Libunga lya United Nations lyakaamba ayi:

•   Kuswa pa 7 October kushika pa 23 October, 2023, inkondo ili pakati ka Gaza acishi ca Israel yapa kwaamba ayi bantu beendilila 6,400 bacaikwe alimwi bali 15,200 baliciise. Baanji pabaabo bakafwa abakalicisa mbantu batatolwanako nkondo. Kwiilikaawo, bantu baanji abuumbi bakacicaawo pamaandaabo.

•   Kusa mukushika pa 24 September, 2023, inkondo ili pakati ka cishi ca Russia aca Ukraine yapa kwaamba ayi bantu batatolwanako nkondo bali 9,701 bacaikwe, lyalo bali 17,748 bakala mu Ukraine baliciise.

 Ino nshiinshi Baibo nshoishomesha baabo batoopenga ceebo ca nkondo?

 Baibo yakaambila limwi ayi Lesa ‘alaakumana nkondo mucishi capanshi coonse.’ (Kulumbaisha 46:9) Alaakusebensesha mfulumeende yakwiculu na bwaami, kukushawo mfulumeende sha bantu shoonse pacishi. (Danyelo 2:44) Bwaami bwakwe Lesa bulaakupa kwaamba ayi bantu bacileeke kupenga.

 Amubone Yesu Klistu, Mwaami wa Bwaami bwakwe Lesa nsheshi akacite:

•   ‘Alaakufuna bakandu na abo bamulilila, abalyatililwa abo batacite shikubacafwa. Abo balefukite abakandu alaakubanyumfwila nkumbu, alimwi alaakupulusha buumi bwa baabo bataaku mbobabete. Alaakubapulusha kuswa kubantu babalyatilila akubaabo bakali.’​—Kulumbaisha 72:12-14.

 Kwiinda mu Bwaami bwakwe, Lesa alaakukushawo kupenga koonse kusa ceebo ca nkondo.

•   ‘Ulaakubakunkumuna minsonshi yoonse, lufu teshi lukabeeko alimwi, teshi kukabe buumba, kulila nabi kunyumfwa kucisa, mukwiinga shintu shikulukulu shoonse shashimingana.’​—Ciyubululo 21:4.

 Conoonobo Bwaami bwakwe Lesa bulaakupa kwaamba ayi shintu shikabote abuumbi pacishi. Baibo yakaambila limwi pa “nkondo ampuuwo sha nkondo” shitoocitika munshiku shino. (Mateyo 24:6) Inkondo ishi ashintu shimwi shitoocitika shitotondesha ayi tutokala “munshiku shakweelaako” sha bweendeleshi bwa bantu.​—2 Timoti 3:1.