Kwa myaaka iindilila 130, Bakamboni bakwe Yehova munshiku shino mwaaka amwaaka balaba akubungana kunene. Ano pacecino ciindi pakubungana uku kulaba makani eendilila 40 kwiilikaawo kulaba anyimbo, mbasu shakwiipusha miipusho alimwi amavidyo. Kwaamba ayi abo bacanikaako bafubileemo mumapulogilamu aya balyeelete kunocikonsha kunyumfwa akweebela kabotu mbasu shoonse. (Luka 2:20) Ino maali ngomupa mukuliyandila alasebenseshekwa buyani kwaamba ayi boonse kabafubilaamo pakubungana kunene teshi mulandu ankobakala?

 Masitedyamu amunshiku shino ali kushishi shakumbo alicite kale shisebensesho sheenga shasebenseshekwa kweebela akunyumfwa mapulogilamu. Ano ino nceebonshi tulasebensesha shisebensesho shesu na twabunganina mumisena iyi yakucita lenti? Ba David abo basebensa mu World Headquarters Broadcasting Department, bakaamba ayi: “Misena imwi njetucita lenti yakapangwa munshila yakwaamba ayi bantu inga bacikonsha kukutika kupulogilamu icite bunene bantu batokwaamba kwa mawoola eendilila 6. Kucakubonenaako, mumisena mobacitila shisekano balasebensesha bunene shisebensesho ishi kwaamba baambe shakoolobesha shifwiifwi alimwi akulishako nyimbo paniini. Pamasikilini balatondeshabo na bali mucisekano banjisha, na kutondesha shitokulishikwa, alimwi akuboshawo kutondesha mbasu shimwi shacisekano. Sombi swebo tulisuni ayi bantu kabeebela mavidyo alaamfu akushinisha ayi batookutika batonyumfwa shoonse shitokwaambwa kupulatifomu.”

 Musena womwi awomwi kubeta kubungana kunene ulapusanaako aboobo shakusebensesha kweebela alimwi akunyumfwa mapulogilamu ashalo shilapusanaako. Na misena mwakucitila kubungana kunene yasalwa, bamu Madipatimenti a Broadcasting mumisampi balasalila limwi bantu nkweshi bakakalile kweelana akukomena kwa musena alimwi akufula kwabantu batolangilwa kucanikaako kukubungana uko. Lyalo bamakwesu balasalila limwi baambi nkweshi bakanokwimikanina alimwi amusena kweenga kweelela kubika masikilini, akubona mbweshi akacitwe konekiti. Kuswaako balalemba mulongo washisebensesho shoonse shitoyandika kwaamba ayi boonse beshi bakacanikeeko kukubungana bakacikonshe kweebela akunyumfwa pulogilamu.

 Shakusebensesha kweebela akunyumfwa mapulogilamu shilafulilaako na pulogilamu yakubungana kunene ilaakubako mumishobo iinji pa ciindi comwi alimwi pamusena womwi. Na pulogilamu ilaakunosansululwa mumushobo umwi, beshi kusansulula balayandika kubona akunyumfwa pulogilamu lyalo shitokwaamba batoosansulula shilyeelete kunonyumfwika pa ledyo kusebensesha channel imwi kwaamba ayi banyumfwa mushobo uyo bakutike ku pulogilamu. Ceebo ca shisebensesho shipya ishi nshetusebensesha, bantu boonse bacanika pakubungana balacikonsha kweebela mavidyo paciindi comwi mumushobo ngobanyumfwa nabi kwaamba ayi pulogilamu ya kubungana uko inga kaili mumishobo ili 8. Ba David bakaamba ayi: “Shisebensesho ishi shilicite ncito inene, aboobo beshikusebenselaako balayandika kwiishikwa kabotu bwakushisebensesha.”

 Mumisampi iinji balicite shisebensesho nshebasebensesha kweebela alimwi akunyumfwa mapulogilamu mwaaka amwaaka. Mumisampi iyi bamakwesu balashaabanya shisebensesho ishi akubika bubaambo bwakwaamba ayi bamwi na bamanisha kubungana kunene kabashituma kubamwi batokonkelaawo. Musampi waku United States weenkabo mwaaka amwaaka balasebensesha maali amadola ashika ku 200,000 a kutuma shisebensesho mumisena mubeta kubungana kunene. Sombi maali ngotusebensesha nganiini cakwaamba ayi taakonshi kweelana amaali eenga asebenseshekwa kulungisha akuulilawo shisebensesho shimwi. Ba Steven baku Canada abo bakatanjililawo baabo basebensela kushilimba amavidyo pa kubungana kunene, bakaamba ayi, “Bamakwesu bakalinga kusebensela kushilimba aku mavidyo bakalinga kushinisha ayi tumanati toonse, ntambo alimwi ambasu shimwi shoonse shalamwa kabotu. Alimwi bakalinga kushibika kabotu shoonse mosheelete kuba kwaamba ayi abamwi pakusebensesha bakacane shoonse kashikwene.”

