Bwaami bwakwe Lesa bulaakunyonyoola mfulumeende sha bantu shoonse akutalika kweendelesha cishi coonse. (Danyelo 2:44; Ciyubululo 16:14) Ishi na shikacitike, Bwaami bwakwe Lesa . . .

•   Bulaakukushaawo bantu bacita shibiibi, abo batupensha ceebo cakulisuna. “Bamucita shibi balaakukashikwa kwikala mucishi.”—Tushimpi 2:22.

•   Bulaakukushaawo nkoondo. ‘[Lesa] alaakumana nkoondo mucishi ca panshi coonse.’—Kulumbaisha 46:9.

•   Bulaakuleta lumuuno akupa kwaamba ayi bantu banokala kabotu pacishi. “Muntu womwi awomwi ulaakunookala muluumuno pakati ka minyansa yakwe ashisamu shakwe sha nkuyu. Ncakwiila taaku eshi akamuloondeshe.”—Mika 4:4.

•   Bulaakupa kwaamba ayi cishi cikabe paladaiso. “Luyanga lulaakusangalala alyalo liwesa lilaakusangalala akusapula maluba.”—Isaya 35:1.

•   Bulaakupa kwaamba ayi bantu boonse bakabe anciito shibotu nsheshi bakanoosangalala kusebensa. “Bantu mbondakasala balaakunoolya nkasaalo yabo cakwiishishaawo. Teshi bakanoosebenselawo citacite mpindu.”—Isaya 65:21-23.

•   Bulaakukushaawo malwashi. ‘Taakuwo muntu nabi womwi ukala mucishi eshi akaambe ayi: ‘Ndaciswa.’’—Isaya 33:24.

•   Bulaakukushaawo kucembela. ‘Mubili wakwe aubote kwiinda wa mwaana muniini. Aboolele kubucikula bwangu ndyaakalinga kucite nkusu.’—Jobo 33:25.

•   Bulaakupa kwaamba ayi bantu bakafwa bakabushikwe. ‘Bafu boonse balaakunyumfwa liswi lyakwe [Yesu] akuswa mushuumbwe.’—Joni 5:28, 29.