Mushisekano sha nsengwe yoonse shiliiko mumwaaka uno wa 2024, bantu bashika pafwiifwi a 5 bilyoni batokweebela batoocita shisekano abo bakaswa mushishi shili 206. Thomas Bach pulesidenti wa International Olympic Committee (Komiti Ilanga pa Shisekano Nsengwe Yoonse) wakaamba ayi: “Tuli lubasu lwa cintu cipa kwaamba ayi bantu nsengwe yoonse babe muluumuno. Tulyeelete kunoolemeka luyaando lwa shisekano, nkokwaamba ayi bantu boonse kunookala muluumuno alimwi mulucatano nabi kwaamba ayi soonse tulipusene.”

 Sa ncakwiila shisekano inga shapa kwaamba ayi bantu bakale muluumuno akuba bacatene? Sa kulaakubawo ciindi ndyeshi kukabe luumuno alucatano lwancinencine?

 Shisekano shiliiko mwaaka uno shitoopa kwaamba ayi bantu batanoyeeyabo pamakani ashisekano. Shisekano shayuminisha bunene kutanyumfwana alimwi ashamapolitiki isho shipa kwaamba ayi bantu batabi bacatene. Ishi shileelikaawo lwaanguluko bantu ndobacite, kusalululana kwa shikanda, lwaanguluko lwakwiiya muntu ndwaacite teshi mulandu ankwaapaila alimwi akulyatililana.

 Shisekano bantu nshobabaasho mbuli sha baabo baswa mushishi shipusenepusene shilapa kwaamba ayi basangalale. Nacibi boobo, shisekano ishi shilatondesha ayi bantu balayeeya akucita shintu shipa kwaamba ayi bapansaane, akubayuminisha kutolelela kuyeeya akucita shintu sheenka isho muciindi cakucita shintu sheenga shapa kwaamba ayi babe aluumuno alucatano lwancinencine.

 Baibo yakaambila limwi ayi bantu balaakuba amibo yeshi ikape kwaamba ayi cikabe ciyumu kuba bacatene. (2 Timoti 3:1-5) Kwaamba ayi mwiiye shiinji pa bushinshimi ubu bwamu Baibo, amubelenge mutwi wamu Chitonga waamba ayi “Sena Bbaibbele Lyakaambilalimwi Bantu Mbobanikuyeeya Akucita Zintu Mazuba Aano?”

 Mu Baibo muli makani eenga atucafwa kushoma ayi ncakwiila pacishi palaakuba luumuno alucatano. Ilashomesha ayi bantu boonse pacishi balaakuba bacatene ndyeshi bakanokweendeleshekwa a mfulumeende yakwiculu iitwa ayi ‘Bwaami bwakwe Lesa.’​—Luka 4:43; Mateyo 6:10.

 Yesu Klistu Mwaami wa Bwaami ubu, alaakupa kwaamba ayi bantu nsengwe yoonse bakanookala muluumuno. Baibo ilaamba ayi:

•   ‘Baluleme balaakuswitilila alwalo luumuno lulaakufula.’​—Kulumbaisha 72:7.

•   ‘Alaakufuna bakandu abo bamulilila kwaamba ayi abacaafwe . . . Alaakubapulusha kuswa kubantu babalyatilila akubaabo bakali.’​—Kulumbaisha 72:12, 14.

 Nabibo munshiku shino, makani Yesu ngakalinga kwiisha apa kwaamba ayi bantu baanji abuumbi babe bacatene mushishi shili 239. Mbuli Beneklistu, Bakamboni Bakwe Yehova nsengwe yoonse, bakeeya bwakukala muluumuno abamwi. Kwaamba ayi mushibe shakabacafwa, amubelenge Njashi Yamulindilishi yamu Chitonga icite mutwi waamba ayi “Kumana Penzi Lyakusulaikana.”