Yezeberi—Kkwini Omubi
OLUGERO 66
Yezeberi—Kkwini Omubi
OLUVANNYUMA lw’okufa kwa kabaka Yerobowaamu, buli kabaka afuga obwakabaka obw’omu bukiika kkono obw’ebika 10 ebya Isiraeri aba mubi. Kabaka Akabu y’asingayo obubi mu bakabaka bonna. Omanyi lwaki? Ensonga emu enkulu eyavaako ekyo ye mukazi we, Kkwini Yezeberi omubi.
Yezeberi si mukazi Muisiraeri. Muwala wa kabaka w’e Sidoni. Asinza katonda ow’obulimba ayitibwa Baali, era aleetera Akabu n’Abaisiraeri bangi okusinza Baali. Yezeberi tayagala Yakuwa era atta bannabbi be bangi. Abalala beekweka mu mpuku baleme okuttibwa. Yezeberi bw’aba alina ky’ayagala, ayinza n’okutta omuntu okukifuna.
Lumu Kabaka Akabu munakuwavu nnyo. Yezeberi amubuuza: ‘Lwaki oli munakuwavu leero?’
‘Olw’ekyo Nabosi ky’aŋŋambye,’ Akabu addamu. ‘Mbadde njagala okugula olusuku lwe olw’emizabbibu. Naye n’aŋŋamba nti siyinza kulufuna.’
‘Teweeraliikirira,’ Yezeberi addamu. ‘Nja kulukufunira.’
Awo, Yezeberi awandiikira amabaluwa abantu abakulu mu kibuga omusajja oyo Nabosi gy’abeera. ‘Mufuneeyo abasajja abakuusa bagambe nti Nabosi yakolimidde Katonda ne kabaka,’ bw’atyo bw’abagamba. ‘Awo mulyoke, mutwale Nabosi ebweru w’ekibuga mumukube amayinja afe.’
Mangu ddala nga Yezeberi awulidde nti Nabosi afudde, agamba Akabu: ‘Kati genda otwale olusuku lwe olw’emizabbibu.’ Tokkiriza nti Yezeberi asaanidde okubonerezebwa olw’okukola ekintu ekibi bwe kityo?
Bwe kityo, nga wayiseewo ekiseera, Yakuwa atuma omusajja ayitibwa Yeeku okumubonereza. Yezeberi bw’awulira nti Yeeku ajja, yeetonaatona asobole okulabika obulungi. Naye Yeeku bw’ajja n’alaba Yezeberi mu ddirisa, agamba abasajja abali mu lubiri: ‘Mumusuule wansi!’ Abasajja bagondera ekiragiro kye, nga bw’olaba mu kifaananyi. Bamusuula wansi, n’afa. Eno y’enkomerero ya Kkwini Yezeberi omubi.
1 Bassekabaka 16:29-33; 18:1-4; 21:1-16; 2 Bassekabaka 9:30-37.
