Nsengwe yoonse, bantu baanji batokweelesha kukala buumi bwakutalya nyama.

•   “Bantu batalyi nyama baleelesha kucita nsheenga bacikonsha mushintu nshebayeeya anshebacita kwaamba ayi batapenshi shinyama na kushicaya ceebo cakusuna kulya, kupanga shakufwala na kushisebensesha munshila shimwibo.”​—The Vegan Society.

 Bantu bamwi balacileka kulya nyama kuteshibo ceebo cakwaamba ayi balabikila maano kushinyama, sombi balisuni akwaamba ayi misena inooboneka kabotu, babe abuumi buli kabotu na ceebo ca shabupailishi.

•   “Buumi bwakutalya nyama bulipusene abuumi bantu bamwi mbobakala mukwiinga liinji bantu balabona kutalya nyama ayi ncintu muntu ncaashoma, nceenga wasalawo kucita alimwi ninshila womwi awomwi mbweenga wapa kwaamba ayi cishi cibote.”​—Britannica Academic.

 Sa kukala buumi bwakutalya nyama nkweenga kwamana mapensho ali pacishi? Ino nshiinshi Baibo nshoyaamba?

 Baibo ilatondesha ayi Yehova a Lesa mulengi wesu, alabona bantu ayi balayandika kwiinda shinyama alimwi wakabapa nkusu shakusheendelesha. (Matalikilo 1:27, 28) Mukuya kwaciindi, Lesa wakasuminisha bantu kutalika kulya nyama. (Matalikilo 9:3) Nacibi boobo, taasuniiwo kwaamba ayi bantu banopensha shinyama.​—Tushimpi 12:10.

 Kweelana a Baibo nshoyaamba, muntu womwi awomwi inga wasalawo kulya nyama nabi sobwe. b Kusalawo kulya nabi kutalya nyama takupi kwaamba ayi muntu abe uyandika kuli Lesa. (1 Bene Kolinto 8:8) Taakuwo weelete kwaamba shibiibi pashintu bamwi nshobasalawo kulya.​—Bene Loma 14:3.

 Baibo ilatondesha ayi nshotusalawo kucita mubuumi teshi shikamane mapensho ali pacishi. Mapensho aanji ngotwiindaamo nceebo ca shamapolitiki, shintu bantu nshobacita alimwi amakani ashamaali, ayo muntu uli woonse ngaatakoonshi kumana. Baibo ilaamba ayi:

•   “Cintu cikonkomene tacikoonshi koololwa.”​—Shikushimikila 1:15.

 Mulengi wesu alaakumana mapensho ngotwiindaamo. Baibo ilasebensesha maswi acikoshanyo kusansulula shintu Lesa nsheshi akacite.

•   “Kuswawaawo ndakabona liculu lipya alimwi acishi ca panshi cipya mukwiinga liculu litaanshi alimwi acishi citaanshi shakamana, alwalo lweenge lwakashimingana.”​—Ciyubululo 21:1.

 Lesa alaakukushawo mfulumeende sha bantu, nkokwaamba ayi “liculu litaanshi,” akuleta “liculu lipya,” nkokwaamba ayi mfulumeende yakwe yakwiculu. Bwaami bwakwe bulaakukushawo “cishi citaanshi,” nkokwaamba ayi bantu abo bacita shibiibi, akweendelesha “cishi capanshi cipya,” nkokwaamba ayi bantu basuni kunyumfwila mfulumeende iyi.

 Na Bwaami bwakwe Lesa bukanokweendelesha ndyeshi cikakonsheke bantu kwikala muluumuno ashinyama akulama kabotu cishi.​—Isaya 11:6-9.