 Kusebensesha shisebensesho shakubweleka kuladula abuumbi, alimwi cilacanika ayi tashisebensi kabotu abuumbi alimwi tabashilaami na kushilungisha kabotu. Ici cakapa kwaamba ayi tunolyuulilabo shakusebensesha. Pacecino ciindi, sikilini yomwi yakusebensesha kweebela ilaampa mamita 5 mubulaamfu lyalo mamita otatwe mubufwiifwi iloolwa amaali amadola ashika 24,000. Alimwi ntambo yomwi ya maikilofooni ilaampa mamita ali 15 iloolwa maali amadola ali 20. Aboobo basebensa mu dipatimenti ya Broadcasting balasebensela pomwi abamu Dipatimenti Yuula Shintu kwaamba ayi bashibe maali atoyandika kabatana kuula shitoyandika. (Luka 14:28) Kucakubonenaako, balaliipusha ayi, ino mbantu baanji buyani beshi bakafubileemo na toola shisebensesho ishi? Sa kuula shisebensesho shipya njenshila ili kabotu yakumaninamo lipenshi? Sa tulicite musena ubotu nkweenga twashilamina? Sa tulicite shakusebensesha kwaamba ayi tushilungishe? Sa tulicite beenga bashilungisha?

 Ciindi aciindi tulabona shisebensesho nshetusebensesha na shoonse mbasu shilibo kabotu kwaamba ayi shinosebensa kwaciindi cilaamfu akuleya kunyonyoola maali apekwa mukuliyandila. Alimwi shisebensesho ishi tulashibika mushipe shiyumu pakushituma kumusena umwi kwaamba ayi shitanyonyooki. Alimwi shipe ishi ashalo kulaba kushilungisha na kashiyandika kulungishikwa.

 Bantu bateshi Bakamboni balanyumfwa kabotu abuumbi mapulogilamu esu mbwaanyumfwika pa kubungana kunene. Kucakubonenaako, pa kubungana kunene kumwi, kwakalinga musebenshi umwi usebensa kukampani inene abuumbi kushinguluka nsengwe yoonse baamba makani pashilimba apama TV. Musebenshi uyu wakaamba pa mapulogilamu esu mbwaaboneka alimwi a mbwaanyumfwika kabotu. Ba Jonathan bacafwilisha kubika akusebensela ku shisebensesho shisebenseshekwa kweebela akunyumfwa mapulogilamu pa kubungana kunene, bakaamba ayi: “Musebenshi uyu wakakankamana ndyaakashiba ayi bamakwesu boonse bakalinga kusebensela kushilimba amavidyo bakalyaababo alimwi tabana kuyawo kushikolo shapeculu. Wakaamba ayi kampani yabo inga yatola nshiku 5 kubika shisebensesho nshetwakabikabo mubushiku bomwi ahaafu.” Pa kubungana kunene akumwi, maneja ulanga pamusena pakabeta kubungana kunene wakaamba ayi: “Bantu baanji bakeeya abuumbi bwakupanga nyiimbo amavidyo bakalinga besawo kale pano, sombi nshina kubonawo kale bantu bacibwene bwakucita shintu beenga beelana andimwe.”

 Ino nshetusebensesha kweebela akunyumfwa mapulogilamu pa kubungana kunene shilamucafwa buyani? Mpashi amwebo mulalinyumfwa mbobalinyumfwa ba David baku England abo bakaamba ayi: “Ndicite myaaka 88 alimwi ndacanikaako kukubungana kunene mubuumi bwangu boonse. Sombi pacecino ciindi ncuubu kubikila maano kupulogilamu kwiinda mbocakalinga kale kale. Tulalumba abuumbi pamavidyo abotu ngotweebela, pulogilamu ilaboneka kweenda bwangu, ilanyumfwika kabotu alimwi taaku lubasu luboneka kupusanaamo.” Ba Micheal baku Nigeria bakabona ayi, “Bamakwesu balatolelela kukutika cakubikila maano ku pulogilamu ceebo cakwaamba ayi shoonse shilanyumfwika kabotu alimwi tacibayumini kweebela mavidyo.”

 Mwaaka uno na mukaye ku Kubungana Kunene na ku Kubungana Kunene Kulibetele kucite mutwi wakwaamba ayi ‘Amushimikile Makani Abotu!’ Amukeeleshe kuyeeya shakacitwa kwaamba ayi mucikonshe kweebela akunyumfwa kabotu pulogilamu. Tulalumba abuumbi pamaali ngomupa mukuliyandila kwiilikaawo aayo apekwa kwiinda mukusebensesha donate.pr418.com. Maali aya alapa kwaamba ayi cikonsheke kweebela akunyumfwa kabotu mapulogilamu apa kubungana kunene. Twalumba.