Mu 2022 mfulumeende nsengwe yoonse shakasebensesha maali amadola aku America ashika 2.24 tililyoni kucafwa bamasoja, bunene bunene ceebo cakwaamba ayi cishi ca Russia cakalwana cishi ca Ukraine. Kweelana alipooti yamu April 2023 yakaswa kukabunga ka Stockholm International Peace Research Institute (SIPRI), mu 2022:

•   Maali shishi shaku Europe ngoshakasebensesha kucafwa bamasoja, “akafula kushika ku 13 pesenti. Alimwi aya akalinga maali aanji abuumbi mfulumeende shaku Europe ngoshakasebensesha mumwaaka, kuswabo mu 1991.”

•   “Maali cishi ca Russia…ngocakasebensesha akafula kushika pafwiifwi a 9.2 pesenti akupa kwaamba ayi cishi ici ciswe panamba 5 akuba panamba 3 kusebensesha maali aanji nsengwe yoonse.”

•   Cishi ca United States cakatolelela kuba ciinditeewo kusebensesha maali aanji nsengwe yoonse kucafwa bamasoja, ceebo cakwaamba ayi maali ngocakasebensesha akafula kushika ku 39 pesenti.”

 “Ceebo cakwaamba ayi mfulumeende shatolelela kusebensesha maali aanji kucafwa bamasoja, ncitondesho cakwaamba ayi tutokala mu cishi citashitilishitwe abuumbi,” kweelana abwakaamba ba Dr. Nan Tian, abo bakacafwilisha kulemba lipooti ya SIPRI.

 Baibo yakaambila limwi ayi mfulumeende shicite nkusu abuumbi shilaakunolwana abuumbi akupenshanya, alimwi ilatulwiita amfulumeende yeshi ikalete luumuno lwancinencine.

•   Baibo ilaamba paciindi ncetutokalaamo ayi “ciindi ca meelelesho.”—Danyelo 8:19.

•   Libuku lyakwe Danyelo lyakaambila limwi ayi paciindi ici mfulumeende shicite nkusu abuumbi shilaakunopikishanya. Mfulumeende ishi ‘shilashindikana,’ na kweelesha kutondesha ayi imwi ilicite nkusu kwiinda ibye. Kupikishanya kwa mfulumeende ishi kulapa kwaamba ayi shinosebensesha “buboni,” na maali aanji.​—Danyelo 11:40, 42, 43.

 Kwaamba ayi mwiiye shiinji pabushinshimi ubu bwamu Baibo busangalasha, amweebele vidyo icite mutwi waamba ayi Bushinshimi Bwakakumanishikwa—Danyelo Capita 11.

•   Baibo ilaamba ayi Lesa alaakukushawo mfulumeende sha bantu. ‘Alaakubika bwaami ubo bweshi bukabule kunyonyoolwa. Alimwi bwaami ubu teshi bukapekwe kubantu bamwi sobwe. Bulaakupwayoola akumanisha maleelo amwi oonse akulela kwamuyayaya.’​—Danyelo 2:44.

•   Conoonobo Yehova a Lesa alaakucita cintu bantu nceenga tabacikonshi kucita—nkokwaamba ayi kuleta luumuno lwancinencine alimwi lwamuyayaya. Ino alaakucita buyani ubo? Mfulumeende na Bwaami bwakwe bwakwiculu, bulaakukushawo shilwanisho shoonse akumana nkoondo shoonse pacishi.​—Kulumbaisha 46:8, 9.

 Kwaamba ayi mushibe shiinji Bwaami bwakwe Lesa nsheshi bukacite, amubelenge mutwi waamba ayi “Mubweendeleshi bwa Bwaami Bwakwe Lesa ‘Luumuno Lulaakufula.’”