Zabbuli 74:1-23
Masukiri* ya Asafu.+
74 Ai Katonda, lwaki watwesamba emirembe gyonna?+
Lwaki obusungu bwo bubuubuukira* endiga z’omu ddundiro lyo?+
2 Jjukira abantu be* wafuna edda ennyo,+Eggwanga lye wanunula okuba obusika bwo.+
Jjukira Olusozi Sayuuni kwe wabeeranga.+
3 Genda mu kifo ekifuukidde ddala amatongo.+
Omulabe ayonoonye buli kintu eky’omu kifo ekitukuvu.+
4 Abalabe bo baawogganira mu kifo kyo awakuŋŋaanirwa.+
Baasimbamu bbendera zaabwe ng’obubonero.
5 Baali ng’abasajja abagalula embazzi okutema ekibira.
6 Baakozesa embazzi n’emitayimbwa okumenya ebintu byakyo ebyayolebwa.+
7 Baayokya ekifo kyo ekitukuvu.+
Baajolonga weema entukuvu eriko erinnya lyo, ne bagisuula wansi.
8 Bo n’ezzadde lyabwe baagamba mu mitima gyabwe nti:
“Ebifo bya Katonda byonna ebikuŋŋaanirwamu* ebiri mu nsi birina okwokebwa.”
9 Tewakyali bubonero bwe tulaba;Tewakyali nnabbi n’omu,Era kino tewali n’omu ku ffe amanyi bbanga lye kinaamala.
10 Ai Katonda, omulabe alituusa wa okukuvuma?+
Omulabe alivvoola erinnya lyo emirembe gyonna?+
11 Lwaki olemezzaayo omukono gwo, omukono gwo ogwa ddyo?+
Guggye mu kifuba* kyo obasaanyeewo.
12 Naye Katonda ye Kabaka wange okuva edda,Y’oyo akola ebikolwa eby’obulokozi ku nsi.+
13 Wasiikuula ennyanja n’amaanyi go;+Emitwe gy’agasolo aganene ag’omu nnyanja wagibetentera mu nnyanja.
14 Wabetenta emitwe gya Leviyasani;*Wamuwa abantu ababeera mu ddungu bamulye.
15 Wakolera ensulo n’obugga ebituli;+Wakaliza emigga egikulukuta ebbanga lyonna.+
16 Obudde obw’emisana n’obudde obw’ekiro bubwo,Ggwe wakola ekitangaala* n’enjuba.+
17 Ggwe wassaawo ensalo zonna ez’ensi;+Ggwe wassaawo ebiseera eby’omusana n’eby’obutiti.+
18 Ai Yakuwa, jjukira ebivumo by’omulabe,Jjukira engeri eggwanga essirusiru gye livvoola erinnya lyo.+
19 Obulamu bw’ejjiba lyo tobuwaayo eri ensolo ez’omu nsiko.
Obulamu bw’abantu bo abanyigirizibwa tobwerabira mirembe na mirembe.
20 Jjukira endagaano,Kubanga ebitundu by’ensi eby’ekizikiza bijjudde ebifo omuli ebikolwa eby’obukambwe.
21 Oyo alinnyirirwa k’aleme kuggwaamu ssuubi;+Omunaku n’omwavu ka batendereze erinnya lyo.+
22 Ai Katonda, situka weewozeeko.
Jjukira engeri abasirusiru gye bakuvumamu okuzibya obudde.+
23 Teweerabira balabe bo bye boogera.
Okuleekaana kw’abo abatakuwa kitiibwa kwambuka obutasalako.
Obugambo Obuli Wansi
^ Obut., “bunyookera.”
^ Obut., “ekibiina kyo kye.”
^ Oba, “Ebifo byonna Katonda mw’asinzibwa.”
^ Oba, “mu kikondoolo ky’ekyambalo.”
^ Oba, “ekyaka.”
