yehova alumbaishikwe. Mukwesu wa liina lya Shaun ukala ku Tonga, wakaamba ayi: “Ceebo cakwaamba ayi Ŋanda yesu ya Bwaami ilalamwa kabotu, tulalambila Yehova mumusena wabuuya, alimwi uli kabotu ico cipa kwaamba ayi bantu bamwi mumushi balumbaishe liina lyakwe Lesa. Alimwi tulanyumfwa kabotu kwiita bantu kumabungano.”

 Soonse inga twaabanamo lubasu mukubotesha akulama kabotu misena njetulambililaamo. Ba Marino beshikwiisha bwakulama kabotu Maanda Abwaami baku Australia, bakaamba ayi: “Soonse inga twaabanamo lubasu muncito ibotu yakulama Maanda esu Abwaami. Kucita boobo kulapa kwaamba ayi tunosebensesha kabotu maali akwaasebensesha nkwatoyandika bunene.”

 Mukwesu wa liina lya Joel waku lndia, alasangalala kulama kabotu Ŋanda ya Bwaami inemishaabo. Wakaamba ayi: “Kusebensela pomwi abamakwesu kulampa kuyeeyela mbweshi cikabe mucishi cipya.” Ba Nicole, mbotwalinga twaambawo bakaamba ayi: “Coonoono ndakaabanamo lubasu mukukolopa, bamakwesu ndyebakalinga kubamba toileti. Nabi kwaamba ayi teshi ndime ndakabamba toileti, ndakacafwilisha kupa kwaamba ayi umwi ataliciisi.”

 Na mulisuni kucafwilisha kubotesha Ŋanda ya Bwaami, amubandike abamanene bamulibungano linemishaanu. Kwiilikaawo, maali ngomupa mukuliyandila alacafwilisha kubamba Ŋanda yanu ya Bwaami alimwi Amaanda Abwaami amwi nsengwe yoonse. Inga mwapa maali aya kwiinda mukubika mutubokoshi mwakubika maali tucanika mu Ŋanda ya Bwaami na kusebensesha donate.pr418.com. Tulalumba abuumbi pa bwaabi bwanu.