OLUUSI bwe kityo bwe kyali. Lowooza ku Ekyamateeka 24:14, 15 awagamba nti: “Tolyazaamaanyanga omukozi akolera empeera ali mu bwetaavu era omwavu, k’abe omu ku baganda bo oba omu ku bagwira abali mu nsi yo . . . Bw’otookole bw’otyo, ajja kukaabirira Yakuwa ng’akuwawaabira, era ojja kubaako ekibi.”

Waliwo ekiwandiiko ekikwata ku musango ogw’ekika ekyo ekyawandiikibwa mu kyasa eky’omusanvu E.E.T., ekyasangibwa okumpi ne Asudodi. Kyali kya mupakasi omu ow’omu nnimiro oboolyawo ataasobola kuweza kigero kya mmere ey’empeke kye yalina okuwaayo. Ekiwandiiko ekyo kyawandiikibwa ku kintu eky’ebbumba era kyali kigamba nti: “Omuweereza wo [oyo awaaba] bwe yamaze okutereka bye yakungudde ennaku ntono emabega, Hoshayahu mutabani wa Shobay yazze n’atwala ekyambalo ky’omuweereza wo. . . . Abo bonna be nnabadde nabo nga tukungula ebirime mu musana omungi, banjulira . . . nti ebyo bye njogedde bituufu. Sirina musango gwonna. . . . Gavana bw’aba alaba nti tekimukakatako kulaba nti ekyambalo ky’omuweereza wo kimuddizibwa, nsaba okikole olw’okunkwatirwa ekisa. Tosirika busirisi ng’omuweereza wo talina kyambalo kye.”

Munnabyafaayo ayitibwa Simon Schama yagamba nti: “Ebigambo ebyo tebituyamba kumanya bumanya nti omupakasi oyo yali ayagala nnyo okuddizibwa [ekyambalo kye], naye era bitulaga nti yali alina ky’amanyi ku mateeka ga Musa, naddala ago agali mu kitabo ky’Eby’Abaleevi n’Ekyamateeka agagaana omuntu okuyisa obubi omuntu omwavu.”