Okufaananako Alex, abantu bangi leero tebaagala kukola mirimu gya kukakaalukana. Makanika omu ayitibwa Aaron agamba nti, “Abantu bangi kibaswaza okukola emirimu egitwalibwa ng’egya wansi. Bagamba nti: ‘Ka mmale gakola omulimu guno okutuusa lwe nnaafuna omulimu omulungi.’”

Lwaki abantu bangi tebaagala kukola mirimu gya kukakaalukana? Oboolyawo batwaliriziddwa emikutu gy’empuliziganya, egiraga nti obulamu obweyagaza bwebwo obw’okwejalabya era obutaliimu kukakaalukana. Matthew, akola ogw’okuddaabiriza ebizimbe agamba nti: “Abantu balowooza nti bw’oba olina okukola ennyo okusobola okweyimirizaawo, tosobola kukulaakulana.” Shane, nga naye akola omulimu gwe gumu, agamba nti: “Abantu tebakyakola mirimu gigya mu ssente ze basasulwa.”

Ku luuyi olulala, waliwo abantu abasanyufu wadde ng’emirimu gye bakola gya kukakaalukana. Daniel, ow’emyaka 25 egy’obukulu era nga muzimbi, agamba nti: “Okukola emirimu egy’okukakaalukana kivaamu emiganyulo mingi, naddala singa omuntu aba n’ebigendererwa ebirungi.” Andre ow’emyaka 23, akkiriziganya naye. Agamba nti: “Essanyu n’okukola birina akakwate.” Agattako nti: “Obutakola nnyo tekireeta ssanyu lya nnamaddala wabula kireeta kiwuubaalo!”

Lwaki abantu nga Daniel ne Andre balina endowooza ennuŋŋamu ku kukola emirimu egy’okukakaalukana? Ekibayambye kwe kukolera ku magezi agali mu Bayibuli. Bayibuli etukubiriza okukola n’obunyiikivu, era n’okuba abagumiikiriza. Kyokka Bayibuli tekoma ku kutukubiriza kukola, naye era erimu amagezi agasobola okutuyamba okunyumirwa emirimu gye tukola.

Magezi ki agali mu Bayibuli agasobola okukuyamba okunyumirwa omulimu gw’okola? Weetegereze agamu ku go mu kitundu ekiddako.