MIIPUSHO BACANIKE NJOBEEPUSHA
lno Inga Ndacita Buyani Kwaamba Ayi Ndeye Kuyeeya Kutabete Kabotu?
Ino mulalibona ayi muli muntu uli buyani?
Uyeeya bunene pashintu shibotu sheenga shacitika
“Ndeelesha bunene kuba muntu usangalete akuleya kukalala. Ndisunishi bunene kumweeta mweeta akuba usangalete bushiku abushiku.”—Valerie.
Uyeeya bunene pashintu shibiibi sheenga shacitika
“Lyoonse na kwacitika cintu cibotu, ndayeeya ayi ncakubeca.”—Rebecca.
Ubona shintu munshila yeelete
“Lyoonse na kanjeyela ayi kutoocitika shintu shibotu, lyalo kwacitika cintu cibiibi ndalinyumfwa cibiibi abuumbi. Alimwi na lyoonse kanjeeya ayi kutoocitika shibiibi, nshibiiwo alusangalalo. Kubona shintu munshila yeelete kulancafwa kutanoyeeyelabo shibotu na kunoyeyabo pashintu shibiibi sheenga shacitika.”—Anna.
Ino nceebonshi cilayandika abuumbi kushiba mbomubete?
Baibo ilaamba ayi ‘muntu ucite moyo usangalete ali anga ngumuntu uba akusekelela bushiku abushiku.’ (Tushimpi 15:15) Ncakwiila kwaamba ayi bantu baleya kunoyeeyabo pashintu shibiibi sheenga shacitika alimwi babikila maano kushintu shibotu mubuumi bwabo akubamwi, balaba basangalete. Alimwi liinji balaba abeshicibusa baanji. Na muntu kayeeyabo pashintu shibiibi lyoonse, inga wababo abeshicibusa baniini.
Nabi kwaamba ayi inga kamubona shintu munshila yeelete, cimwi ciindi shintu inga shamuyumina mubuumi. Kucakubonenaako:
Panyusi inga kamunyumfwa makani aamba pankoondo, kupondoka, nabi shintu shimwi shibiibi.
Mpashi inga kamucite mapensho mumukwashi wanu.
Ncakutatoonsha kwaamba ayi kuli mbasu shimwi momutaciti kabotu.
Mpashi shicibusa wanu inga wamukalasha kwiinda mushintu nsheenga waamba na nsheenga wacita.
Muciindi cakusuulakobo ku mapensho ayo na kunooyeeyabo pamapensho ayo lyoonse, mulyeelete kushiba ayi shamushobo uyo inga shacitika. Kushiba ayi shamushobo uyo inga shacitika inga kwamucafwa kutanooyeeyabo pashintu shibiibi alimwi teshi mukanoolinyumfwa cibiibi abuumbi.
Inga mwacikonsha kuliyumya mumapensho, akushoma cakutatoonsha ayi bushiku bumwi mapensho alaakumana
Nsheenga mwaciita
Amushibe ayi tamumaninite alimwi cimwi ciindi inga mwaciita cilubo.
Baibo ilaamba ayi: ‘Taaku muntu ululeme pacishi ca panshi uyo ucita shintu shiluleme lyoonse, kutabishaawo napaceyi.’ (Shikushimikila 7:20) Shilubo nsheenga mwaciita shilatondesha ayi tamumaninite, alimwi tacisansululi ayi taaku mbomubete.
Nsheenga mwaciita kwaamba ayi munoobona shintu munshila yeelete: Munokweelesha kunocita kabotu mushintu nshomubona ayi tamuciti kabotu, alimwi munokwiibaluka ayi tamumaninite. Musankwa wacanike waliina lya Caleb wakaamba ayi, “Nshibikili bunene maano pashilubo shangu cakwaamba ayi ndalinyumfwa kulefuka. Muciindi cakucita boobo, ndeelesha kwiiya kuswa kushilubo nshondakacita kwaamba ayi ntakashiboshiiwo alimwi.”
Amuleye kulyeelanya kubamwi.
Baibo ilaamba ayi: “Tatweelete kunoolisumpula, kunookalashanya nabi kunoonyumfwilana munyono.” (Bene Galatiya 5:26) Kulangilisha shikope shili pa intaneti shitondesha shakucitika shimwi nshebatakwe kumwiitako, inga kwamupa kulinyumfwa cibiibi. Inga kwamupa kunoobona beshicibusa banu mbuli balwani banu.
