Agupi Uri Koko Ri
A’DIKO 74
Agupi Uri Koko Ri
MI NDRE ’ba yi ogu karileo ’disi. Mi ni eri a’di i ri ra ya? ’Di Yeremia i. Eri nabi orodri ru Mungu ni ri i.
Opi Yosia ni e’dozu siriba ’diyi ma dri jazu angu ’di ma alea risi ’bo ri ma vutia, Yehova nga ’yo Yeremia ni ma ovu Eri ma nabi ru. Te Yeremia ega kini i werea ru tu ovuzu nabi ru. Te Yehova ’yo kini i nga Eri ma aza ko ra.
Yeremia ’yo ’ba Israelini ’diyi ni ma ku e’yo onzi ’ye ko ja. Nga ’yo ra kini: ‘Mungu ’ba ’diyi ni inzile ’diyi inzoru.’ Te ’ba Israelini kakau ’diyi riki wura inzile inzi ’diyi inzi i Yehovani inzizu ri ma paria. Yeremia ni ’yozu ’ba ’diyi ni kini, Yehova ni nga eyi dri panga fe e’yo onzi eyini ’yele risi ra ria, nga ki ogu erisi ogu ogu.
Eli yini agazu ’boria. Yosia nga dra ra, azini mba na ma vutia eri ma mvi Yehoakimu nga eca opi ru. Yeremia nga ’yo ’ba ’diyi ni ’dika kini: ‘Yerusalemu ni nga dri jara emi ka emi obi onzi ’di oja ku ria.’ Kuhani nga Yeremia ni bi dika nga otre kini: ‘Mi nga dra ra e’yo mini ’yole ’disi.’ ’Da ma vutia nga olu ’ba opiru Israelia ’diyi ni kini: ‘Le ’ba ma ’di Yeremia ni ra, a’dusiku nze e’yo onzi ama aku ambo ’di ma rua.’
Yeremia ni nga ’ye ngoni ya? Ovuni urisi ku! Nga ’yo ’ba ’diyi dri dria kini: ‘Yehova epe ma ti e’yo ’diri nzezu emi dri ni. Emi kaki obi onzi emini o’azu ’diri ku ku, Yehova ni nga Yerusalemu ma dri ja ra.’ Te emi ma ni e’yo ’diri kini: ‘Emi ka ma ’di ra, emi ’da ’ba e’yo onzi ’ye pi ku ni ’di.’
’Ba opiru ’diyi nga Yeremia ni ku ra, te ’ba Israelini ’diyi kuni e’yo onzi eyi ni ’yele ’diyi ku. ’Da ma vutia opi Babuloni ni, Nebukadineza nga imu a’di ’dizu Yerusalemua. Asizu Nebukadineza nga ’ba Israelini ’diyi o’ba ima ati’ba ru. Nga ’ba alifu alifu ’diyi o’du ji Babulonia. Mi ega nga mi ta o’a ngoni ’ba mini nile ku ’diyi ni mi ’duzu mivile akuari si mi jizu angu mini nile ku ri ma alia!
