Amagedoni ni nkoondo yakweelaako Lesa ndyeshi akanyonyoole bweendeleshi bwa bantu boonse. Mfulumeende ishi alimwi abaabo bali kulubasu lwa nshisho balapikisha Lesa kwiinda mukukaka bweendeleshi bwakwe. (Kulumbaisha 2:2) Inkoondo ya Amagedoni ilaakunyonyoola bweendeleshi bwa bantu cakumaninina.—Danyelo 2:44.

 Liswi lyakwaamba ayi “Amagedoni” lilacanikabo linkanda lyomwi mu Baibo pa Ciyubululo 16:16. Alimwi libuku lya Ciyubululo lyakaamba ayi ‘bamaami boonse bapacishi’ balaakubunganishikwa “pabushiku bunene bwakwe Lesa Shinkusu shoonse” ‘kumusena wiitwa ayi Amagedoni mu ciEbulu.’—Ciyubululo 16:14.

 Ino mbaani beshi bakalwane nkoondo ya Amagedoni? Yesu Klistu alaakutanjilila bashilumamba ba kwiculu kukoma balwani bakwe Lesa. (Ciyubululo 19:11-16, 19-21) Balwani aba baleelikaawo abaabo bakaka bweendeleshi bwakwe Lesa alimwi abaabo batalemeki liina lyakwe.—Esekelo 39:7.

 Sa inkoondo ya Amagedoni ilaakubeta ku Middle East? Sobwe. Inkoondo ya Amagedoni teshi ikabebo kumusena womwi, sombi ilaakubaako cishi coonse.​—Jelemiya 25:32-34; Esekelo 39:17-20.

 Liswi lyakwaamba ayi Amagedoni, na “Har–​Magedon” (mu ciEbulu Har Meghiddohnʹ), lilasansulula ayi “Kalundu ka Megido.” Megido lyakalinga liina lya ndabala yakale kale mucishi ca bene Isilaeli. Makani akale kale alatondesha ayi kumusena uyu bantu nkobakalinga kulwanina nkoondo kushikila bamwi bakomwa, kwiilikaawo ankoondo shimwi shilembetwe mu Baibo. (Boomboloshi 5:19, 20; 2 Baami 9:27; 23:29) Nacibi boobo, Amagedoni teshi musena uli pafwiifwi andabala ya Megido yakalingaako kale kale. Kumusena uyu taakuwo kalundu kanene balwani bakwe Lesa boonse mpeenga bakwana, nabibo kwiilikaawo a Cinyika ca Jesiliilu. Aboobo inkoondo ya Amagedoni nciindi shishi shoonse ndyeshi shikabungane pomwi mukweelaako kulwana bweendeleshi bwakwe Lesa.

 Ino shintu shilaakuba buyani paciindi ca nkoondo ya Amagedoni? Nabi kwaamba ayi tatucishiiwo Lesa nsheshi akasebenseshe pakunyonyoola bantu, tulicishi ayi inga wasebensesha nshila shipusenepusene mbuli imfula ya mabwe, shitentaanshi, imfula inene abuumbi, mulilo unyaka asalufa, tulumba alimwi amalwashi. (Jobo 38:22, 23; Esekelo 38:19, 22; Abakuku 3:10, 11; Sekaliya 14:12) Inkoondo ya Amagedoni ilaakupa kwaamba ayi balwani bakwe Lesa bamwi bapilinganishikwe akutalika kucayana beene abeene, sombi balaakusa mukushiba ayi Lesa ngotobalwana.—Esekelo 38:21, 23; Sekaliya 14:13.

 Sa Amagedoni ilaakuba ngomamanino a cishi? Amagedoni teshi ikanyonyoole cishi cino, mukwiinga Lesa wakapa bantu cishi kwaamba ayi banokalaamo kwamuyayaya. (Kulumbaisha 37:29; 96:10; Shikushimikila 1:4) Aboobo inkoondo ya Amagedoni teshi ikanyonyoole bantu boonse, sombi ilaakupa kwaamba ayi bantu bamwi bakapuluke. Baibo ilatondesha ayi ‘likoto linene’ lyabasebenshi bakwe Lesa balaakupuluka.​—Ciyubululo 7:9, 14; Kulumbaisha 37:34.

 Mu Baibo, liswi lyakwaamba ayi “cishi,” cimwi ciindi lilasansulula bantu bacita shintu shibiibi abo batanyumfwili Lesa. (1 Joni 2:15-17) Aboobo Amagedoni ilaakuleta “mamanino acishi” ici, nkokwaamba ayi kunyonyoola bantu bacita shintu shibiibi.—Mateyo 24:3.

 Ino Amagedoni ilaakubako lili? Yesu ndyaakalinga kwaamba pa ‘mapensho anene’ ayo eshi akatolelele kushikila Amagedoni ndyeshi ikatalike, wakaamba ayi: “Pamakani a bushiku bwakwisa nabi ciindi, taakuwo nabi womwi ushi. Baanjelo boonse ba kwiculu tabeshi, nabi Mwanaamuntu teeshiiwo, sombibo baTa beenka.” (Mateyo 24:21, 36) Nacibi boobo, Baibo ilatondesha ayi Amagedoni ilaakusa paciindi ca kubaako kwakwe Yesu uko kwakatalika mu 1914.—Mateyo 24:37-39.