Ondre Ta Opi Niri​—Omu Mungu ma ru ’Bapi Nzizaru Ri

’BA fe azita Kristiani dri dra Kristo niri ma E’yo Egazu. Dra ’di ma e’yo egaza ’ba vini omve “Ondre Ta Opi niri.” (1 ’Ba Krorintoa ’Diyi 11:20, NW) Afa dra ’di ma dria okporu ri a’du ni ya? O’du dika obi ’bani eri inzizu ri ngoni?

Yesu Kristo e’do omu ’diri o’du ’ba Yahudiru ’diyini Omu agazu ’ba drilesi ri nyazu eli 33 C.E. ma inisi. Omu agazu ’ba drilesi ri ’ba ndra inzi pale alu eli driasi, mba ’ba Yahudiru ’diyi pini Nisan ru ri ma o’du 14 si. Mba o’du ’dari isuzu, ’Ba Yahudini ’diyi ki ndra mba o’dini ma egaza te i. ’Diri di o’du sawa ’yini ovuzu tro tro 12 inisi azini 12 etusi ri’i. O’du oko ’bani mba nezu ’di ma vutia ri bani di e’doza Nisani niri. O’du agaza ’ba drilesiri niri di eca o’du 14 ma vutia, ondresi.

Yesu nya omu Agazu ’ba drilesiri ’ba ti opele ’diyi pie, vutinia dro Yudasi Isikariote ni amve, e’do di Ondre Ta Opi niri. Ondreta ’diri so bani di pa Omu Agazu ’ba drilesi ri ma paria ani le ’ba ma inzi eri pale alu eli driasi.

E’yo Baru Matayo ni si ri ’yo kini: “Yesu nga mikate ’du nga asi ndriza a’i drinia, nga aleni anyo, nga di fe ’ba erini imbale ’diyi dri, kini, ‘Emi ’du, emi nya; ’dori rua mani.’ Eri nga erejea ’du, ka awa’difo fe drinia ’bo, nga eri fe yi dri, kini ‘emi dria  ma mvu ’di ma alia; te ’dori eri “ari mani azizani,” ovupi osuzaru ’ba kakausi e’yo onzi wuzuri.’”—Matayo 26:26-28.

’Ba azi ’diyi a’iki kini Yesu oja mikate ’dari za i ma rua adari ru, azini vino eri ma ari adari ru. Te, Yesu ma za rua ri awi ndra nga ’dani erini mikate fezu ria. Adaru ’ba Yesu ni ti pele ’diyi nya ndra za Yesuni ma ada azini mvu ndra ari erini ma ada ya? Yo, ’dari afa azi onzi azita Mungu niri ni gasi ri’i. (E’doza 9:3, 4; ’Ba Levini 17:10) Ka ovu e’yo ’bani si Luka 22:20 ma alea risi, Yesu ’yo kini: “Okele ’diri eri e’yo aziza o’diru ari mani rapi emisiri ma aliari.” Okelea ’da oja ndra i “e’yo aziza o’diru” ri ma ada ru ya? Ovuni ’dini ku, a’dusikuni aziza eri otuta ni, ovuni afa azi ’bani ne milesi ra ni ku.

Ani e’yo ’disi, mikate ’da pi vino ’da be eyi iri tro eceta ni. Mikate e’da Kristo ma rua kililiruri. Yesu ayu ndra mikate ma joloko awipi Omu Agazu ’ba drilesi ri ma alea ri. Mikate nde ’dari ’ba ndra ede akufi koko. (Efuza 12:8) Biblia ni sawa driasia kufi ayu eceta ru ezata e’dazu. Ani e’yo ’disi, mikate ’da tu di pa Yesu ma rua kililiru fele edeta ru ri ma paria. Eri ndra kililiru ezata koko.—Matayo 16:11, 12; 1 ’Ba Korintoa ’Diyi 5:6, 7; 1 Petero 2:22; 1 Yohana 2:1, 2.

Vino ikaru ’da tu pa Yesu ma ari ma paria. Ari ’diri fe aziza o’diru ri azi nga ni. Yesu ’yo kini i osu ari iniri “e’yo onzi wuzu.” ’Ba ada ecoki di e’da kililiru Mungu ma milea ezata eyini ma aleasi ra azini ecoki di fi aziza o’diru ri ma alea Yehova be ra. (’Ba Ebraniani 9:14; 10:16, 17) Aziza, kaniku otuta ’diri fe Kristiani a’ita be, 144,000 ’diyi ni tuzu ’bua. ’Dale yi di nga ovu opi ru azini kuhani edeta edepi ’diyi ru tusu coza ejizu ’ba dria ni beni.—E’doza 22:18; Yeremia 31:31-33; 1 Petero 2:9; E’yo Eceza 5:9, 10; 14:1-3.

A’di pi di mikati azini vino eceta ru ’diyi pi nya azini mvu ni ya? E’yo adasi ria, lu ’ba aziza o’diru ri ma alea ’diyi ki a’dule—’diri di, ’ba ovupi asi ’baza be muzu ’bua ’diyi ki—le ma nyaki mikate ’diri azini ma mvuki vino ’diri ni. Orindi alatararu Munguniri e’yo nze ’ba ’diyi pie kini eyi ’ba ’bani pele opi ru ’bua ’diyi ki. (’Ba Rumia ’Diyi 8:16) E’yi vini aziza Suru niri ma alea Yesu be.—Luka 22:29.

 Te di ’ba azi ngapi o’api Paradisia nyakua ’dia ’dani ’dani ’diyi ki ria? Eyi azita Yesu ni fe Ondre Ta Opi niri ma e’yo egazu ri ma vuti obi, ’ba omu nderi nepi inzitasi ’diyi ru, te ovukini ’ba afa ’diyi nyapi azini mvupi ’diyi ki ku. Eli driasi pale alu mba Nisani niri ma o’du 14 si, ’Ba Yehova ma E’yo eti Nzepi ’Diyi Ondre Ta Opi niri ma e’yo inzi. Tro ’ba alifu were kalafe wudrikurua ’diyi ma eselea ’diyi ni ’yozu kini eyi bani ’ba asi ’baza tuzu ’bua ri be ’diyi ki ra, Omu ’diri Kristiani dria ni. Eri sawa ’ba dria ni asisile drozu leta amboru tu Yehova Mungu pini e’da Yesu Kristo be ri ma dria ri.—Yohana 3:16.