Nyiimbo ncipo cibotu kuswa kuli Yehova. Inga shakuma mbotuyeeya, mbotulinyumfwa alimwi akutuyuminisha. Ncakutatoonsha kwaamba ayi ubu mbocibete anyimbo shesu shilibetele. Alimwi nyiimbo ishi inga shatusenya pafwiifwi a Yehova.

 Kuswabo mu 2014, inyimbo shiindilila 70 shakapangwa alimwi lwiimbo lomwi panyiimbo ishi luli mumishobo iindilila 500! Ano mpashi mwakaliipushawo kale ayi: ‘Ino mbaani basebensela panyiimbo ishi, alimwi ino shilapangwa buyani?’

 Inyimbo shilibetele shilapangwa a likoto lya bamakwesu abenankashi beshikupanga nyiimbo basebensa mu Audio/Video Services alimwi balakonkela butanjilishi bwa bamu Komiti Yakwiisha ya Likoto Litanjilila. Mulikoto ili lya beshikupanga nyiimbo mulacanika bamakwesu abenankashi bali 13 abo bacafwa kulemba nyimbo, kulekoda akwiimba, kupanga milongo iyandika alimwi ashimwi. Kwiilikaawo, bamu Komiti Yakwiisha bakasuminisha basebenshi beshikulyaaba basebensela kuŋanda kwaamba ayi banoocafwilisha muncito iyi. Ishi shileelikaawo beshikulemba nyimbo alimwi abeshikwiimba. Cakuliceesha bamakwesu abenankashi aba balasebensesha lushibo lwabo alimwi tabalangili kulumbaishikwa kuswa kubamwi.

 Ino lwiimbo lulibetele lulapangwa buyani? Cakutaanguna, bamu Komiti Yakwiisha balasala Malembo akusebensesha pakupanga lwiimbo alimwi ambweshi lukakume beshikukutika. Lyalo bamu likoto lya beshikupanga nyiimbo balasala beshikulemba maswi amu nyiimbo alimwi akululekoda. Kuswawaawo, bamu Komiti Yakwiisha baleenduluka mulwiimbo ulo lwalekodwa akubona mbasu sheenga shaalulwa. Lyalo bamu likoto lya beshikupanga nyiimbo balalubambulula akululekoda alimwi. Inyimbo ishi shilalekodwa mumisena ipusenepusene mbuli kumaofesi amisampi alimwi amumaanda abantu bacite shisebensesho shakulekodela.

 Bamakwesu balasebensesha mapulogilamu apakompyuta apusenepusene kwaamba ayi balembe akulekoda nyiimbo shilibetele. Alimwi balayandika ashisebensesho shakusebensesha pakwiimba mbuli masipika, mamaikilofooni, ma ampulifaya ashimwi. Maikilofooni yomwi inga yoolwa maali amadola aku America atalikila pa 100 kushika ku 1,000 na kwiindaawo. Mu 2020 twakasebensesha maali amadola aku America ashika 116,000 kuula shakusebensesha pakulekoda nyiimbo.

 Ino tulacita buyani kwaamba ayi tusebenseshe kabotu maali apekwa mukuliyandila? Tulasebensesha basebenshi baanji bakalyaaba basebensela kuŋanda muciindi cakuba alikoto linene lya beshikwiimba pa Bethel. Alimwi bamakwesu balasebensesha mapulogilamu apakompyuta kwaamba ayi bapange lwiimbo mbolweelete kulila muciindi cakwaamba ayi beshikwiimba boonse baye balekodelwe pomwi.

 Bamakwesu abenankashi balasuna kukutika ku nyiimbo shilibetele. Ba Tara bekala ku Germany bakaamba ayi: “Inyimbo shilancafwa kukalikana mumoyo na ndalisukama. Kukutika kunyimbo ishi mumushobo winemisheesu kulampa kulinyumfwa anga Yehova wankumbata.” Mukwesu waliina lya Dmitry ukala kucishi ca Kazakhstan wakaamba ayi: “Ndanyumfwa kabotu kukutika kunyimbo ishi alimwi nshilisukamiwo mukwiinga shileendelana anjiisho shamu Baibo. Kwiilikaawo, shilancafwa kubikila maano kubushicibusa bwangu a Yehova.”

 Ba Delia bekala ku South Africa bakaamba mbobalinyumfwa pa nyiimbo shilibetele. Bakaamba ayi: “Inyimbo ishi shilayumya lushomo lwangu. Na ndalinyumfwa cibiibi nabi na ntokwiinda mubukaalo buyumu, lyoonse kulaba lwiimbo lweelela luncafwa mubukaalo mbombeteemo. Liinji kulila kwa lwiimbo kulaalula mbondinyumfwa!”

 Bantu bamwi balisunishi inyimbo shimwi panyiimbo ishi shilibetele. Ba Lerato abalo bekala ku South Africa, bakaamba ayi: “Lwiimbo lucite mutwi waamba ayi ‘Paladaiso Ilibo Pafwiifwi’ alimwi alwa ‘Amuyeeye ayi Muli Mucishi Cipya’ shilancafwa kuyeeya paciindi ndyeshi nkatambule bama na bakabushikwe kuswa kubafu. Lyoonse na ntookutika kunyimbo ishi ndayeeya bama kabancicilila kusa mukunkumbata.”

 Lwiimbo lomwi lulibetele lwakamucafwa abuumbi wacanike umwi ukala kucishi ca Sri Lanka. Wakaamba ayi: “Batica batwiisha sayansi bakalinga kwaamba shibiibi pali ndime pameenso abeshikolonyinaangu ceebo cakwaamba ayi ndi womwi wa Bakamboni Bakwe Yehova. Ndakaloonda alimwi nshindakalinga kucishiwo ashakwaamba. Ndyendakaboolela kuŋanda, bama bakanjuminisha kukutika ku lwiimbo lucite mutwi waamba ayi ‘Study Makes You Strong.’ Lwiimbo ulu lwakancafwa kushiba kuyandika kwa kulangoola makani akulibambila shakwaamba. Bushiku bwakakonkelawo, ndakabandika abatica bangu. Bakankutika akundumba ceebo cakwaamba ayi bakanyumfwishisha nshobashoma Bakamboni Bakwe Yehova. Ndalumba libunga lyakwe Yehova ceebo cakutupa nyiimbo ishi shiyuminisha.”

 Ino maali asebenseshekwa pakupanga nyimbo ishi alaswa kuli? Alaswa pamaali apekwa mukuliyandila acafwilisha ncito ya nsengwe yoonse alimwi liinji alapekwa kwiinda mukusebensesha nshila shicanika pa donate.pr418.com. Twalumba abuumbi pa maali ngomupa mukuliyandila.