ESSOMO 34
Tuyinza Tutya Okukiraga nti Twagala Yakuwa?
Owulira nga weeyongedde okwagala Katonda okuva lwe watandika okuyiga Bayibuli? Wandyagadde okweyongera okunyweza omukwano ogwo gw’olina ne Katonda? Bwe kiba kityo, kijjukire nti gy’okoma okwagala Yakuwa, naye gy’akoma okukwagala n’okukufaako. Oyinza otya okukiraga nti omwagala?
1. Tukiraga tutya nti twagala Yakuwa?
Tukiraga nti twagala Yakuwa nga tumugondera. (Soma 1 Yokaana 5:3.) Takaka muntu yenna kumugondera, wabula awa buli omu akakisa okusalawo obanga anaamugondera oba nedda. Lwaki? Yakuwa ayagala tube “bawulize okuva mu mutima.” (Abaruumi 6:17) Ekyo kitegeeza nti ayagala tumugondere olw’okuba tumwagala, so si lwa buwaze. Ekitundu 3 ne 4 mu kitabo kino bitegekeddwa okukuyamba okukiraga nti oyagala Yakuwa, ng’ofuba okukola by’ayagala era nga weewala okukola by’atayagala.
2. Lwaki oluusi tekiba kyangu okukiraga nti twagala Yakuwa?
“Omutuukirivu aba n’ebizibu bingi.” (Zabbuli 34:19) Ffenna tetutuukiridde. Ate era tuyinza okuba nga twolekagana n’ebizibu by’eby’enfuna, obutali bwenkanya, n’ebizibu ebirala. Bwe tuba mu mbeera enzibu, oluusi kiyinza obutatubeerera kyangu kukola ebyo Yakuwa by’ayagala. Ekyo kiri kityo kubanga okukola ekikyamu kye kiyinza okutubeerera ekyangu mu kaseera ako. Naye bw’ofuba okukola Yakuwa by’ayagala ne mu mbeera enzibu, oba okiraga nti omwagala okusinga ekintu ekirala kyonna. Era oba okiraga nti oli mwesigwa gy’ali. Bw’oba omwesigwa gy’ali naye aba mwesigwa gy’oli. Tayinza kukwabulira.—Soma Zabbuli 4:3.
YIGA EBISINGAWO
Laba ensonga lwaki kikulu nnyo okugondera Yakuwa, era n’ekiyinza okukuyamba okusigala ng’oli mwesigwa gy’ali.
3. Ensonga ekukwatako
Okusinziira ku kitabo kya Yobu, Sitaani alina ekintu eky’obulimba kye yayogera ku Yobu, ne ku bantu bonna abaagala okukola Yakuwa by’ayagala. Soma Yobu 1:1, 6–2:10, oluvannyuma mukubaganye ebirowoozo ku bibuuzo bino:
-
Okusinziira ku Sitaani, lwaki Yobu yali agondera Yakuwa?—Laba Yobu 1:9-11.
-
Kiki Sitaani ky’ayogera ku bantu bonna, nga naawe mw’oli?—Laba Yobu 2:4.
Soma Yobu 27:5b, oluvannyuma mukubaganye ebirowoozo ku kibuuzo kino:
-
Yobu yakiraga atya nti yali ayagala nnyo Yakuwa?
Yobu yakiraga nti ayagala nnyo Yakuwa bwe yasigala nga mwesigwa gy’ali
Ekiraga nti twagala Yakuwa, kwe kusigala nga tuli beesigwa gy’ali
4. Sanyusa omutima gwa Yakuwa
Soma Engero 27:11, oluvannyuma mukubaganye ebirowoozo ku bibuuzo bino:
-
Yakuwa awulira atya bwe weeyisa mu ngeri ey’amagezi era n’omugondera? Lwaki ogamba bw’otyo?
5. Osobola okuba omwesigwa eri Yakuwa
Okwagala kwe tulina eri Yakuwa kutuleetera okubuulira abalala ebimukwatako. Olw’okuba tuli beesigwa gy’ali, ekyo tukikola ne bwe kitaba kyangu. Laba VIDIYO, oluvannyuma mukubaganye ebirowoozo ku bibuuzo bino wammanga.
-
Oluusi kikuzibuwalira okubuulira abalala ebikwata ku Yakuwa?
-
Mu vidiyo, kiki ekyayamba Grayson okuggwaamu okutya?
Kiba kyangu okuba abeesigwa eri Yakuwa bwe tuba nga twagala by’ayagala era nga tukyawa by’akyawa. Soma Zabbuli 97:10, oluvannyuma mukubaganye ebirowoozo ku bibuuzo bino:
-
Okusinziira ku by’oyize, ebimu ku bintu Yakuwa by’ayagala bye biruwa? Ebimu ku bintu by’akyawa bye biruwa?
-
Oyinza otya okuyiga okwagala ebintu ebirungi era n’okukyawa ebibi?
6. Bwe tugondera Yakuwa ffe tuganyulwa
Tuganyulwa nnyo bwe tugondera Yakuwa. Soma Isaaya 48:17, 18, oluvannyuma mukubaganye ebirowoozo ku bibuuzo bino:
-
Olowooza tuyinza okwesiga Yakuwa nti bulijjo abeera amanyi ekisinga okutuganyula? Lwaki ogamba bw’otyo?
-
Okusoma Bayibuli n’okuyiga ebikwata ku Yakuwa Katonda ow’amazima, kikuganyudde kitya?
ABAMU BAGAMBA NTI: “Ebyo bye nkola tebirina ngeri yonna gye bikwata ku Katonda.”
-
Kyawandiikibwa ki ky’oyinza okukozesa okulaga nti Yakuwa akwatibwako olw’ebyo bye tukola?
MU BUFUNZE
Osobola okukiraga nti oyagala Yakuwa ng’omugondera era ng’osigala ng’oli mwesigwa gy’ali ne mu mbeera enzibu.
Okwejjukanya
-
Biki by’oyigidde ku Yobu?
-
Oyinza otya okukiraga nti oyagala Yakuwa?
-
Kiki ekinaakuyamba okusigala ng’oli mwesigwa eri Yakuwa?
LABA EBISINGAWO
Laba engeri gy’oyinza okuba omwesigwa eri Yakuwa n’eri ekibiina kye.
Manya ebintu ebirala eby’obulimba Sitaani by’ayogera ku bantu.
“Yobu Akuuma Obugolokofu Bwe” (The Bible—What Is Its Message? ekitundu 6)
Laba engeri n’abaana abato gye bayinza okukiragamu nti baagala Yakuwa.
Omuvubuka apikirizibwa bavubuka banne okukola ebintu ebibi, ayinza atya okusigala nga mwesigwa eri Katonda?
Era Oyinza Okwagala Okusoma Ebitundu Bino
EBIBUUZO ABANTU BYE BATERA OKWEBUUZA
Enteekateeka y’Abajulirwa ba Yakuwa ey’Okuyigiriza Abantu Bayibuli Ebeera Etya?
Mu nteekateeka y’Abajulirwa ba Yakuwa ey’okuyigiriza abantu Bayibuli, oyinza okukozesa enkyusa ya Bayibuli yonna gy’oyagala. Oyinza okuyita ab’omu maka go bonna oba mikwano gyo ne bakwegattako.
