Pa 19 May, 2022, ba United Nations Security Council bakanyumfwa kuswa ku bacinenenene ba mfulumende beendilila 75 kabaamba ayi “lipenshi lyakubula cakulya lyakatalika ceebo ca bulwashi bwa COVID-19 alimwi aceebo ca kwaaluka kwa muuwo mboopuupa, litoya bukomenenaako nsengwe yoonse ceebo ca nkondo ili ku Ukraine.” Ici citosansulula ayi mumisena imwi nsala itokwiindaawo. Lyalo tapana kwiinda aciindi cilaamfu ba Economist bakoolobesha ayi “mucishi muli kale mapensho aanji, sombi ceebo ca nkondo, bantu batofulilaako ano beshi banoopenga kunsala.” Baibo yakaambila limwi ayi munshiku shino kulaakuba nsala, sombi alimwi ilatulwiita a sheenga shatucafwa kuliyumya ndyekuli nsala.

•    Yesu wakaambila limwi ayi “Mushobo umwi ulaakubukila ubye, abwalo buleelo bulaakubukila bulelonyina. Kulaakuba nsala . . . mumisena ipusenepusene.”—Mateyo 24:7.

•    Libuku lya Ciyubululo lilaamba pa basankwa bacikoshanyo batantite pamaaki. Womwi pa basankwa aba aleemikaninako nkondo. Lyalo ukonkelaawo aleemikaninako nsala, ciindi shakulya ndyeshi shikaceye abuumbi akuulishikwa pa mitengo idulite abuumbi. ‘Mpomunyaawo mwakaswa liaki limwi, lyalo lyakalinga kushiya. Wakalinga kutantiteewo wakalinga kucite cipimo mulyaansa. Pesule, ndakanyumfwa cakalinga kunyumfwika anga ndiswi . . . Kalyaamba ayi, ‘Cipimo comwi ca witi cakalinga kuulwa maali ayo muntu ngeenga wasebensela pabushiku alimwi shipimo shotatwe sha maila shakalinga kuulwa bweenka ubo.’’—Ciyubululo 6:5, 6.

 Bushinshimi ubu bwamu Baibo bwaamba pa makani akuceya kwa shakulya butookumanishikwa munshiku shino Baibo nsheyaamba ayi ‘inshiku shakweelaako.’ (2 Timoti 3:1) Kwaamba ayi mwiiyilewo ashimwi pa makani a “nshiku shakweelaako” alimwi apa basankwa bone batantite pa maaki baambwa mulibuku lya Ciyubululo, amweebele vidyo icite mutwi utokwaamba ayi Shintu Shakaaluka Pacishi Kuswabo mu 1914 akubelenga makani mu Chitonga acite mutwi utokwaamba ayi “Basimabbiza Bone—Ino Mbaani?”

•    Baibo ilicite makani eenga atucafwa kuliyumya ndyetutokwiinda mubukaalo buyumu, kwiilikaawo aciindi shakulya ndyeshaceya na kudula. Amubone shimwi sheenga shamucafwa mumutwi wamakani mu Chitonga utokwaamba ayi “Mbomukonzya Kuubya-ubya Bukkale Bwanu.”

•    Alimwi Baibo ilatushomesha ayi shintu shilaakuba kabotu kunembo. Ilatushomesha ayi kulaakuba ciindi ndyeshi kukabe “shili anga ngamaila shiinji mucishi” alimwi bantu boonse balaakuba ashakulya shiinji. (Kulumbaisha 72:16) Kwaamba ayi mwiiyilewo shiinji pa shishomesho shamu Baibo shaamba buumi mbweshi bukabe kunembo alimwi a nceenga mwashomena nsheyaamba, amubelenge makani mu Chitonga acite mutwi utokwaamba ayi “Bulangizi Bwini-bwini Bwabuumi Bubotu Kumbele.”