Yehova alisuni kwiisha bantu bakwe. Nceceeco, libunga lyakwe lyakabika bubaambo bwa shikolo shipusenepusene shakucafwa beshikwiiya kushiba bwakusebensa ncito njobapekwa. Cikolo comwi pa shikolo ishi , Ncikolo ca Bashimikila sha Bwaami na SKE. Myaaka iniini yainda libunga lyakwe Yehova lyakabikila maano kuteshibo kumakani akwiisha, sombi amisena mubeta shikolo ishi. Luyaando lunene ndwakwaamba ayi kube misena ibotu yeenga yapa kwaamba ayi cibe cuubu kwiisha alimwi akwiiya. Ano ino maali ngomupa alatucafwa buyani kukumanisha luyaando ulu?

 Kwa myaaka iinji shikolo ishi shakalinga kubeta mu Maanda a Bwaami alimwi amumisena motucitila Kubungana Kunene. Ino nceebo nshi myaaka iniini yainda twakayaka misena imwi na kubambulula misena aimwi yakwaamba ayi inosebensabo kucitilamo shikolo? Amubone sheebo shotatwe shitokonkelaawo.

 Kutoyandika basebenshi baanji. Ba Christopher Mavor beshikucafwilisha mu Komiti ya Ncito ya Likoto Litanjilila bakaamba ayi: “Bamu maofesi amisampi bakatulwiita ayi batoyandika bamakwesu abenankashi baanji bakusebensa ncito mumusena wakushimikilaako. Kucakubonenaako, mu 2019, baku musampi waku Brazil bakaamba ayi kutoyandika bamakwesu abenankashi abamwi bakamanisha Cikolo ca Bashimikila sha Bwaami bashika pafwiifwi a 7,600 kwaamba ayi basebensele mumisena ibulishite. Baku musampi waku United States bakaamba ayi kutoyandika bapainiya beenga bacikonsha kwiisha bamwi bwakushimikila mumatauni mucanika bantu baanji, kushimikila bantu bacanika kwiitala lya milonga, alimwi akushimikila kujeele. Kutoyandika abamakwesu bakamanisha Cikolo ca Bashimikila sha Bwaami bakusebensa mu Dipatimenti ya Ncito Shakuyaka na Local Design/Construction Department (LDC) alimwi abakusebensa mu Makomiti Alanga Pamakani Akucipatela na Hospital Liaison Committees (HLC).

 Kufula kwa baabo basuni kunjila cikolo. Mu misampi iinji bakatambula mafoomu aanji abaabo basuni kunjila cikolo akeendilila namba ya baabo mbeenga basumina ayi batalike cikolo. Kucakubonenaako, ku musampi waku Brazil bakatambula mafoomu ashika 2,500 abaabo basuni kunjila Cikolo ca Bashimikila sha Bwaami mumwaka omwibo. Ceebo cakubula misena iinji mwakucitila cikolo ici, baku musampi bakeetabo beshikwiiya bashika 950.

 Maanda abotu mwakukala. Na cikolo cabeta ku Ŋanda ya Bwaami nabi musena kucitilwa Kubungana Kunene, liinji beshikwiiya balakala mumaanda abamakwesu bakumusena uko. Bubambo ubu bulasebensa kabotu mushishi mutabi shikolo shiinji shicitwa mumwaaka. Sombi mushishi umo muba shikolo shiinji mumwaaka, bamakwesu bekala kumusena kubeta cikolo inga tabacikonshi kulama beshikwiiya kwa myeenshi iinji mumwaaka. Aboobo maanda mwakukala beshikwiiya alayakwa pafwiifwi amusena kubeta cikolo.

 Kuyaka mwakucitila cikolo, alimwi amaanda mwakukala beshikwiisha alimwi abeshikwiiya bashika pafwiifwi a 30 kwiilikaawo ashintu shimwi shiyandika, inga shatola maali amadola aku America aanji abuumbi kweelana amusena ashintu shimwi shiilikitweemo.

 Misena mwakucitila shikolo liinji ilayakilwa kulaale a tauni inene sombi tilansipoti nkoitashuupi. Alimwi misena iyi ilayakilwa kumisena kuli bashikushimikila baanji beenga bacafwilisha kwaamba ayi cikolo cinokweenda kabotu alimwi akulama misena na shintu shisebenseshekwa.

