Kweelana aba World Health Organization (WHO), kusa mukushika pa 23 May, 2022, bantu bakafwa kubulwashi bwa COVID-19 bakashika 6.27 miliyoni. Nacibi boobo, kweelana amakani akaambilishikwa pa 5 May, 2022, ba WHO bakaamba ayi bantu bakafwa mbaanji abuumbi. Bakaamba ayi mu mwaaka wa 2020 alimwi a 2021, “bantu bakafwa kubulwashi bwa COVID-19 na malwashi akumite bulwashi ubu . . . bakalinga kushika kuma 14.9 miliyoni.” Sa kuli makani ali oonse aambwa mu Baibo akumite kumapensho anene mbuli aya?

•    Yesu wakaambila limwi ayi kulaakuba “malwashi” “munshiku shakweelaako.”​—Luka 21:11, 2 Timoti 3:1.

 Bushinshimi Yesu mbwakaamba butookumanishikwa munshiku shino. Kwaamba ayi mushibe shiinji, amubelenge mutwi utokwaamba ayi “Ino Citondesho ca ‘Nshiku Shamamanino,’ na ‘Ciindi Cakumamanino’ Nciinshi”?

•    “Lesa shikuyuminisha . . . alatuyuminisha mumapensho esu oonse.”​—2 Bene Kolinto 1:3, 4, NWT.

 Baanji bakafwitwa shikamukowa na shicibusa balayuminishikwa na babelenga makani amu Baibo. Amwiiye shiinji pamutwi utokwaamba ayi “Sheenga Shamucafwa Kuliyumya na Mwafwiitwa—Nsheenga Mwaciita Munshiku Shino” alimwi aumwi utokwaamba ayi “Lucafwo Lwancinencine Kubaabo Bacite Buumba.”

•    “Abwise Bweene Bwanu, kuyanda kwanu akucitwe panshi pano bweenka mbuli kwiculu.”​—Mateyo 6:10.

 Conoonobo “Bweene bwakwe Lesa” bulaakucitawo comwi kwaamba ayi kutakabi “muntu nabi womwi ukala pacishi weshi akaambe ayi: ‘ndaciswa.’” (Maako 1:14, 15; Isaya 33:24, NWT) Kwaamba ayi mushibe makani atokwaamba pa mfulumeende yakwiculu alimwi ansheshi ikacite, amweebele vidyo icite mutwi utokwaamba ayi Ino Bwaami Bwakwe Lesa Nciinshi?

 Tutomusenga ayi mwiiye shiinji Baibo nshoyaamba alimwi a shishomesho shisangalasha sheenga shamucafwa amukwashi wanu.