Yee, ajja kuziddamu. Ebyo bye tusoma mu Bayibuli n’ebyo abantu abatali bamu bye bayiseemu biraga nti ddala Katonda addamu okusaba. Bayibuli egamba nti: “[Katonda] awa abo abamutya bye baagala; awulira okuwanjaga kwabwe n’abanunula.” (Zabbuli 145:19) Naye Katonda okuddamu essaala zo, kisinziira nnyo ku ggwe.

Katonda bye yeetaagisa abo abamusaba

•   Balina okusaba Katonda yekka, so si Yesu, Maliyamu, abatuukirivu, bamalayika, oba ebifaananyi. Yakuwa Katonda yekka ‘y’awulira okusaba.’​—Zabbuli 65:2.

•   Bye basaba birina okuba nga bituukana n’ebyo Katondaby’ayagala, ebiri mu Bayibuli.​—1 Yokaana 5:14.

•   Basaanidde okusaba mu linnya lya Yesu. Mu ngeri eyo baba balaga nti bassa ekitiibwa mu Yesu. Yesu yagamba nti: “Tewali ajja eri Kitange okuggyako ng’ayitidde mu nze.”​—Yokaana 14:6.

•   Bwe basaba tebalina kuba na kubuusabuusa kwonna, era bwe kiba kyetaagisa bayinza okusaba Katonda abongere okukkiriza.​—Matayo 21:22; Lukka 17:5.

•   Balina okuba abeetoowaze era nga beesimbu. Bayibuli egamba nti: “Wadde nga Yakuwa wa waggulu nnyo, alowooza ku beetoowaze.”​—Zabbuli 138:6.

•   Tebalina kukoowa kusaba. Yesu yagamba nti: “Musabenga, muliweebwa.”​—Lukka 11:9.

Katonda by’atatunuulira okusobola okuwulira essaala y’omuntu

•   Eggwanga lyo oba langi yo. “Katonda tasosola, naye mu buli ggwanga omuntu amutya n’akola ekituufu amukkiriza.”​—Ebikolwa 10:34, 35.

•   Engeri gy’olina okubeeramu ng’osaba. Osobola okusaba Katonda ng’otudde, ng’okutamizza ku mutwe, ng’ofukamidde, oba ng’oyimiridde.​—1 Ebyomumirembe 17:16; Nekkemiya 8:6; Danyeri 6:10; Makko 11:25.

•   Okusaba mu ddoboozi eriwulikika oba mu kasirise. Katonda addamu n’essaala ze tusaba mu kasirise wadde ng’abalala bayinza n’obutamanya nti tusaba.​—Nekkemiya 2:1-6.

•   Ensonga zo ka zibe nnene oba ntono. Katonda akukubiriza ‘okumukwasa byonna ebikweraliikiriza kubanga akufaako.’​—1 Peetero 5:7.