A’DIKO 58

Daudi Pi Goliato Be

’BA FILISITIA ’diyi emu dika a’di ’dizu ’ba Israeli ni ’diyi be. Daudi ma adripi eri ma drilea na ’diyi curu’do Saulo vule asikari ru. O’du alu Yese nga ’yo Daudi ni kini: ‘Mi ’du anya azini enya mi ji adripi mini ’diyi dri. Mi ma ne eyi ’dale ngoni’ari beni.’

Daudi ka mu ca pari eyi ni hema sozuri ma alea ’bo, nga nzu pari drile a’di ’dizu ria ima adripika yi ndazu. ’Ba Filisitia ni omvele Goliato i ri nga efu emuzu drinza feza ’ba Israelini ’diyi ni. Ebi e’yo ’dinile ’diyi ’ye o’biti alu alu vusi azini ondre alu alu vusi o’du 40. Nga otre o’duko orusi kini: ‘Emi ma pe ’ba alu emini a’di ’dipi ni emuzu a’di ’dizu ma be. Ka nga ma ndera azini ma ’di ra, ama nga ovu emi ma ati’baru. Te aka nga eri nde ra azini eri ’di ra, emi nga ovu a ma ati’baru. Ma a’i emini ’ba aluni epezu aco cozu ma be.’

Daudi nga zi asikari azi ’diyi ma tia kini: ‘Yi nga a’du ’ye agu ’ba Filisitia ni ’diri fupiri dri erini drinza wule Israeli ma driarisi ya?’

Asikari omvi ’dini: ‘Saulo ni nga eri ni lonyi fe angiri. Azini eri nga zamva ivile ri fe erini oku ru.’

Te ’ba Israelini ’diyi woro ’ye urisi Goliato si a’dusiku eri ni ovuzu amburo ri si. Eri ma zoza aga futi 9 ra (ogogo mita 3), azini eri ma asikari gombere ombani ’dupiri vini ci.

Asikari azi ’diyi nga mu lu Opi Saulo i kini Daudi le mu aco co Goliato be. Te Saulo nga ’yo Daudi ni kini: ‘Mi econi ’ba Filisitia ni ’diri co ku. Milu agupiamva ni, eri ovu asikari ru e’dozu anzia si kpere sawa ’disi.’ Daudi nga omvi kini: ‘Ma ’di nguru pi kami be eyini ma ati ma kabilo ’duzu ri si. ’Ba Filisitia ni ’diri nga eca eyi ma azi alu ni le. Yehova ni nga ma azakora.’ Saulo nga ’yo kini: ‘Mi ma mu, Yehova ma ovu mi be.’

Daudi nga si a’bua yia azini o’du oni onzokonzo ’diyi towi, nga eyi ’ba ivile jurua ri ma alea. Nga ima baka oni ’bezu ri du. Nga mu ’ba Filisitia ni nderi vu nyia ogogo. Goliato ka mu eri ndre ’bo, econi ai ku. ega kini eri ovu ewakokoru Daudi ni ’dizu.

Goliato nga yo kini: ‘Mi emu mavu, ma nga mi ma rua fe nya aria pini anyapa pie.’ Daudi nga ’yo kini: ‘Mi emu ma vu sei pie, aju pie, aju ambori pie, te ma emu mi vu ru Yehova ni ri si. Andrusi Yehova ni nga mi fe ma dria, ma nga mi fura.’

’Di ma vutia Daudi nga nzu Goliato vu. Su i ma dri jurua erini ri ma alea, e’du oni efi alu, nga eri ’ba baka alia, ’be eri ima okpo dria si. Oni fi Goliato ma andretia, nga e’de va dra ra! ’Ba Filisitia ’diyi ka mu ndre kini eyi ma ambo dra ’bo, nga ti oja apazu ra. ’Ba Israelini nga nzu eyi ma vuti si kpere eyini a’di ndezu.

1 Samueli 17:1-54.

Zita E’yo Onizu ’Diyi