ESELE 6

Osita Yesu nia Cazu Kpere Drata Erinia

Malaika Gabireli ma ti ’ba pe zamva ndrizaru Mariamu vu. ’Yo erini eri nga mva esu ra mva ndeni nga ovu opi ru ’dani ’dani. Mva Yesu i ’ba osi lico ti nia, pari ’ba kabilo ocepi ’diyi ni muzu eri andrizu ria. Vuti vuti ru, ’bibio nga ’ba engapi Etu ni Efuria ’diyi ma dri ce mva nde vu. Ama oni a’di fe ’bibio ’da ni e’dazu ’ba nde ni ni’ari, azini ’ba pa Yesu ni dra ma alea risi ngoni ngonia ri.

Vutinia, Yesu ni ovuzu eli be 12 ria, nze e’yo ’ba imbapi ru ’diyi be hekalua. Eli mudri drini aro ’di ma vutia, ’ba fe erini batisimu azini e’do di azi e’yo ’ba Suru ni ndra Mungu ni eri ma ti epezu nyakua ri nga. Eri ma aza kozu azi ’di ma alea, Yesu ope ’ba 12 i ma vuti bizu.

Yesu ede vini tali kakua ru. Fe ’ba alifu alifu ni nyaka engazu e’bi azini mukati were si. Ati ’ba azo ru ’diyi dika enga vini ’ba draza ki indi. Asizu, ama oni e’yo eyi ’yepi eri ma rua vuti vuti ru idri erini ma alea ’diyi ma dria, azini ’ba ’di eri ngoni rua ri be indi. Yesu olu e’yo eli na nusu, ani e’yo ’disi ESELE 6 ri ’du eli 34 e’yo ’diyi ni eyi ’yezu.