Mungu Pe Daudi Ni
A’DIKO 57
Mungu Pe Daudi Ni
MI ECO ndre a’du afa ni i ‘ye nia ri ra ya? Agupiamva ’diri epa kabilo mva ’diri nguru ma tia risi ra. Nguru nga imu kabilo mva bi nyazaru. Te agupiamva ’di nga nzu nguru ma vutisi kabilomva epazu eri ma tiari si beni. Nguru ka mu enga oru ’bo, agupiamva ’di nga nguru bi a’be eri va kai! O’du azini si nga kabilomva epa kami tia ri si ra. ’Diri ovuni agupiamva uri kokoru ri i ku ya? Mi ni eri a’di ia’ri ra ya?
’Diri Daudi karileo ru ri i. Eri o’a aku ambo omvele Betelehemu ni ria. Eri ma a’bi ni Obedi, mva Rutu pini Boazi be ri i. Mi eco eyi ega ra ya? Daudi ma ati ni Yese i. Daudi ni kabilo ima atini ri ma ta mba. ’Ba osi Daudi ni eli 10 Yehovani Saulo ni pezu opi ru ’bori ma vutia.
O’du nga eca ra Yehova ’yo Samueli dri kini: ‘Mi to odu, mi mu Yese ’ba Betelehemua ri vu. Ma pe anzi erini ma esele opi ru ’bo.’ Samueli ni muzu Yese vule mva okori ndrezu ’boria, nga ’yo ima ngulupi dri kini: ‘Ada ’ba Yehova ni odu osuzu driniari ’di i.’ Te Yehova nga ’yo eri ni: ‘Mi lu zoza eri ni pi ndre ndriza erini be. Ma pe ni eri ovu zu opi ru ku.’
Yese nga i mvi Abinadabu ni omve eri ejizu Samueli vu. Te Samueli nga omvi: ‘Yo, Yehova peni ’diri ku indi.’ Da ma vutia Yese nga Samani i ma mvi ni eji. Dika Samueli nga ’yo: ‘Yo, Yehova peni ’diri ku indi.’ Yese nga anzipi aziri ’diyi eji dria Samueli vu. Te Yehova peni eyi ma azi aluni ku. Samueli nga zi Yese ma tia: ‘Anzi mini yi dria ’doa ’di ya?’
Yese nga ’yo: ‘Ace nga mva vileri. Te eri kabilo oceria.’ ’Bani Daudi ni ejizu ’boria, Samueli nga ndre e’da eka walalaru azini ndrizaru. Yehova nga yo dini: ‘Eri ’di ’i, mi osu odu drinia.’ ’Dinile Samueli nga ’ye ra. O’du nga eca ra Daudi ni ovu zu opi ru Israelia.
