Ezeekyeri 32:1-32
32 Ku lunaku olusooka olw’omwezi ogw’ekkumi n’ebiri, mu mwaka ogw’ekkumi n’ebiri, Yakuwa era yayogera nange n’aŋŋamba nti:
2 “Omwana w’omuntu, yimba oluyimba olw’okukungubaga olukwata ku Falaawo kabaka wa Misiri, era omugambe nti,
‘Wali ng’empologoma envubuka ey’amaanyi mu mawanga,Naye kaakano osirisiddwa.
“‘Wali ng’ogusolo ogunene ogw’omu nnyanja,+ ng’okuba amazzi mu migga gyo,N’osiikuula amazzi n’ebigere byo, era n’okyafuwaza emigga.’*
3 “Bw’ati Yakuwa Mukama Afuga Byonna bw’agamba:
‘Nja kukozesa ekibiina ky’amawanga amangi kikusuuleko ekitimba kyange,Era bajja kukusikirayo mu kitimba kyange.
4 Nja kukuleka ku lukalu;Nja kukusuula ku ttale.
Nja kusindika ebinyonyi byonna eby’omu bbanga bikugweko,Era nja kukuleka ensolo ez’omu nsiko zikulye zikkute.+
5 Nja kusuula ennyama yo ku nsozi,Era ebiwonvu nja kubijjuza ebisigalira byo.+
6 Nja kuyiwa ku nsi omusaayi gwo ogutiiriika gwanjaale gutuuke ne ku nsonzi,Era gujja kujjula ne mu migga.’
7 “‘Bw’onoozikizibwa, nja kubikka ku ggulu era emmunyeenye zaalyo nzireeteko ekizikiza.
Enjuba nja kugibikkako ebire,Era omwezi tegujja kwaka.+
8 Ebyaka byonna eby’oku ggulu nja kubireetako ekizikiza ku lulwo,Era ensi yo nja kugibikkako ekizikiza,’ bw’ayogera Yakuwa Mukama Afuga Byonna.
9 “‘Nja kunakuwaza emitima gy’abantu bangi bwe nnaatwala abantu bo mu buwambe mu mawanga amalala,Mu nsi z’otomanyi.+
10 Nja kuwuniikiriza amawanga mangi,Era bakabaka baabwe bajja kukankana olw’okutya bwe nnaabagalulira ekitala kyange.
Ku lunaku lw’onoogwa,Bajja kukankana, nga buli omu atya okufiirwa obulamu bwe.’
11 “Bw’ati Yakuwa Mukama Afuga Byonna bw’agamba:
‘Ekitala kya kabaka wa Babulooni kijja kukujjira.+
12 Nja kuleka abantu bo battibwe ekitala ky’abalwanyi ab’amaanyi,Bonna abasingayo obukambwe mu mawanga.+
Bajja kukkakkanya amalala ga Misiri, era abantu baayo bonna bajja kuzikirizibwa.+
13 Nja kuzikiriza ensolo ze zonna eziri okumpi n’amazzi amangi,+Era tewali kigere kya muntu wadde ekinuulo ky’ensolo ekinaddamu okugasiikuula.’+
14 “‘Mu kiseera ekyo nja kulongoosa amazzi gaabwe,Era emigga gyabwe nja kugireetera okukulukuta ng’amafuta,’ bw’ayogera Yakuwa Mukama Afuga Byonna.
15 “‘Misiri bwe nnaagifuula amatongo, ng’ebintu byamu byonna binyagiddwa,+Bwe nnaazikiriza abantu baamu bonna,Bajja kumanya nti nze Yakuwa.+
16 “‘Luno luyimba lwa kukungubaga, era abantu bajja kuluyimba;Abakazi ab’omu mawanga bajja kuluyimba.
Bajja kuluyimbira Misiri n’abantu baamu bonna,’ bw’ayogera Yakuwa Mukama Afuga Byonna.”
17 Ku lunaku olw’ekkumi n’ettaano olw’omwezi, mu mwaka ogw’ekkumi n’ebiri, Yakuwa yayogera nange n’aŋŋamba nti:
18 “Omwana w’omuntu, kungubagira abantu b’e Misiri, ogiserengese wansi mu ttaka, yo n’abantu ab’amawanga ag’amaanyi, awamu n’abo abakka mu kinnya.*
19 “‘Ani gw’osinga okulabika obulungi? Serengeta, ogalamire wamu n’abo abatali bakomole!’
