Paradisi O’diru Nyakua
A’DIKO 115
Paradisi O’diru Nyakua
MI NE nga pati ambo ambo ’diyi, mawua ndriza ru ’diyi azini oni amboru ’diyi pie. Ovuni ndriza ru ku ya? Mi ne ndiria ni afa nya mva were ’da ma dria. Mi ne vini kami ki tualu ase dria ’da. Mi le ni o’azu aku ovupi angu ’dinile ri ma alea ria ku ya?
Mungu le mi o’a nyakua Paradisia ’dani ’dani. Leni vini mini suza ndundu sawa ’disi ’bani isu ’diyi isuzu dika ku. ’Diri oyo soza Biblia ni ’ba ngapi o’api paradisi o’diru ma alea ’diyi ni ri: ‘Mungu ni nga o’a eyi be. Dra ngani ovu dika ku, awu wuza pie, lulu gaza pie dria ngani ovu dika ku. E’yo oko ’diyi aga ’bo.’
Yesu ni nga ne kini ojata ’diyi ma ’ye eyi dria ra. Mi ni a’du ngaria ri ra ya? Ee, erini e’yo onzi nyakua dria ’diyi wuzu ’ba onzi be ’bo ria. Yesu ni ndra o’azu Nyakua risi, ati ndra azo ndundu dria, enga ndra vini ’ba draza eyi indi. Yesu ’ye ndra e’yo ’diyi e’dazu i nga a’du e’yo ’ye wudrukuru dria sawa i ni ngazu ecazu opi ru boria risi ria.
Mi ega tro nga e’yo ma onyi ni nga adri Paradisi odiru da ma alea ngoniari! Yesu piki ’ba azi erini opele ’diyi pie nga opi nya tualu bua ’dale. ’Ba nde ’diyi nga ’ba nyaku dria ’diyi ma ageyi te nezu kini eyi dria o’a ayikosi. Ama ma ne di nga le ama ma ’ye a’du afa ni amani ecozu idri ’dani ’dani paradisia ri isuzu beni.
