Ngomweebenaakwe waamba na kucita cintu camukalasha, ano mwebo mwaciita anga tamuna kukalala. Sombi lakwe wabona ayi mwakalala mpeeke watalika kumwiipusha kwaamba ayi mwaambe cabica. Lyalo ndyaacita boobo mweendaawo kukalala. Ino inga mwacita buyani kwaamba ayi mutakalali cakwiindilila na shamushobo uyu shacitika?

•  Nshomweelete kushiba

•  Nsheenga mwaciita

•   Kukalala inga kwapa kwaamba ayi muciswe. Beshikulangoola makani bakacana ayi kukalala cakwiindilila inga kwapa kwaamba ayi muntu aciswe BP, bulwashi bwaku moyo, kulisukama abuumbi akuciswa mumala. Alimwi bakacana ayi kukalala nkokupa kwaamba ayi bamwi baciswe stroko, malwashi apamubili akuba acilabila. Ncoceeco Baibo ilaamba ayi: “Talamuka kukwaanga mikonya, ee, leka kukalala . . . , ceebo ico cilaletela mapensho.”​—Kulumbaisha 37:8.

•   Kucita anga tamuna kukala akwalo inga kwaleta mapensho amwi. Kutolelela kukalala kuli anga mbulwashi bwa mumubili bamwi mbweenga tabashibi ayi muntu ngumulwashi. Bulwashi bwamushobo uyo bulaya cicaya muntu paniini paniini. Kucakubonenaako, inga mwatalika kunoyeeya ayi bantu boonse tababete kabotu. Kuyeeya boobo inga kwapa kwaamba ayi cimuyumine kukala abamwi alimwi inga kwanyonyoola cikwati canu.

•   Munoobona mibo ibotu ngomweebenaakwe njaacite. Amulembe shintu shotatwe nshomusuni pa wooyo ngomweebenaakwe. Na uyo ngomweebenaakwe akaambe nabi kucita cintu ceshi cikamukalashe, mukayeeye pa shintu shibotu nshomwakalemba. Kucita boobo kulaakumucafwa kutakalala cakwiindilila.

   Njiisho yamu Baibo: ‘Amutondeshe ayi mulalumba.’​—Bene Kolose 3:15.

•    Munoolekelelana. Cakutaanguna, munokweelesha kubona shintu kweelana angomweebenaakwe mbwashibona. Kucita boobo kulaakumucafwa kunokonkela Baibo nshoyaamba, nkokwaamba ayi ‘kunomuyeeyelaako.’ (1 Pita 3:8) Lyalo amuliipushe ayi, ‘Sa calengesha ayi nkalale ncinene abuumbi cakwaamba ayi inga nshimulekeleliiwo?’

   Njiisho yamu Baibo: ‘Ncibotu . . . kusuula shilubo.’​—Tushimpi 19:11.

•    Munokwaamba mbomutolinyumfwa munshila ili kabotu alimwi yeenga taikalashi ngomweebenaakwe. Ndyemutobandikishanya, mutanoopa milandu ngomweebenaakwe. Kucakubonenaako, muciindi cakwaamba ayi, “Na tamuna kuntumina fooni kundwita nkomubete, mulatondesha ayi tamumbikiliko maano,” inga mwaamba ayi, “Ndalisukama abuumbi na kwashiya lyalo kantacishiiwo nkomubete.” Kwaamba mbomutolinyumfwa cakukalika moyo, inga kwamucafwa kutanokalala cakwiindilila.

   Njiisho yamu Baibo: ‘Ciindi coonse myaambo yanu ibe ya nkuumbu alimwi iyaka bamwi.’​—Bene Kolose 4:6.

•    Munookutika cabulemu. Pesule lyakwaamba mbomutolinyumfwa, amumupe ciindi ngomweebenaakwe kwaamba ayi alakwe aambe, kwakubula kumunjila mukanwa. Na wamanisha kwaamba, amwiindulukeemo kwaamba ayi mushibe na mwanyumfwishisha nshaamba. Na ngomweebenaakwe kamumukutika ndyaatokwaamba, cilaakumucafwa kutanokalala cakwiindilila.

   Njiisho yamu Baibo: ‘Muntu uli woonse alyeelete kufwambaana kukutika, kucelwa kwaamba.’​—Jemusi 1:19.