 Misena mucitilwa shikolo mulaba ma laibulali amabuku, mwakubelengela, makompyuta, mapulinta alimwi ashimwi shakusebensesha. Alimwi liinji kulaba cipinda mwakulita umo bali mucikolo alimwi abeshikwiisha mobalita pomwi. Kulaba amusena unene nkobeshi kucitila shiyumya mubili alimwi akwakookeshela.

 Alimwi cimwi ncetubikilako bunene maano nkubamba kabotu misena mwakucitila cikolo. Ba Troy basebensa mu Dipatimenti ya Worldwide Design/Construction ku Warwick, New York bakaamba ayi: “Twakeepusha bamu Dipatimenti Ilanga pa Shikolo sha Bwaami kwaamba ayi batucaafwe kubona mbweenga twayaka musena mwakucitila cikolo kwaamba batokwiiya inga kacibabeta cuubu kwiiya. Bamakwesu bakatupa makani akatucafwa kushiba musena mwakucitila cikolo mbowakalinga kweelete kukomena, mbowakalinga kweelete kuyakwa, malaiti akalinga kweelete kubikwaamo, alimwi ashimwi shakusebensesha kweebela mavidyo.” Kulansha pamakani a shakusebensesha mbuli masupika amamaiki, ba Zoltán beshikwiisha bamu Cikolo ca Bashimikila sha Bwaami ku Hungary, bakaamba ayi: “Kumatalikilo tetwakalinga kuciteewo mamaiki, aboobo twakalinga kulwiita bali mucikolo kwaambisha pakukumbula. Ano pacecino ciindi lipenshi lya mamaiki lyakamana mukwiinga pa cuuna comwi acomwi palaba maiki!”

 Ino misena ibotu yakucitilamo shikolo yakayakwa yakabacafwa buyani beshikwiiya alimwi abeshikwiisha? Ba Angela abo bakacanika ku Cikolo ca Bashimikila sha Bwaami na SKE ku Palm Coast, Florida, U.S.A. bakaamba ayi: “Ngumusena ubotu abuumbi kutaaku coongo. Shintu shoonse shakabambwa kabotu, kwiilikaawo amotucitila cikolo, alimwi ashipinda motoona kwaamba ayi tunoobikila maano kukubelenga alimwi akwiiya.” Ba Csaba baku Hungary beshikwiisha baabo bali mucikolo bakaamba ayi balanyumfwa kabotu kwaamba ayi balaba acoolwe cakulita pomwi abaabo bali mucikolo. Bakaamba ayi paciindi mbuli ceeci “beshikwiiya balaanguluka kutulwiitako shiinji pa buumi bwabo alimwi a shakabacitikila mubuumi. Ici cilatupa coolwe cakubashiba kabotu bashikwiiya. Alimwi ici cilatucafwa kushiba mbweenga twabeeisha kweelana a nshebatoyandika”

 Beshikwiiya alimwi abeshikwiisha balabona ayi misena ibotu yakayakwa ayi munocitilwa shikolo, ncoolwe kuswa Kumufundishi Winditeewo, Yehova. (Isaya 30:20, 21) Nankashi waku Philippines uyo wakacanika ku Cikolo ca Bashimikila sha Bwaami na SKE ico cakabeta ku musena wakabambululwa kwaamba ayi munoocitilwa shikolo, wakaamba ayi: “Musena kwakucitila cikolo ici wakatucafwa kushiba ayi tetwakalingabo bashikwiiya sombi alimwi twakalinga beensu bakwe Yehova balibetele. Alisuni kwaamba ayi tunosangalete pakwiiya Maswi akwe cakubikila maano.”

 Cilakonsheka kuyaka, kubambulula na kubotesha Misena mwakucitila shikolo sha Bwaami ceebo ca maali ngomupa mukuliyandila. Alimwi aanji alapekwa kwiinda mukusebensesha donate.pr418.com na tubokoshi twakubikamo maali. Twalumba abuumbi pa bwaabi bwanu.