Nedda, ensi tejja kuzikirizibwa, kwokebwa muliro, oba okuggibwawo. Bayibuli eraga nti Katonda yatonda ensi ng’ayagala abantu bagibeeremu emirembe gyonna.

•   “Abatuukirivu balisikira ensi, era baligibeeramu emirembe gyonna.”—Zabbuli 37:29.

•   ‘[Katonda] yateeka ensi ku misingi gyayo; teriggibwa mu kifo kyayo emirembe n’emirembe.’—Zabbuli 104:5.

•   “Ensi ebeerawo emirembe n’emirembe.”—Omubuulizi 1:4.

•   “Eyatonda ensi, eyagikola n’aginyweza, . . . teyagitondera bwereere, wabula yagitonda okubeeramu abantu.”—Isaaya 45:18.

 Katonda tajja kukkiriza bantu kwonoonera ddala butonde bwa nsi oba okugisaanyaawo nga bayitira mu ntalo oba mu ngeri endala. Mu kifo ky’ekyo ajja “kuzikiriza abo aboonoona ensi.” (Okubikkulirwa 11:18) Ekyo anaakikola atya?

 Katonda ajja kuggyawo gavumenti z’abantu eziremereddwa okulabirira ensi ateekewo Obwakabaka bwe obw’omu ggulu. (Danyeri 2:44; Matayo 6:9, 10) Omwana wa Katonda Yesu Kristo ye yalondebwa okuba kabaka w’Obwakabaka obwo. (Isaaya 9:6, 7) Yesu bwe yali ku nsi yalaga nti alina obuyinza ku butonde. (Makko 4:35-41) Yesu bw’anaaba atandise okufuga ensi, ajja kuba n’obuyinza ku nsi yonna ne ku butonde. Ajja kutereeza ensi ebeere ng’olusuku Edeni bwe lwali.—Matayo 19:28; Lukka 23:43.

 Nedda. Endowooza eyo enkyamu eva ku kutegeera obubi ebigambo ebiri mu 2 Peetero 3:7, awagamba nti: “Eggulu n’ensi ebiriwo kati biterekeddwa omuliro.” Ka tulabe ebisobola okutuyamba okutegeera amakulu g’ebigambo ebyo:

1.   Bayibuli ekozesa ebigambo “eggulu,” “ensi,” “n’omuliro” ng’etegeeza ebintu bya njawulo. Ng’ekyokulabirako, Olubereberye 11:1 wagamba nti: “Ensi yonna yalina olulimi lumu.” Wano ekigambo “ensi” kitegeeza abantu.

2.   Ennyiriri eziriraanye 2 Peetero 3:7 ziraga amakulu g’ebigambo eggulu, ensi, n’omuliro ebikozesebwa mu lunyiriri olwo. Olunyiriri 5 ne 6 zoogera ku mataba ag’omu kiseera kya Nuuwa. Ennyiriri ezo ziraga nti ensi ey’omu kiseera ekyo yazikirizibwa. Kyokka abantu ababi be baazikirizibwa naye ensi kwe tuli yasigalawo. (Olubereberye 6:11) Ate era amataba ago gaasaanyawo “eggulu” kwe kugamba abantu abaali bafuga mu kiseera ekyo. Nuuwa n’ab’omu maka ge baawonawo ne beeyongera okubeera ku nsi oluvannyuma lw’amataba.—Olubereberye 8:15-18.

 Okufaananako amataba agaaliwo mu kiseera kya Nuuwa, “omuliro” ogwogerwako mu 2 Peetero 3:7 gutegeeza okuzikirizibwa kw’abantu ababi so si ensi kwe tuli. Katonda asuubiza nti wajja kubaawo “eggulu eriggya n’ensi empya, era nga muno obutuukirivu mwe bulibeera.” (2 Peetero 3:13) “Ensi empya” be bantu abakola Katonda by’ayagala, ate “eggulu eriggya” bwe Bwakabaka bwa Katonda obujja okufuga abantu abo. Ensi yonna ejja kufuuka ekifo ekirabika obulungi era ng’erimu emirembe mingi.—Okubikkulirwa 21:1-4.