Asiza E’yo Onzi Dria Ni
A’DIKO 114
Asiza E’yo Onzi Dria Ni
MINE dia a’du afa ni ya? Ee, asikari ongulumuru akanya imveru dria. Akanya nde ’diyi isi ’buarisi va iriti aleasi! Te ada ru akanya yi ’bua ’dale ci ya?
Yo, ’diyi ovuni akanya adaru dirile ’diyi ku. Ama ni ’diri a’du e’yo siari akanya ni ecozu nzuzu iriti aleasi ku risi, ecoki ra ya? Te Biblia nze e’yo akanya ’bua ’diyi pi ma dria. Mi ni asisile ni ra ya?
’A’dusikuni driorisi ’ba oku akanya eyi ayu a’di ’dizu. E’yo ’disi Biblia ece ’ba ni nzuria akanya driasi engazu bua imuzu va edazu kini mungu ovu a’di ’diza be ’ba nyakua ’diyi pie. Mini ’ba pari a’di diza ni ri omve ngoni ya ri ra ya? ’Ba eri omve Amagedoni i. A’di ’dari e’yo onzi nyakua ’diyi dezu woro.
Yesuni Agu ngapi a’di Amagedoni ni ’di ma dricepi ri. Le mi ega ra kini Yesuni opi Yehova ni pe gamete I ni ma dricepi ri i. ’Diri bani asisile Yesu ni kofia opini ri suzu ima dria ri. Sei eri ma dria di eda kini eri nga ari’bo mungu ni ’diyi ma dri ja dria ra. Le ama ma o’aki osutasi e’yo Mungu ni ngazu ’ba onzi ma dri jazu disi ya?
Ama ma da nga dri A’diko 10 zu ria. Mi ne ’da a’du afa ni ya? Yi tiza amboru ndra ba kakau ma dri Japiri. A’di fe ndra Yi Tiza diri ni? Yehova Mungu i. Dika mi ne nga A’diko 15. A’du e’yo ni i ’ye dia ni ya? Yehova ni Gomora pi ma dri ja Sodomu be acizi.
Mi emu A’diko 33. Mi ne nga e’yo i ’yepi Asikari Misiri ni akanya ombani ma dria ’diyi be ri. A’di fe yi ni i akuzu eyi ma dria ni? Yehova i. ’Ye e’yo ’diri ’ba i ni ’diyi ma ageyi tezu. Mi ne A’diko 76. Mi nga ne Yehova fe vini ndra ’ba ini, Israeli ru ’diyi ma dri ja eyini e’yo onzi ’yezu risi.
Ani e’yo ’disi le ama ma o’aki osutasi Yehova ni ngaria asikari i ni ’diyi ma ti epezu e’yo onzi nyakua ’diyi ti dezuria ku. Te mi ega nga e’yo ’diri ma efi ngonia ri! Mi eji nga buku ’di ma peji dria le ru alu ama ma ne nga a’du e’yo ni i ’ye ni yani.
