Yee. Yesu bwe yali ku nsi yatuukiriza obunnabbi bungi obukwata ku “Masiya Omukulembeze,” eyandibadde “Omulokozi w’ensi.” (Danyeri 9:25; 1 Yokaana 4:14) Era n’oluvannyuma lw’okufa kwe, yeeyongera okutuukiriza obunnabbi obukwata ku Masiya.—Zabbuli 110:1; Ebikolwa 2:34-36.

•  “Masiya” kitegeeza ki?

•  Abantu abasukka mu omu bandisobodde okutuukiriza obunnabbi obukwata ku Masiya?

•  Masiya wa kulabika mu biseera bya mu maaso?

•  Obunnabbi obukwata ku Masiya buli bumeka mu Bayibuli?

•  Obumu ku bunnabbi obukwata ku Masiya Yesu bwe yatuukiriza

 Ekigambo ky’Olwebbulaniya Ma·shiʹach (Masiya) n’eky’Oluyonaani Khri·stos (Kristo), byombi bitegeeza “Eyafukibwako Amafuta.” N’olwekyo, erinnya “Yesu Kristo” litegeeza “Yesu Eyafukibwako Amafuta,” oba “Yesu Masiya.”

 Mu biseera eby’edda, omuntu bwe yalondebwanga okuba mu kifo eky’enjawulo, yafukibwangako amafuta ku mutwe. (Eby’Abaleevi 8:12; 1 Samwiri 16:13) Yesu yalondebwa Katonda okuba Masiya, era ekifo ekyo kya waggulu nnyo. (Ebikolwa 2:36) Naye mu kifo ky’okumufukako amafuta, Katonda yamufukako omwoyo omutukuvu.—Matayo 3:16.

 Nedda. Ng’ekinkumu bwe kiba eky’omuntu omu n’okutuukirizibwa kw’obunnabbi obuli mu Bayibuli kusonga ku Masiya omu oba Kristo. Naye Bayibuli eraga nti “Bakristo ab’obulimba ne bannabbi ab’obulimba balijja, era balikola obubonero obw’amaanyi n’ebyewuunyisa okukyamya abantu, bwe kiba kisoboka bakyamye n’abalonde.”—Matayo 24:24.

 Nedda. Bayibuli yalaga nti Masiya yandivudde mu lunyiriri lwa Kabaka Dawudi owa Isirayiri. (Zabbuli 89:3, 4) Kyokka, ebiwandiiko okuli olukalala lw’Abayudaaya abaava mu lunyiriri lwa Dawudi tebikyaliwo. Oboolyawo Abaruumi baabisaanyaawo bwe baawamba ekibuga Yerusaalemi mu mwaka gwa 70 E.E. a Okuva mu kiseera ekyo, tewali n’omu asobodde kukakasa nti ava mu lulyo olulangira olwa Dawudi. Ku luuyi olulala, Yesu bwe yali ku nsi yalaga nti yali ava mu lunyiriri lwa Dawudi era n’abalabe be tebaakiwakanya wadde ng’ebiwandiiko ebyo byali bikyaliwo.—Matayo 22:41-46.

 Tekisoboka kumanya muwendo gwennyini ogw’obunnabbi obukwata ku Masiya obuli mu Bayibuli. Ng’ekyokulabirako, engeri y’okubalamu obunnabbi eyinza okwawukana ne bwe kituuka ku byawandiikibwa ebirimu obunnabbi obukwata ku Masiya. Isaaya 53:2-7 woogera ku bintu eby’enjawulo ebikwata ku Masiya. Abamu bayinza okutwala ekyawandiikibwa ekyo kyonna ng’obunnabbi obw’omulundi ogumu, ate abalala bayinza okutwala ebintu ebiri mu kyawandiikibwa ekyo ng’obunnabbi obw’emirundi egy’enjawulo.