Agupi Urikoko Ri
A’DIKO 7
Agupi Urikoko Ri
’BA MA kalafe ni i’dozu izuzu nyakua ’bori ma vutia, eyi ma ndeni ndra ekile Kaini le e’yo onzi ’ye ’i. Te agupi azi aluni ndra ndu. Eri agupi omvele Enoka ru ’di ’i. Enoka ni ndra agupi uri kokoru ri ’i. ’Ba eri ma ageia ’diyi ndra dria afa onzikanyaru ’diyi ’ye ’i, te Enoka mu ndra drile azi ngazu Mungu dri.
Mi ni ’ba ndra sawa ’dasi ’diyi e’yo onzi kakau ’ye a’du e’yo si’ari ra ya? A’di fe ndra Adamu pini Eva be Mungu ma ti gazu azini pati efi ndra Munguni ’yo ma nyaki ku ri nyazu ni ya? Ee, eri ndra malaika onzi ni. Biblia omve eri Satani ’i. Le o’bi fe ’ba driani ecazu ’ba onziru.
O’du azini alu Yehova Mungu pe ndra Enoka ma ti mu e’yo ’ba ni le eri ku ’dinile ri olu ’ba yini. E’yo nde ndra ’dini: ‘Munguni nga ’ba onzi ’diyi ma dri ja dria ra.’ ’Ba ’diyi ecoki ndra ovu a’okosi tu eyini e’yo ’di erizu risi. Ecoki vini ndra ’dele o’bi Enoka ni ’dizu ra. Asisile ’disi le ndra Enoka ma ovu uri kokoru ecozu e’yo Munguni le ’ye ’di oluzu ’ba ’diyi ni.
Mungu fe ndra Enoka ni o’azu ewu angiri ’ba onzi ’diyi ma eselea ku. Enoka o’a lu ndra eli 365 a’dule. Ama ’yo “lu eli 365 a’dule” ’dini a’dusi ya? Asisile ni ri ’ba sawa ’dasi ’diyi ndra okpo be tu azini eyi ndra o’a eli angiri aga ama ra. Osutaru, Enoka vile mva Metusela o’a ndra eli 969!
Enoka ni drazu ’bo ri ma vutia, ’ba ecaki di ndra onzi nya nya. Biblia kini ‘egata dria yini egale ’diyi ndra onzi sawa driasi,’ azini ‘nyaku ga ndra tre e’yo onzi ma ’yeza si.’
Mi ni asisile aluzu e’yo onzi ni ndra ovuzu nyakua tu sawa ’dasi ri ra ya? A’dusikuni Satani isu ndra geri azi erini fezu ’bani e’yo onzi yezu o’di ni. Ama di mu e’yo oni ’di ma dria.
