Bubiibi bwansoni: Insoni inga shapa kwaamba ayi mutabi abeshicibusa bali kabotu akwiindwa shintu shibotu mubuumi.

 Bubotu mbwakwaamba ayi: Teshi lyoonse insoni ndyeshitabete kabotu. Inga shamucafwa kuyeeyawo kabotu kamutana kwaamba, kubona shintu munshila yeelete alimwi akukutika cakubikila maano.

 Cisangalasha ncakwaamba ayi: Lipenshi lya nsoni inga lyamana. Aboobo tamweelete kusuminisha nsoni kumweendelesha. Mutwi uyu utoomucafwa kushiba mbweenga mwacileka kunyumfwa nsoni.

•  Amushishibe kabotu shintu shimupa kuloonda

•  Nshomweelete kucita

•  Bacanike babyaanu nshobaamba

 Muntu unyumfwa nsoni cilamubeta ciyumu kubandika abantu kabalanga pa meenso. Aboobo inga walinyumfwa kuba eenka akulinyumfwabo anga ali mucipinda mushiya mbi. Cilaloondesha kulicana mubukaalo ubo. Sombi na mwashiba kabotu shintu shimupa kuloonda, inga mwesa mukushiba ayi tamweelete kuloonda. Amuleke tubandike pashakubonenaako shotatwe shitokonkelaawo.

•   Kuloonda #1: “Nshicishiiwo makani ngoonjelete kubandika”

   Cancine: Bantu tabeebaluki bunene shintu nshomwaamba, sombi mbobalinyumfwa ceebo ca nshomwaamba anshomucita. Inga mwacileka kuloonda na kamukutika cakubikila maano, akusuna kunyumfwisha bantu bamwi nshebatokwaamba.

   Ncomweelete kuyeeyawo: Ino ngushicibusa wa buyani ngomusuni—sa ngumuntu waamba bunene na muntu ukutika cakubikila maano?

•   Kuloonda #2: “Bantu balayeeya ayi ndabapa kulinyumfwa kuumuninwa.”

   Cancine: Bantu mbweshi banokwaamba na muli bansoni nabi sobwe. Inga mwacileka kuloonda kwiinda mukubatondesha bwiine mbomubete, lyalo beene inga bashiba kabotu mbomubete.

   Ncomweelete kuyeeyawo: Na mulayeeya ayi bantu boonse balamubona munshila itabete kabotu, mpashi ndimwe nomubabona munshila iyo kwiinda mukunobayeeyela ayi tabamusuniiwo.

•   Kuloonda #3: “Ntolinyumfwa cibiibi na ŋambe cintu citabete kabotu.”

   Cancine: Soonse cimwi ciindi mbotulinyumfwa. Inga mwacileka kuloonda kwiinda mukubona shilubo shanu kuba coolwe cakutondesha bantu ayi tamumaninite.

   Ncomweelete kuyeeyawo: Sa tamunyumfwi kabotu kucanika abantu basumina ayi tabamaninite?

 Sa mulicishi? Bantu bamwi balayeeya ayi tabacite nsoni ceebo cakwaamba ayi balatuma mameseji abuumbi. Sombi cilaba cuubu kuba abeshicibusa bancinencine na katuli pomwi ambotutobandikaabo. Musankwa wa liina lya Sherry Turkle uyo wakeeya shakupangapanga alimwi abantu mbobayeeya, wakalemba ayi: “Tulaba abushicibusa buyumu abamwi na katuba pomwi ambabo akunoonyumfwa maswi abo.” a

•   Amuleye kulyeelanya kubamwi. Tamweelete kulyeelanya kubamwi kwiinda mukuba muntu waangulukite abuumbi kubandika. Sombi luyaando lwanu lulyeete kuba lwakuceshako nsoni kwaamba ayi muteendwi coolwe cakuba abeshicibusa bali kabotu alimwi ashintu shibotu.

   “Tamuyandiki kuba amibandi ilaamfu, alimwi tamuyandiki kuba muntu ushibikitwe ayi alabandika abuumbi. Nceenga mwayandika kucita nkulwiitakobo umwi utamushi kabotu liina lyanu, na kumwiipushako miipusho iniini.”​—Alicia.

   Njisho yamu Baibo: “Muntu woonse ulyeelete kubona milimo yakwe mbuli mbweebete. Na ili kabotu, inga walisumpula ceebo ca njiyo, cakuteelanya aya umwi muntu.”​—Bene Galatiya 6:4.

•   Amulangilishe cakubikila maano. Munoobona bantu baanguluka pakubandika mbobacita ndyebatobandika abamwi. Ino nshiinshi shibacafwa? Ino nshiinshi shibashuupa cimwi ciindi? Ino ninshila nshi nshebasebensesha nsheenga mweeyako?

   “Munoobona nshobacita abo mbocibeta cuubu kuba abeshicibusa. Munoobona nshobacita anshobaamba na bakumana amuntu ngobateshi.”​—Aaron.

   Njisho yamu Baibo: “Bweenka ceela mbocinonwa kuceelanyina, mbweeke ubo muntu mbwaapekwa maano ku muntunyina.”​—Tushimpi 27:17.

•   Amwiipushe miipusho. Linji bantu balasuna kwaamba mbobayeeya pamakani amwi, aboobo kwiipusha miipusho inga kwamucafwa kutalika mubandi ambabo. Alimwi kulacafwa bantu kutabikila bunene maano kuli ndimwe.

   “Kulibambilila limwi inga kwamucafwa kuceeshako kulisukama. Inga mwayeeyela limwi makani nabi miipusho njeenga mwasuna kwiipusha kamutana kuya kucakucitika, kwaamba ayi na mwacaana muntu ngomuteshi cimubete cuubu kutalisukama bunene.”​—Alana.

   Njisho yamu Baibo: ‘Munoobikila maano kushintu shicafwa bamwi kuteshibo kusheesho shicafwa ndimwe nweenka.’​—Bene Filipi 2:4.