Bantu baanji tabalilemeki. Bantu bamwi balwashi balakalokela bamadokota; bantu beshikulya mu malesitilanti tabatondeshi bulemu kubaabo beshikuboolisha shakulya; bantu beshikutanta ndeke balashuupa bamakondakita bamu ndeke akukakatila kulwana ambabo; banike tabalilemeki ndyebali kucikolo. Balaweluluka bamatica, kubakonga alimwi akusuna kubooma; alimwi beshimapolitiki bamwi balacita shintu shiteendelani amilawo lyalo bamwi baleelesha kulitondesha ayi balalilemeka.

 Mu Baibo muli makani eenga atucafwa kushiba kulilemeka kwancine ncocaamba. Alimwi ilaamba acapa kwaamba ayi bantu baanji batanolilemeka munshiku shino.

 Nsengwe yoonse, bantu baanji bakacileka kulilemeka, nkokwaamba ayi kucita shintu shili kabotu alimwi shisuminishikwa.

•   Nshobakacana bamwi bakalangoola makani conoono shakatondesha ayi bantu baku America balashoma ayi bantu bakala mucishi ca United States bacileka kulilemeka abuumbi kwiinda mbocalinga mumyaaka 22 yainda.

•   Makani aamwi ngobakalangoola akatondesha ayi 65 pesenti ya bantu beendilila 32,000 mushishi shili 28, bakaamba ayi bantu baniini mbobalilemeka munshiku shino pabantu mbobakabonaawo.

 Baibo yakaambila limwi pakutalilemeka nkotutobona munshiku shino.

•   ‘Munshiku shakweelaako, kulaakuba shiindi shiyumu abuumbi. Mukwiinga bantu balaakuba beshikulisuna, basunishi maali, beshikulilumbaisha, beshikulisumpula, beshimatushi, batanyumfwili bashali, bataluumbi, . . .  batalitibuki [alimwi] bakali.’—2 Timoti 3:1-3.

 Kwaamba ayi mushibe makani aamwi aamba pa bushinshimi ubu mbobutokumanishikwa, amubelenge mutwi wamu Chitonga waamba ayi “Sena Bbaibbele Lyakaambilalimwi Bantu Mbobanikuyeeya Akucita Zintu Mazuba Aano?”

 Mucishi muno bantu mobatatolilemeka, baanji bakacana ayi mu Baibo muli butanjilishi bubotu abuumbi bweenga bwabacafwa kunoolilemeka. Makani aliimo aamba pa kulilemeka alacafwa “lyoonse alyoonse.” (Kulumbaisha 111:8) Nsheeshi shakubonenaako shiniini:

•   Baibo nshoyaamba: ‘Shintu shoonse nshomusuni ayi bantu bamucitile amwebo mubacitile bweenka ubo.’—Mateyo 7:12.

   Ncolisansulula: Tulyeelete kunoocita shintu shili kabotu kubamwi akunoobatondesha bulemu, bweenka mbotusuni ayi banoocita kuli ndiswe.

•   Baibo nshoyaamba: ‘Mucileeke kubeca! Muntu woonse ulyeelete kwaamba shalushinisho kumubye.’—Bene Efeso 4:25.

   Ncolisansulula: Tulyeelete kunooshomeka mushintu shoonse nshetwaamba anshotucita.

 Kwaamba ayi mushibileewo ashimwi pamakani aya, amubelenge:

•   Njashi Yamulindilishi yamu Chitonga yaamba ayi “Ncinzi Cikonzya Kumugwasya Kuzyiba Ciluzi Alimwi Acitaluzi.”

•   Mutwi wamu Chitonga waamba ayi “Bbaibbele Mbolikonzya Kutugwasya Kutabeteka Bamwi.”