20 “‘Bajja kugwa mu abo abattiddwa n’ekitala.+ Ensi ya Misiri eweereddwayo eri ekitala; giggyeewo n’abantu baamu bonna.
21 “‘Abalwanyi abasingayo okuba ab’amaanyi bajja kuyima wansi emagombe* boogere ne Falaawo n’abamuyamba. Bajja kuttibwa n’ekitala era bajja kuserengeta bagalamire ng’abatali bakomole.
22 Bwasuli ali eyo n’ekibiina kye kyonna. Amalaalo g’Abaasuli geetoolodde kabaka waabwe, bonna battiddwa n’ekitala.+
23 Amalaalo ge gali wansi mu kinnya,* era ekibiina kye kyetoolodde amalaalo ge, bonna battiddwa n’ekitala olw’okuba baaleeta entiisa mu nsi y’abalamu.
24 “‘Eramu+ ali eyo era abantu be beetoolodde amalaalo ge, bonna battiddwa n’ekitala. Baserengese wansi mu ttaka nga si bakomole. Baaleetanga entiisa mu nsi y’abalamu, naye kaakano bali mu buswavu awamu n’abo abakka mu kinnya.*
25 Eramu bamwalidde obuliri awali abo abattiddwa, era amalaalo ge geetooloddwa abantu be bonna. Bonna si bakomole, era battiddwa n’ekitala olw’okuba baaleeta entiisa mu nsi y’abalamu; bajja kuba mu buswavu awamu n’abo abakka mu kinnya.* Ateekeddwa mu abo abattiddwa.
26 “‘Meseki ne Tubali+ bali eyo n’abantu baabwe bonna. Amalaalo gaabwe* geetoolodde kabaka waabwe. Bonna si bakomole era baafumitibwa n’ekitala, olw’okuba baaleeta entiisa mu nsi y’abalamu.
27 Tebaagalamire wamu n’abalwanyi ab’amaanyi abaafa nga si bakomole, abaaserengeta emagombe* n’eby’okulwanyisa byabwe? Bajja kwezizika ebitala byabwe,* era bajja kuteeka ebibi byabwe ku magumba gaabwe, olw’okuba abalwanyi abo ab’amaanyi baaleeta entiisa mu nsi y’abalamu.
28 Naye ggwe ojja kubetenterwa wakati mu abo abatali bakomole, era ojja kugalamira n’abo abattibwa n’ekitala.
29 “‘Edomu+ ali eyo, ne bakabaka be n’abaami be bonna, abaagalamizibwa awali abo abattibwa n’ekitala, wadde nga baali ba maanyi nnyo; nabo bajja kugalamira wamu+ n’abatali bakomole era n’abo abakka mu kinnya.*
30 “‘Abaami ab’omu bukiikakkono bonna bali eyo, awamu n’Abasidoni bonna+ abaaserengeta mu buswavu wamu n’abo abattibwa, wadde nga baaleeteranga abantu entiisa olw’amaanyi gaabwe. Bajja kugalamira nga si bakomole awamu n’abo abattibwa n’ekitala, era bajja kuswalira wamu n’abo abakka mu kinnya.*
31 “‘Falaawo bw’anaalaba abo bonna, ajja kuddamu amaanyi olw’ekyo ekyatuuka ku bantu be;+ Falaawo n’ab’omu ggye lye lyonna bajja kuttibwa n’ekitala,’ bw’ayogera Yakuwa Mukama Afuga Byonna.
32 “‘Olw’okuba yaleeta entiisa mu nsi y’abalamu, Falaawo n’abantu be bonna bajja kuziikibwa n’abatali bakomole, wamu n’abo abattibwa n’ekitala,’ bw’ayogera Yakuwa Mukama Afuga Byonna.”
Obugambo Obuli Wansi
^ Obut., “emigga gyabwe.”
^ Oba, “mu ntaana.”
^ Oba, “mu ntaana.”
^ Oba, “mu ntaana.”
^ Oba, “mu ntaana.”
^ Obut,. “ge.,”
^ Oboolyawo kitegeeza abalwanyi okuziikibwa n’ebitala byabwe, mu ngeri y’okubawa ebitiibwa eby’amagye.
^ Oba, “mu ntaana.”
^ Oba, “mu ntaana.”
