Mu mweenshi wa July 2022, kwakalinga malipooti akwaamba ayi mushishi shiinji nsengwe yoonse kulungula kweendaawo:

•   “Mankanda obilo mu mweenshi wa July, mfulumeende yaku China itoocenjesha bantu ayi kulaakuba kulungula kwiinditeewo mu matauni ashika mpashi kuma 70.”—July 25, 2022, CNN Wire Service.

•   “Ceebo ca kulungula kwiinditeewo mumisena yoonse yamu Europe, kuli mulilo uloondesha utootenta luundu mushishi shiinji.”—July 17, 2022, The Guardian.

•   “Pasondo, kwakalinga kwalungula cakwiindilila mu matauni aanji mucishi ca America ceebo ca muuwo ulungula wakeenda kulubasu lwa kwicwe kuya mukushika kulubasu lwa kumalenge alimwi alubasu lwa kumbo.”—July 24, 2022, The New York Times.

 Ino nceebonshi shintu sha mushobo uyu shitoocitika? Sa ici cilasansulula ayi mukuya kwaciindi cishi capanshi cilaakunyonyooka? Ino nshiinshi Baibo nshoyaamba?

 Ee. Shintu mbuli kulungula cakwiindilila uku kutoocitika mushishi shiinji nsengwe yoonse kuleendelana ashintu Baibo nshoyakaambila limwi ayi shilaakunocitika munshiku shino. Kucakubonenaako, Yesu wakaambila limwi ayi “kulaakucitika shintu shiloondesha,” na “shintu sheensu alimwi shikankamika.” (Luka 21:11; Good News Translation) Ceebo ca kulungula cakwiindilila kutoocitika mushishi shiinji nsengwe yoonse, bantu baanji batoloonda ayi shintu bantu nshebatoocita shilaakunyonyoola cishi capanshi cakumaninina.

 Sobwe. Lesa wakalenga cishi capanshi kwaamba ayi bantu banokalaamo kwamuyayaya. (Kulumbaisha 115:16; Shikushimikila 1:4) Aboobo teshi akalekele bantu kwaamba ayi banyonyoole cishi capanshi cakumaninina. Alimwi kweelana ambwakashomesha, ‘alaakunyonyoola baabo banyonyoola cishi capanshi.’—Ciyubululo 11:18.

 Amubone shintu shobilo ashimwi Lesa nshaakashomesha kucita:

•   “Luyanga lulaakusangalala alyalo liwesa lilaakusangalala akusapula maluba.” (Isaya 35:1) Lesa teshi akalekele cishi capanshi kuba anga nduyanga mutakoonshi kwikala bantu. Alimwi alaakubamba mbasu shoonse sha cishi capanshi shakanyonyooka.

•   “Mulalama cishi kwiinda mukucipa mfula, mulacipa mboleshi shiinji abuumbi.” (Kulumbaisha 65:9) Cishi capanshi cilaakuba paladaiso kwiinda mulucafwo lwakwe Lesa.

 Kwaamba ayi mushibileewo ashimwi pamakani akwaaluka kwa muuwo mucishi mbokutookumanisha bushinshimi bwamu Baibo, amubelenge mutwi utokwaamba ayi “Kwaaluka kwa Muuwo Abuumi Bwesu bwa Kunembo—Ino Nshiinshi Baibo Nshoyaamba?”

 Kwaamba ayi mushibileewo ashimwi pa cishomesho camu Baibo caamba pacishi mbweshi cikabe kabotu kunembo, amubone mutwi utokwaamba ayi “Ino Ngani Weshi Akapulushe Cishi Capanshi?”