Mumwaaka wa 2022, liinji panyusi twakalinga kunyumfwa malipooti aamba pankondo, mapensho akubula maali, amapensho amwi alicitikila. Baibo njeenga yatucafwabo kunyumfwishisha shintu ishi shitoocitika.

Kunyumfwishisha shintu shakacitika mumwaaka wa 2022

 Shintu shakacitika mumwaaka wa 2022 shilatondesha patuba kwaamba ayi tutokala “munshiku shakweelaako” kweelana a Baibo mboyaamba. (2 Timoti 3:1) Inshiku shakweelaako shakatalika mumwaaka wa 1914. Amubone shakacitika conoono mboshitokweendelana ashintu Baibo nshoyakaambila limwi ayi shilaakunoocitika munshiku shino:

 ‘Nkoondo.’—Mateyo 24:6.

•   “Mwaaka wa 2022 ngu Mwaaka Bantu Baku Europe Ndyebakakumwa Abuumbi Alimwi, Kumapensho esa Ceebo ca Nkoondo.” a

 “Nsala.”—Mateyo 24:7.

•   “Kwakalinga Nsala Abuumbi Mumwaaka wa 2022.” b

 “Malwashi.”—Luka 21:11.

•   “Bulwashi bwa polio bwakatalika alimwi lyalo bulwashi bwiitwa ayi monkeypox bwakaba lipenshi linene, kwiilikaawo abulwashi bwa COVID-19 ubo bwatolelela kukuma bantu baanji. Malwashi aya akatondesha ayi bulwashi buyambukila mbubiibi alimwi ayi bantu inga bakumwa kumalwashi paciindi cili coonse.” c

 “Shintu shiloondesha.”—Luka 21:11.

•   “Kulungula cakwiindilila, shilanga, mililo alimwi abulobe. Ncakutatoonsha kwaamba ayi baanji bananokwiibaluka cilimo cakalingaako mumwaaka wa 2022 mukwiinga kwakacitika shintu shiloondesha abuumbi shakakuma muuwo isho shakapa kwaamba ayi kube kunyonyooka abuumbi kwashintu, bantu baanji kufwa akupa kwaamba ayi baanji nsengwe yoonse banyonyookelwe maanda.” d

 “Shimfulunganya.”—Luka 21:9.

•   “Bantu bakakalala ceebo ca kushuupa kwa maali bunene bunene shintu ndyeshakadula abuumbi. Aboobo mumwaaka wa 2022, bantu baanji bakalinga kubukila mfulumeende kwiinda mukupa kwaamba ayi kube shoongo.” e

Ino nshiinshi sheshi shikacitike mumwaaka utoosa?

 Taakuwo muntu weenga washibila limwi sheshi shikacitike mumwaaka wa 2023. Sombi ncetwishi ncakwaamba ayi conoonobo Bwaami bwakwe Lesa na mfulumeende yakwiculu, bulaakupa kwaamba ayi shintu shikaaluke abuumbi pacishi. (Danyelo 2:44) Bwaami bwakwe Lesa bulaakukushaawo mapensho oonse bantu ngobeendaamo akupa kwaamba ayi kuyanda kwakwe Lesa kukakumanishikwe pacishi.—Mateyo 6:9, 10.

 Tutomuyuminisha kwaamba ayi munookonkela kucenjesha kwakwe Yesu Klistu ‘akutolelela kuba balibambite’ kubona shintu shitoocitika mucishi mboshitookumanisha bushinshimi bwamu Baibo. (Maako 13:37) Twamusenga kubandika andiswe kwaamba ayi mwiiyilewo shiinji akubona Baibo mbweenga yamucafwa pacecino ciindi ambweenga yacafwa mwebo amukwashi wanu kuba akulangila kwancinencine kwa kwaamba ayi shintu shilaakubota kunembo.