Nsheenga mwaciita kwaamba ayi munoobona shintu munshila yeelete: Mulyeelete kushiba ayi teshi kucakucitika cili coonse nceenga bamwiita ayi mucanikeeko. Alimwi shikope bantu nshobabika pa intaneti inga tashimucafwiiwo kushiba kabotu muntu mbwaabete. Mwanakashi cikula bwangu waliina lya Alexis wakaamba ayi, “Shikope bantu nshobabika pa intaneti liinji shilatondeshabo shibotu shakacitika mubuumi bwabo. Tabatondeshi shintu shoonse shakabacitikilaawo na shibacitikila bushiku abushiku.”
Amweeleshe kuba muntu shiluumuno—bunene bunene mumukwashi wanu.
Baibo ilaamba ayi: “Na kacikonsheka, mulyeelete kwikala muluumuno abantu boonse.” (Bene Loma 12:18) Nabi kwaamba ayi tamucitewo nkusu shakwaalula shintu bamwi nshobacita, mulicite nkusu shakwaalula nshomucita. Inga mwasalawo kuba muntu shiluumuno.
Nsheenga mwaciita kwaamba ayi munoobona shintu munshila yeelete: Munokweelesha cankusu kuleya kucita sheenga shapa kwaamba ayi mapensho ali mumukwashi akomeneneeko. Sombi amweeleshe kuba muluumuno abamumukwashi wanu bweenka mbweenga mwaciita kubeshicibusa banu. Cikula bwangu waliina lya Melinda wakaamba ayi, “Ceebo cakwaamba ayi soonse tatumaninite, cimwi ciindi inga twaamba nabi kucita shintu sheenga shakalasha bamwi. Aboobo tulayandika kusalaawo kuba muluumuno nabi sobwe.”
Amwiiye kuba amubo wakulumba.
Baibo ilaamba ayi: ‘Amube amyoyo yakulumba.’ (Bene Kolose 3:15) Na kamulumba, mulakunobikila maano kushintu shibotu shicitika mubuumi bwanu kwiinda kubikila maano kushintu nshomutasuni.
Nsheenga mwaciita kwaamba ayi munoobona shintu munshila yeelete: Amushibe mapensho ngomucite, sombi tamweelete kunoolubako shintu shibotu shicitika mubuumi bwanu. Mwanakashi wacanike waliina lya Rebecca wakaamba ayi, “Bushiku abushiku ndalemba cintu comwi cibotu cacitika pa bushiku ubo. Nabi kwaamba ayi ndicite mapensho, ndasuna kunokwiibaluka shintu shibotu shiinji shicitika.”
Amuyeeye pa beshicibusa mbomucite.
Baibo ilaamba ayi: ‘Kusekana abantu babiibi kulanyonyoola mibo ibotu.’ (1 Bene Kolinto 15:33) Na bantu mbomusekanaabo balicite mibo ibiibi, myaambo ibiibi alimwi lyoonse balabonabo shibiibi mubamwi, amwebo mulaakuba mbuli mbabo.
Nsheenga mwaciita kwaamba ayi munoobona shintu munshila yeelete: Na beshicibusa banu batokwiinda mubukaalo buyumu abuumbi, inga batalika kulinyumfwa cibiibi akulefuka. Amucite nsheenga mwacikonsha kwaamba ayi mubacaafwe, sombi tamweelete kusuminisha mapensho abo kumupa kunoolisukama abuumbi. Mwanakashi wacanike waliina lya Michelle wakaamba ayi, “Tatweelete kunoocanikabo abantu bayeeyabo pashintu shibiibi sheenga shacitika.”
Munoobelenga makani eenga amucafwa kuyeeya pashintu shibotu
Tutookala muciindi Baibo ncoyaamba ayi ‘kulaakuba shiindi shiyumu abuumbi.’ (2 Timoti 3:1) Sa cilamubeta ciyumu kunoyeeya pashintu shibotu ceebo cakwaamba ayi kuli shintu shiinji shibiibi shitocitika mucishi? Amubelenge mutwi waamba ayi “Ino Nceebonshi Mapensho Ncaafulila?”
