Kwamyaaka 30 yainda, bantu baanji balinga kulinyumfwa ayi bushicibusa buli pakati ka shishi shipusenepusene bwalinga kabotu alimwi bwalinga kuya ciyuminaako. Nacibi boobo, shakacitika conoono shitotondesha ayi ici mpashi teshi cancine.

•   “Bantu baanji batolisukama ayi inkondo ili ku Gaza ilaakukuma shishi shimwi shili kufwiifwi amusena uyu na cishi ca Israel cikatalike kulwana a Hezbollah pa boda ya Lebanon.”​—Reuters, January 6, 2024.

•   “Makoto atotanjililwa acishi ca Iran atalika kulwana bantu mumisena ipusenepusene alimwi cishi ici catalika kupanga shilwanisho shikali sha maboomu. Kwiilikaawo, cishi ca Russia a China shitosebensela pomwi acishi ca Iran. Ishi shoonse shitoopa kwaamba ayi shishi shili kulubasu lwakumbo shitekali muluumuno.”​—The New York Times, January 7, 2024.

•   “Cishi ca Russia catolelela kulwana cishi ca Ukraine akunyonyoola shintu shiinji mucishi ici.”​—UN News, January 11, 2024.

•   “Inkondo inga yabuka conoono ceebo cakwaamba ayi bukandu butooya ciceya mucishi ca China alimwi cilicite bamasoja ashilwanisho shiinji, cishi ca Taiwan catolelela kulisumpula, alimwi aceebo cakwaamba ayi cishi ca China acishi ca United States tashitonyumfwana kabotu.”​—The Japan Times, January 9, 2024.

 Sa Baibo yakaambawo shili shoonse pashintu shitoopilinganya luumuno shitocitika mucishi? Sa shitocitika ishi shilaakupa kwaamba ayi inkondo ibuke?

 Baibo taikwe kwaambila limwi pa nkondo ili yoonse itoocitika pacecino ciindi. Nacibi boobo, yakaambila limwi pa nkondo imwi yakuma bantu mushishi shipusenepusene akupa kwaamba ayi ‘pacishi patabi luumuno.’​—Ciyubululo 6:4.

 Libuku lyakwe Danyelo lyakaambila limwi ayi “munshiku shakumamanino,” shishi shicite nkusu abuumbi nsengwe yoonse shilaakutalika ‘kushindikana’ na kulwana kwaamba ayi cimwi citondeshe ayi cilicite nkusu kwiinda cibye. Kushindikana uku kutoopa kwaamba ayi shisebenseshe shilwanisho shikali akusebensesha ‘buboni’ buunji na maali.​—Danyelo 11:40, 42, 43.

 Baibo ilatondesha ayi shintu shilakutaanguna kubica pacishi kashitana kuba kabotu. Yesu wakaambila limwi ayi kulaakuba ‘mapensho anene atakwe kubonekawo kale kuswabo kumatalikilo acishi.’ (Mateyo 24:21) ‘Mapensho anene’ alaakupa kwaamba ayi inkondo ya Amagedoni italike, iyo yaambwa ayi ‘inkondo ya bushiku bunene bwakwe Lesa Shinkusu shoonse.’​—Ciyubululo 16:14, 16.

 Nacibi boobo, inkondo ya Amagedoni ilaakupulusha bantu kuteshi kubanyonyoola. Kwiinda munkondo iyi, Lesa alaakukushawo mfulumeende shabantu isho shapa kwaamba ayi kube nkondo shacaya bantu baanji. Kwaamba ayi mushibe inkondo ya Amagedoni mbweshi ikape kwaamba ayi pacishi pakabe luumuno lwamuyayaya, amubelenge mitwi itokonkelaawo:

•   “Ino Nkondo ya Amagedoni Ninzi?”

•   “Tutolangila Amagedoni!”