Panyusi tulanyumfwa bunene malipooti aamba pa bantu baamba maswi abiibi, bukapondo, bantu kulwana ceebo cakupusana mishobo, alimwi ankoondo shimwi.

•   “Pacecino ciindi pa intaneti patocanika maswi aanji abiibi ceebo ca nkoondo ili pakati ka Israel a Gaza alimwi aceebo ca bantu bayuminisha shankondo akupatana.”​—The New York Times, November 15, 2023.

•   “Kuswabo pa 7 October, bantu baanji batokwaamba maswi abiibi akulwana ceebo ca kusalululana abuumbi kwiinda kale kale.”​—Ba Dennis Francis, ba pulesidenti ba United Nations General Assembly, November 3, 2023.

 Kuswabo kale kale, bantu balaamba maswi abiibi akulwana. Alimwi Baibo ilaamba pa bamwi bakalingaako kale kale ayi bakalinga kwaamba “maswi ayasa anga njimifwi,” akuba beshinkondo abuumbi. (Kulumbaisha 64:3; 120:7; 140:1) Nacibi boobo, Baibo ilatulwiita ayi kupatana kuli mucishi pacecino ciindi kulatucafwa kushiba shintu shimwi shiyandika.

 Baibo ilaamba sheebo shobilo shapa kwaamba ayi bantu bapatane abuumbi mucishi.

1.  1. Yakaambila limwi ayi “lusuno lwa bantu baanji lulaakuceya.” (Mateyo 24:12) Muciindi cakutondesha lusuno, bantu baanji balatondesha mibo ipa kwaamba ayi bapatane.​—2 Timoti 3:1-5.

2.  2. Kupatana abuumbi kuli mucishi nceebo cakuyungwa a Satana mulwani wesu mubiibi. Baibo ilaamba ayi ‘cishi coonse citokweendeleshekwa a mubiibi.’​—1 Joni 5:19; Ciyubululo 12:9, 12.

 Nacibi boobo, Baibo alimwi ilatulwiita ayi conoonobo Lesa alaakukushawo shintu shoonse shipa kwaamba ayi bantu bapatane. Alimwi ciyandika nceshi akacite, nkukushaawo mapensho oonse esa ceebo ca kupatana. Baibo ilatushomesha ayi:

•   Lesa ‘ulaakubakunkumuna minsonshi yoonse, lufu teshi lukabeeko alimwi, teshi kukabe buumba, kulila nabi kunyumfwa kucisa, mukwiinga shintu shikulukulu shoonse shashimingana.’​—Ciyubululo 21:4.