Agupianzi Su ’Diyi Babulonia
A’DIKO 75
Agupianzi Su ’Diyi Babulonia
OPI Nebukadineza ’du ’ba Israelini onita be tu ’diyi ji eyi Babulonia. ’Da ma vutia opi nga eyi ma eselea karile alaru azini ndrizaru tu ’diyi ki ope. ’Ba eyi ni ope ’diyi ma azi eyi agupianzi mi ni ndrele ’diyi. Alu ri Danieli i, ’ba azini na ’diyi ’ba Babulonia ’diyi omve yi, Sadaraka’i, Mesaka’i azini Abedinego’i.
Nebukadineza otu i anzi ’diyi imbazu azi ngazu opi vile joa. ’Bani eyi imbazu eli na ’bori ma vutia, nga ’ba ondua ru ’diyi pe ima azakozu candi ivule ’diyi ma geri otuzu. Opi le agupianzi ’diyi ma ovu okporu azini rua alaru be ’ba ni eyi imbaria. Nga ’di aziza azi kini ati’ba ma fe yini dria nyaka esele ndundu azini afa mvuza opi ni mvule ’ba ivile akua ’diyi pie ri i.
Mi ma ndre nga karileo Danieli i. Mi ni eri a’du e’yo nze Nebukadineza vile atibo ma dricere omvele Asupenazi nia ri ra ya? Danieli ni ’yo erini kini eyi leni nyaka onyiru engazu opi ma mesa dria ’diyi nyazu ku. Te Asupenazi ovu asi oraza be tu. Nga di ’yo: ‘Opi ope afa emini ngale nyale azini mvule ’diyi ni. Emi ka e’da kililiru dria anzi azi ’diyi le ku, eco nga ma ’di ra.’
Danieli nga mu agu Asupenazi ni ’ba ima tambazu azini ima agyi na ’diyi be ri vu kini: ‘Kate ecorarisi mi o’bi nga ama o’du 10, mi fe nga ama dri tibi ini nya azini yi mvuza be. Vutinia mi fe ’ba ma o’bi anzi azi nyaka opi vile ri nyapi ’diyi ama be ndrezu a’di ena muke tu nia ni.’
Agu ’bani ’bale eyi ma ta mbapi ri a’i ra. O’du 10 ’diyi ka mu ca ’bo, Danieli pi ima agyi na ’diyi pie enaki kililiru tu aga karileo azi ’diyi dria ra. ’Ba eyi ma ageyi te pi ’diyi nga di fe eyi ni tibi ini nyazu nyaka opi vile ri ma paria i.
Eli na di ma vutia karileo ’diyi ’ba nga eyi ji dria Nebukadineza vu. Eri ni e’yo nzezu eyi pie dria ’bo ri ma vutia, opi nga isu ndre Danieli pi ima agyi na ’diyi pie ovu ki ondua ru ndeni. Nga ’di eyi ma ta mba ovuzu ivule joa. E’yo opi ni zile Danieli, Sadaraka, Misaka azini Abedinego pi ma tia ri kani tro, e’yo ewaru tu ni ti, eyi ni omvita ni ri pale 10 aga kuhani eri dri kaniku ’ba ondua ru ’diyi ra.
