Nsengwe yoonse bantu batoliyumya ku kulungula cakwiindilila aceebo camapensho amwi abaako ceebo ca kulungula uku. Amunyumfwe malipooti atokonkelaawo:

•   “Mweenshi wa June ngomweenshi ndyekwakalungula abuumbi kuswabo ciindi bantu ndyebakatalika kupima mucishi coonse mbomulungula, myaaka 174 yainda.”​—National Oceanic and Atmospheric Administration, U.S. Department of Commerce, July 13, 2023.

•   “Ku Italy, ku Spain, ku France, ku Germany aku Poland kutolungula cakwiindilila alimwi mpashi kunsumbu ya Sicily aya Sardinia kulaakulungula abuumbi kushika ku 48°C [na 118°F]. Ici mpashi cilaakuba ciindi cakutaanguna ndyeshi kukalungule abuumbi ku Europe.”​—European Space Agency, July 13, 2023.

•   “Mucishi ndyemutooya cilungula, tutolangila ayi imfula inanooloka abuumbi alimwi inanookomena abuumbi alimwi ici cilaakupa kwaamba ayi kube bulobe abuumbi.”​—Maswi aya akaambwa aba Stefan Uhlenbrook, banene balanga ku shamaanshi mulibunga lya World Meteorological, July 17, 2023.

 Sa kufula kwa malipooti atokwaamba pakulungula cakwiindilila kwamusukamika? Amunyumfwe Baibo nshoyaamba pamakani aya ayandika atosukamika bantu.

 Ee. Kulungula cakwiindilila nsengwe yoonse alimwi akwaaluka abuumbi kwa muuwo kutookumanisha Baibo nshoyakaambila limwi ayi shilaakunoocitika munshiku shino. Kucakubonenaako, Yesu wakaambila limwi ayi tulaakubona “shintu shiloondesha.” (Luka 21:11) Ceebo cakwaamba ayi mucishi mwatalika kulungula abuumbi, baanji batoloonda ayi bantu balaakunyonyoola cishi.

 Sobwe. Lesa wakalenga cishi kwaamba ayi tunookalaamo kwamuyayaya; alimwi teshi akasuminishe bantu kwaamba ayi bacinyonyoole. (Kulumbaisha 115:16; Shikushimikila 1:4) Alimwi wakashomesha ayi ‘alaakunyonyoola baabo banyonyoola cishi capanshi.’​—Ciyubululo 11:18.

 Baibo ilatondesha ayi Lesa alicite nkusu shakushitilisha cishi kwaamba ayi bantu batacinyonyooli. Alimwi alaakucita boobo kunembo.

•   ‘Lesa aloomusha cipuupu. Aalo maaba amulweenge aloomunabo tontolo.’ (Kulumbaisha 107:29) Lesa alicite nkusu shakumana mapensho alicitikila. Alaakumana mapensho oonse bantu ngobatokwiindaamo ceebo ca kwaaluka abuumbi kwa muuwo.

•   ‘Mulalama cishi kwiinda mukucipa mfula, akucipa mboleshi shiinji abuumbi.’ (Kulumbaisha 65:9 Lesa alaakupa kwaamba ayi cishi cibe paladaiso.

 Kwaamba ayi mushibe shiinji Baibo nshoyaamba pamakani acishi mbweshi cikabe kunembo, amubelenge mutwi wamu Chitonga waamba ayi “Ino Nguni Uyakwiifwutula Nyika?”