Saulo—opi Israeli Ni Okori
A’DIKO 56
Saulo—opi Israeli Ni Okori
MI NDRE Samueli ni odu osu agu ’di ma dria. ’Diri e’yo ’bani ta ’ye oko ecezu kini agu ’diri ’ba pe eri ovuzu opiru ’bo ri. Yehova ’yo Samueli ni ma osu odu Saulo ma dria. Eri odu aji arikari ru ri i.
Saulo ega kini i ovuni kililiru ecazu opiru ’dini ku. Nga ’yo Samueli ni kini: ‘Ma suru Benyamini ni, suru werea Israelia ri. Mi ’yo ma nga ovu opi ru a’du e’yo si ya?’ Yehova le Saulo ni a’dusiku ’bani i ovuzu ’ba amboru ku. ’Diri e’yo ’ba ni eri pezu opiru ri i.
Te Saulo ovuni ’ba alio ru ni ku kani ’ba werea ru ni ku. Enga aku lonyi be ’dinile ri ma alea azini eri vini ’ba e’dapi kililiru azini izuru ri i. Eri ogogo futi alu aga ’ba izuru Israelia ’diyi dria ra! Saulo ni ’ba ongu be saaru azini okpobe tu ri i. ’Ba dria ovu ayikosi Yehova ni Saulo ni pezu opiru ri si. ’Ba dria nga otre o’duko orusi kini: ‘Opi mi ma rua ma adri ala ru ’dani ’dani!’
Ariba Israelini ’diyi ovu okporu ekile okurile. Eyi nga kiri candi fe ’ba Israelini ’diyi dri. ’Bani Saulo ni pezu opiru ’boria, ’ba Amonia ’diyi nga emu a’di ’dizu eyi pie. Te Saulo tra ’ba a’di ’dipi ’diyi kakau, nga ’ba Amonia ’diyi nde a’di si te. Saulo ni ovuzu opiru ri fe ’ba eyini ayiko saaru.
Eli ni agazu biri biri ’bo ria, Saulo ce ’ba Israelini ma dri a’di ndezu pale kakua eyi ma ari’bo pie. Saulo ovu agupiamva ori kokoru Yonatani be. Yonatani ko Israeli ma aza a’di kakua nde zu. ’Ba Filisitia ’diyi kiri ari’ba Israeli ni ndepi te ’diyi. O’du alu ’ba Filisitia ni alifu alifu emu a’di ’dizu ’ba Israelini ’diyi be.
Samueli nga ’yo Saulo ma te kpere ini emuzu edeta vezaru ri evezu, kaniku feta fezu Yehova dri ra ka. Te Samueli emuni mbele ku. Saulo ovu orisi kini ’ba filisitia ’diyi nga a’di ’diza e’do ra, ani nga mu drile edeta evezaru ri evezu ima ngulupisi. Samueli ka mu eca ’bo, nga ’yo Saulo ni eri obini azita vuti ku. Samueli kini: ‘Yehova ni nga ’ba azini pe opiru Israeli ma drilea i.’
’Di ma vutia Saulo nga azita nyo dika. Samueli nga ’yo eri ni kini: ‘Mi ni Yehova ma ti erizu ri aga feta oso beri fezu ri ra. A’dusiku mini Yehova ma azita vuti obizu ku risi, Yehova ngani mi ku ovuzu opiru Israelia ku.’
Ama eco e’yo kililiru ni oni engazu dia ra. ’Diri ece amani ovu orodri ru tu Yehova ma e’yo erizu sawa dria si. Azini vini, ece amani ’ba muke, ekile Saulo ni dra ovule ri le ’diyi, eco ki eyi oja ovuzu ’ba onzi ru ra. Ama leni eca ovuzu ’ba onzi ru ku, di ri a’da ya?
1 Samueli caputa 9 kpere 11; 13:5-14; 14:47-52; 15:1-35; 2 Samueli 1:23.
