Bantu baanji nsengwe yoonse batolwana ceebo ca shamapolitiki akupa kwaamba ayi baanji banolisukama.

•   Ku Mexico, kwaciindi cakutaanguna beshimapolitiki bali 39 bakacaikwa alimwi kuli shoongo ashimwi ceebo ca shamapolitiki. Bantu mucishi ici balikankamene pasheeshi shakacitika alimwi tabacishiiwo shintu mbweshi shikabe ciindi ca kuvoota mwaaka uno.

•   Conoono, ku Europe bantu baanji bakalinga kulwana ceebo ca shamapolitiki alimwi prime minister waku Slovakia bakalinga kusuni kumucaya pa 15 May, 2024.

•   Ku United States, bantu balikankamene ceebo cakwaamba ayi Donald Trump uyo wakalinga pulesidenti wacishi ici, bakalinga kusuni kumucaya pa 13 July, 2024.

 Ino nceebonshi bantu baanji batolwana ceebo ca shamapolitiki? Sa balaakucileka kulwana? Ino nshiinshi Baibo nshoyaamba?

 Baibo yakaambila limwi ayi ‘munshiku shino shakweelaako’ nshetutokalaamo, bantu baanji balaakunotondesha mibo yeshi ikape kwaamba ayi banolwana akutanyumfwana.

•   ‘Ono shiba kwaamba ayi munshiku shakweelaako, kulaakuba shiindi shiyumu abuumbi. Mukwiinga bantu balaakuba . . . bataluumbi, batashomeki, . . . batasuni shipangano, . . . bakali, . . . bacenjeshi, batalwiitikwi, baswitebo kulisumpula.’—2 Timoti 3:1-4.

 Alimwi Baibo yakaambila limwi ayi shintu shitoocitika mbuli bantu kubukila mfulumeende akubusha shoongo ceebo ca shamapolitiki, shilaakufula abuumbi munshiku shino nshetutokalaamo. (Luka 21:9) Nacibi boobo, bantu teshi bakatolelele kulwana nabi kuba batacatene ceebo ca shamapolitiki.

 Baibo ilaamba ayi Lesa alaakukushawo mfulumeende sha bantu shoonse lyalo mfulumeende yakwe ya kwiculu ilaakutalika kweendelesha cishi.

•   ‘Lesa wakwiculu alaakubika bwaami ubo bweshi bukabule kunyonyoolwa. . . Bulaakupwayoola akumanisha maleelo amwi oonse akulela kwamuyayaya.’—Danyelo 2:44.

 Bwaami bwakwe Lesa bulaakupa kwaamba ayi bantu babe bacatene akuleta luumuno pacishi coonse.

•   Yesu Klistu mweendeleshi wa Bwaami ubu, aleetwa ayi “Mwaami wa Luumuno” alimwi alaakushinisha kwaamba ayi ‘luumuno lukanooliko kwa lyoonse alyoonse.’—Isaya 9:6, 7.

•   Nabibo pacecino ciindi, abo beendeleshekwa a Bwaami ubu batokwiiya bwakukala muluumuno abamwi. Aboobo Baibo ilaamba ayi: “Mipeeni yabo balaakunoifula ayi shibe shakulimisha, aalo masumo abo ayi abe shakukwesoosha shisamu. Taaku mushobo weshi ukapililike mipeeni kuya mukulwana umwi, nabi weshi ukanooya mukwiiya shankondo.”—Isaya 2:3, 4.

 Kwaamba ayi mwiiyilewo ashimwi, amubelenge mutwi wamu Chitonga waamba ayi “Ino Bwami bwa Leza Buyoocita Nzi?” akweebela vidyo yaamba ayi Ino Bwaami Bwakwe Lesa Nciinshi?