Inkondo ili ku Ukraine alimwi akwaaluka kwa mbokuca, shatolelela kupa kwaamba ayi kube nsala abuumbi nsengwe yoonse. Ubu mbocibete bunene bunene mushishi shitooya panembo umo bantu baanji mocibabeta ciyumu kuba ashakulya shikwene.

•   “Makampani apanga shakulya atopilinganishikwa ceebo ca nkondo, kwaaluka kwa mbokuca, kudula kwashintu kwiilikaawo ashimwi.”​—Ba António Guterres, ba secretary-general bamu kabunga ka United Nations, July 17, 2023.

•   “Bantu bakeeya abuumbi bakaamba ayi mukwiinga cishi ca Russia cakacileka kutuma shakulya mushishi shimwi, citoopa kwaamba ayi shakulya shiceye abuumbi mucishi alimwi shilaakudula bunene bunene mushishi muli bukandu mbuli ku North Africa aku Middle East.”​—Atalayar.com, July 23, 2023.

 Amwiiye Baibo nshoyaamba pakuceya kwa shakulya alimwi asheshi shikacitike kunembo.

•   Yesu wakaambila limwi ayi: “Mushobo umwi ulaakubukila ubye, abwalo buleelo bulaakubukila bulelonyina. Kulaakuba nsala . . . mumisena ipusenepusene.”​—Mateyo 24:7.

•   Libuku lya Ciyubululo lilaamba pa basankwa bacikoshanyo bone abo batantite pamaaki. Womwi pa basankwa aba aleemikaninako nkondo. Lyalo ukonkelaawo aleemikaninako nsala, ciindi shakulya ndyeshi shikaceye akudula abuumbi. ‘Mpomunyaawo mwakaswa liaki limwi, lyalo lyakalinga kushiya. Wakalinga kutantiteewo wakalinga kucite cipimo mulyaansa. Pesule, ndakanyumfwa cakalinga kunyumfwika anga ndiswi . . . Lyakaamba ayi, ‘Cipimo comwi ca wiiti cakalinga kuulwa maali ayo muntu ngeenga wasebensela pabushiku alimwi shipimo shotatwe sha maila shakalinga kuulwa bweenka ubo.’’​—Ciyubululo 6:5, 6.

 Bushinshimi ubu bwamu Baibo bwaamba pa makani akuceya kwa shakulya butookumanishikwa munshiku shino Baibo nsheyaamba ayi ‘inshiku shakweelaako.’ (2 Timoti 3:1) Kwaamba ayi mwiiyilewo ashimwi pa makani a “nshiku shakweelaako” alimwi apa basankwa bone batantite pa maaki baambwa mulibuku lya Ciyubululo, amweebele vidyo icite mutwi waamba ayi Shintu Shakaaluka Pacishi Kuswabo mu 1914 akubelenga mutwi waamba ayi “Basankwa Bone Batantite Pamaaki—Ino Mbaani?”

•   Baibo ilicite makani eenga atucafwa kuliyumya ndyetutokwiinda mubukaalo buyumu, kwiilikaawo aciindi shakulya ndyeshaceya na kudula. Amubone shimwi sheenga shamucafwa mumutwi wamakani waamba ayi “Mbweenga Mwekala Buumi Bwakutalila Shiinji.”

•   Alimwi Baibo ilatushomesha ayi shintu shilaakuba kabotu kunembo. Ilatushomesha ayi kulaakuba ciindi ndyeshi kukabe “shili anga ngamaila shiinji mucishi” alimwi bantu boonse balaakuba ashakulya shiinji. (Kulumbaisha 72:16) Kwaamba ayi mwiiye shiinji pa shishomesho shamu Baibo shaamba buumi mbweshi bukabe kunembo alimwi a nceenga mwashomena nsheyaamba, amubelenge mutwi waamba ayi “Kulangila Kwancinencine Kwa Buumi Bubotu Kunembo.”