AMUTOLELELE KULANGILA!
Sheenga Shatupa Kulangila mu 2023—Ino Nshiinshi Baibo Nsheyaamba?
Bulya mwaaka wa 2023 mbowatalika, soonse tutolangila kucitikilwa shintu shibotu amukwashi wesu. Ino nceebonshi inga twalangila?
Baibo ilatushomesha buumi bubotu kunembo
Baibo ilatulwiita makani abotu akwaamba ayi mapensho ngotutokwiindaamo pacecino ciindi ngapakaciindi kaniinibo alimwi alaakumana conoonobo. Baibo ilaamba ayi “shoonse shili muMalembo akwe Lesa, shilatwiisha ayi tunoolangila kwiinda mukukalika myoyo alimwi akuyuminishikwa kuswa muMalembo.”—Bene Loma 15:4.
Kwaamba ayi mwiiye shiinji pa shishomesho shamu Baibo, amubelenge mutwi wamakani utokwaamba ayi “Bulangizi Bwini-bwini Bwabuumi Bubotu Kumbele.”
Kulangila kweenga kwamucafwa pacecino ciindi
Kulangila nkotucana Baibo kuli anga “nceela cakwiimikisha bwaato mubuumi bwesu.” (Bene Ebulu 6:19) Kulangila uku inga kwatucafwa kuliyumya mumapensho ngotutokwiindaamo pacecino ciindi, kutolelela kubona shintu munshila yeelete, akutupa kuba alusangalalo lwancinencine. Kucakubonenaako:
Amubone shishomesho shamu Baibo mboshakacafwa musankwa umwi wakalinga kunwa bwalwa abuumbi. Amweebele vidyo icite mutwi utokwaamba ayi Buumi Bwangu Bwakandemya.
Amubone kulangila nkotucana mu Baibo mbweenga kwatucafwa na twafwitwa shikamukowa nabi shicibusa. Amweebele vidyo icite mutwi utokwaamba ayi Kuyuminisha Kubaabo Bacite Buumba.
Amuyumye kulangila kwanu
Bantu baanji balalangila shintu shibotu kwaamba ayi shikacitike, sombi balatoonsha na nshebalangila inga shakumanishikwa. Sombi shishomesho shamu Baibo shalo shilipuseneeko. Ino nceebonshi? Mukwiinga wakashomesha shishomesho shamu Baibo ngu Yehova Lesa a “utabeci.” (Taitasi 1:2) Yehova eenkabo ngweenga wakumanisha shishomesho shakwe ceebo cakwaamba ayi inga ‘wacita cili coonse ncaasuni.’—Kulumbaisha 135:5, 6.
Tutomuyuminisha ayi mwiiye Baibo umo muli shishomesho nsheenga mwashooma. Inga mwayumya lushomo lwanu kwiinda ‘mukwiindulukaamo mu Malembo cakubikila maano.’ (Milimo 17:11) Amukalibonene nobeene kwiinda mukwiiya Baibo andiswe kwakubula kulipila. Amutalike mwaaka wa 2023 akunolangila ayi shintu shilaakubota kunembo!
a Yehova ndyeliina lyakwe Lesa.—Kulumbaisha 83:18, NWT.